2024 جىلدىڭ مامىر ايىندا 19 ءتۇرلى الەۋمەتتىك ازىق-تۇلىك تاۋارلارىنىڭ باعاسى 0،2%-عا تومەندەدى. جالپى، ازىق-تۇلىك تاۋارلارىنا دەفلياسيا سوڭعى 4 جىلدا العاش رەت بايقالدى، دەپ حابارلايدى almaty-akshamy.kz
سەنبى كۇنى، 1 ماۋسىمدا ۇكىمەتتەگى كەزەكتى كەڭەستە ۆيسە-پرەمەر سەرىك ءجۇمانعاريننىڭ توراعالىعىمەن قازىرگى باعا جاعدايى قارالدى.
وسى كەڭەستەردە ەلدەگى اپتا سايىنعى باعا يندەكسى ەگجەي-تەگجەيلى تالقىلانادى. باعالار ءوسىمى نەمەسە تومەندەۋىنە جاسالعان تالداۋ ارقىلى قازاقستاننىڭ 20 وڭىرىندەگى 19 ءتۇرلى الەۋمەتتىك ازىق-تۇلىك باعاسى قاراستىرىلىپ، سەبەپتەرى انىقتالىپ، قاجەت بولعان جاعدايدا بىردەن باعانى تۇراقتاندىرۋ ءۇشىن تاپسىرمالار بەرىلەدى.
بۇل جولى دا، ساۋدا جانە ينتەگراسيا ءبىرىنشى ۆيسە-مينيسترى ايجان بيجانوۆا ەلدەگى ازىق-تۇلىك باعاسىنا قاتىستى اپتالىق ناتيجەنى ۇسىندى. 10 ايماق مينۋسقا شىقتى (اباي، سقو، پاۆلودار، قاراعاندى، اقتوبە، تۇركىستان، جامبىل، قىزىلوردا، اتىراۋ وبلىستارى جانە استانا)، بەس ايماق باعانىڭ نولدىك ءوسىمىن ساقتاپ قالدى (شقو، الماتى، قوستاناي، جەتىسۋ وبلىستارى جانە الماتى)، تاعى بەس وڭىردە (اقمولا، ماڭعىستاۋ، بقو، ۇلىتاۋ وبلىستارى جانە شىمكەنت) الەۋمەتتىك ازىق-تۇلىك تاۋارلارى باعاسىنىڭ 0،1%-0،6% وسكەنى تىركەلدى.
اپتا ىشىندە قىرىققابات باعاسى (-7،2%)، قاراقۇمىق جارماسى (-1،7%)، كۇرىش (-0،1%)، كۇنباعىس مايى (-0،5%)، تاۋىق ەتى (-0،2%)، مايلىلىعى 2،5% ءسۇت (-0،2%)، س1 كاتەگوريالى جۇمىرتقا (-0،6%) باعاسى ارزاندادى. سونىمەن قاتار كارتوپ، ءسابىز، پياز باعاسىنىڭ ءوسۋى جالعاسۋدا. قازاقستاننىڭ ءۇش وڭتۇستىك وڭىرىندە ايران باعاسىنىڭ تۇتاستاي العاندا 0،3%-عا وسكەنى بايقالدى. ساۋدا جانە ينتەگراسيا مينيسترلىگىنىڭ مالىمەتىنشە، اتالعان ءونىم باعاسىن جەرگىلىكتى ءىرى ءوندىرۋشى كوتەرگەن. سەرىك جۇمانعارين بقدا-عا وسى نارىقتاعى باعانىڭ ءوسۋىنىڭ نەگىزدىلىگىنە تالداۋ جاساۋدى تاپسىردى.
سونىمەن قاتار كەڭەستە بيىلعى ماۋسىم ايىنا ارنالعان كوكونىس باعاسىنىڭ ينديكاتيۆتى جوباسى تالقىلاندى. باعانى ءونىمسىز دەلدالداردىڭ نەگىزسىز كوتەرۋ مۇمكىندىگىن بولدىرماۋ ءۇشىن سەرىك جۇمانعارين ساۋدا جانە ينتەگراسيا مينيسترلىگىنە بقدا-مەن بىرلەسە وتىرىپ، ەكونوميكاعا نەگىزدەلگەن نارىقتىق باعانى ەسەپتەپ، كوكونىس باعاسىنا ءادىل ينديكاتيۆتى باعالاردى انىقتاۋدى تاپسىردى.