Instagram الەۋمەتتىك جەلىسىندە ماندارين قابىعىنىڭ پايداسى تۋرالى ۆيدەو تارالۋدا. ونى سودا قوسىپ قايناتسا، ءبىر اي قولدانعاننان كەيىن ءاجىمنىڭ 90% كەتىرەتىن لوسون شىعادى ەكەن. بۇل قۇرالدىڭ جاسارتاتىن اسەرى بار ما ەكەنىن Stopfake.kz انىقتادى.
ماندارين قابىعىنىڭ ەرەكشە قاسيەتتەرى تۋرالى اقپاراتتى امەريكالىق پودكاستەر برەت ۆاينشتەين تاراتقان. ول COVID-19 ەمدەۋ ادىستەرى مەن اۋرۋعا قارسى ۆاكسينالار تۋرالى جالعان مالىمدەمەلەرى، سونداي-اق ايتۆ جانە جيتس تۋرالى جالعان اقپارات تاراتقانى ءۇشىن سىنعا ۇشىراعان. اتاپ ايتقاندا، ۆاينشتەين يۆەرمەكتين COVID-19-دىڭ الدىن الادى جانە ەمدەيدى دەپ مالىمدەگەن. بۇل فەيك اقپاراتتى كوپتەگەن حالىقارالىق مەديسينالىق ۇيىمدار، سونىڭ ىشىندە ددۇ جوققا شىعاردى.
باسقا سيترۋس سەكىلدى، ماندارين دە س دارۋمەنىنىڭ كوزى بولىپ تابىلادى. سونىمەن قاتار، سيترۋس جەمىستەرى ناتريي، كاليي، كالسيي، مىس، تەمىر، ماگنيي، مارگانەس، مىرىش، فوليي قىشقىلىنا باي. ولار يممۋنيتەتتى نىعايتادى، ىشەك جۇمىسىن قالىپقا كەلتىرەدى، حولەستەرين دەڭگەيىن باقىلايدى، كورۋ قابىلەتىن، تەرى مەن شاشتىڭ كۇيىن جاقسارتادى.
زەرتتەۋشىلەر ماندارين قابىعىنىڭ جاعىمدى قاسيەتتەرىن اتاپ وتەدى. ونىڭ قۇرامىندا سۋپەرفلاۆونويدتار ساناتىنا جاتاتىن انتيوكسيدانت بار. عىلىمي ەڭبەكتەردە سۋپەرفلاۆونويدتاردىڭ قانداعى حولەستەريندى تومەندەتۋگە ىقپال ەتە الاتىندىعى جازىلعان. سيترۋس قابىعىندا كەزدەسەتىن ەفير مايلارى انتيسەپتيكالىق جانە قابىنۋعا قارسى قاسيەتتەرگە يە.
الايدا، اتالعان ارتىقشىلىقتارعا قاراماستان، ماندارين قابىعى بەت تەرىسىنە زيان كەلتىرۋى دە مۇمكىن. بۇل وتە كۇشتى اللەرگەن.
ماندارين تەرىسىنەن جاسالعان لوسوندى قولدانۋ سالدارىنان اللەرگيالىق رەاكسيا بولۋى ىقتيمال، اۋىز، ەرىن، ءتىل نەمەسە تاماق قىشىپ، ىسىنەدى، ەسەكجەم شىعىپ، اۋىر جاعدايلاردا تىنىس الۋ قيىندايدى.
سودا (ناتريي بيكاربوناتى) كوسمەتولوگيادا تازارتۋ ماقساتىندا ءجيى قولدانىلادى. ول تەرىنىڭ لاستانۋىن جانە ءولى جاسۋشالاردى جويادى. دەگەنمەن، سودا سەزىمتال تەرىگە اگرەسسيۆتى اسەر ەتىپ، تىتىركەنۋ نەمەسە قۇرعاقتىق تۋدىرادى، اسىرەسە ۇزاق ۋاقىت قولدانعاندا.
«ماندارين قابىعىنان جاسالعان لوسون ءبىر ايدا بەتتەگى ءاجىمنىڭ 90% كەتىرەتىنى» تۋرالى ۆيدەونىڭ عىلىمي نەگىزى جوق. ماندارين قابىعىنىڭ قۇرامىندا انتيوكسيدانتتار مەن ەفير مايلارى سياقتى پايدالى زاتتار بار. ءبىراق ول اللەرگيالىق رەاكسيالار دا تۋدىرۋى مۇمكىن، ال سودا كوسمەتولوگيادا قولدانىلعانىمەن، سەزىمتال تەرىنى زاقىمداۋى ىقتيمال. بەتتى جاسارتۋ ءۇشىن دەرماتولوگتار تەكسەرگەن قۇرالداردى قولدانۋ كەرەك.