بۇگىندە 3 ملن ادام ءمامس جۇيەسىندە تىركەلمەگەن
قازاقستاندا مامس-كە تىركەلمەگەندەردى جۇيەگە تارتۋدىڭ بالامالى تەتىگىن ەنگىزۋ جوسپارلانىپ وتىر. بۇل تۋرالى ق ر دەنساۋلىق ساقتاۋ ءمينيسترى اجار عينيات ەلوردادا وتكەن مىندەتتى الەۋمەتتىك مەديسينالىق ساقتاندىرۋ ماسەلەلەرىنە ارنالعان دوڭگەلەك ۇستەل بارىسىندا مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءمامس (مىندەتتى الەۋمەتتىك مەديسينالىق ساقتاندىرۋ) جۇيەسىندە تۇزەتۋدى تالاپ ەتەتىن تۇستارى دا جوق ەمەس. سونىڭ ءبىرى حالىقتى ءمامس جۇيەسىمەن تولىق قامتۋ ماسەلەسى. بۇگىندە 3 ملن ادام ءمامس جۇيەسىندە تىركەلمەگەن، ياعني ساقتاندىرىلماعان. ءبىز وڭىرلەردى ارالاپ ءجۇرمىز. ەشقانداي جۇيەدە تىركەلمەگەن، سايكەسىنشە ءتيىستى مەديسينالىق كومەكتى الا الماي جۇرگەن ادامدار بار. بۇل اسەرەسە ەلدىمەكەن تۇرعىندارىنا قاتىستى. ءمامس جۇيەسىن جەتىلدىرە تۇسۋدە وڭىرلەردەگى ينفراقۇرىلىم مەن مەديسينالىق مەكەمەلەردىڭ ءتيىستى قۇرال-جابدىقپەن قامتاماسىز ەتىلۋى دە ماڭىزدى»، - دەدى اجار عينيات.
سونداي-اق، مينيستر ءمامس جۇيەسىنىڭ العا باسۋىندا كادر ماسەلەسىنىڭ دە بارىن ايتتى.
«مەديسينا سالاسىندا سيفرلاندىرۋدى قارقىندى تۇردە ەنگىزۋ كەرەكتىگىن ەستەن شىعارماعان ءجون. دەپۋتاتتىق كورپۋستىڭ قولداۋىمەن جاقىن ارادا ساقتاندىرىلماعان حالىقتى ءمامس جۇيەسىنە تارتۋدىڭ بالامالى تەتىگىن ەنگىزۋ جوسپارلانىپ وتىر. وعان سايكەس جۇيەدە تىركەلمەگەن ادامعا الدىن الا 12 ايلىق جارنا تولەۋ قاراستىرىلىپ وتىر»، - دەيدى ۆەدومستۆو باسشىسى.
بۇعان دەيىن حابارلاعانىمىزداي ەلىمىزدە جوعارى تەحنولوگيانىڭ كومەگىمەن وتا جاساۋ 3 ەسە ارتقان. ودان بولەك، قازاقستاندا ءولىم-جىتىمنىڭ 5 پايىز ازايعانى ايتىلدى.