قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ كونسەرت زالىندا «ماحاببات – ماڭگى ەرتەگى» اتتى مەرەكەلىك كونسەرتى ءوتتى.
عاشىقتار كۇنىنە ۇيىمداستىرىلعان مەرەكەلىك كونسەرتكە قازاق ەستراداسىنىڭ جۇلدىزدارى قازىبەك قۇرايىش، ازامات باقبەرگەنوۆ، حالىقارالىق جانە رەسپۋبليكالىق كونكۋرستاردىڭ لاۋرەاتتارى تاحاۋي راحمەتوۆ، جادىرا امانوۆا، اناستاسيا سكەپكو جانە ت.ب انشىلەر ونەر كورسەتتى.
سونداي-اق كونسەرتتىك باعدارلامادا وركەستر رەپەرتۋارىنداعى ماحاببات تاقىرىبىنداعى «رومەو-دجۋلەتتا» كينوفيلمىنەن «ماحاببات اۋەنى»، تولەگەن مۇحامەدجانوۆتىڭ «ماحاببات بەكەتى» كينوفيلمىنەن ساۋندترەك، «ماحاببات ماڭگى ەرتەگى»، «تاپتىم-اۋ سەنى» شىعارمالارى ورىندالدى.
كونسەرت سوڭىندا ۇلتتىق وركەسترمەن ۇلكەن ساحنادا العاش رەت ونەر كورسەتكەن، قازاق ەستراداسىنىڭ جارىق جۇلدىزى، ماحاببات تاقىرىبىندا اۋەلەتىپ ءان شىرقاپ جۇرگەن قازىبەك قۇرايىش عاشىق جاندارعا ارناپ تىلەك-نيەتىن ءبىلدىردى.
«جەر جۇزىندەگى ءار ادام باقىتتى بولۋعا لايىقتى. ومىردە ءوز جارتىڭىزدى تابۋعا، رياسىز ماحابات سەزىمىن كەشۋلەرىڭىزدى تىلەيمىن. ادامداردىڭ اراسىندا دا مەيىرىمدىلىك، ماحاببات سەزىمى سونبەگەنىن قالايمىن»، – دەدى قازىبەك قۇرايىش.