وقۋشىلاردىڭ 80%-ى ماماندىق تاڭداماس بۇرىن اتا-اناسى مەن مۇعالىمدەرىنە قۇلاق اسادى.
مۇنداي دەرەكتى «بولاشاق» قاۋىمداستىعى كەڭەسىنىڭ مۇشەسى مۇحتار مانكەيەۆ كەلتىرىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ستاتيستيكالىق زەرتتەۋ دەرەكتەرى بويىنشا، ەڭبەككە قابىلەتتى حالىقتىڭ 60 پايىزدان استامى ماماندىق بويىنشا جۇمىس ىستەمەيدى. بۇل – ۇلكەن ماسەلە. سونداي-اق مەكتەپ وقۋشىلارىنىڭ 80 پايىزى اتا-اناسى مەن مۇعالىمدەردىڭ ىقپالىمەن ماماندىق تاڭدايتىنىن كورىپ وتىرمىز. بۇل رەتتە اتا-انالاردىڭ 25 پايىزى بالالارىنىڭ قانداي ماماندىق تاڭداعىسى كەلەتىنى تۋرالى تۇسىنىكتەرى جوق ەكەنىن مويىندايدى. وسى سياقتى باسقا دا ستاتيستيكالىق مالىمەتتەر ءبىزدىڭ قوعام بەلسەندىلەرى رەتىندە جوبانى قولعا الۋعا ىقپال ەتتى»، - دەدى «بولاشاق» وكىلى.
ول بيىل قاۋىمداستىق وكىلدەرى شالعاي اۋىلدارداعى 500-دەن استام مەكتەپتە كەزدەسۋ وتكىزەتىنىن جەتكىزدى
«2021-22 جىلدارى 40-تان استام مەكتەپكە بارىپ، كەزدەسۋلەر وتكىزگەن بولاتىنبىز. 2023 جىلدىڭ سوڭىنا دەيىن 500-دەن استام مەكتەپتى قامتىماقشىمىز، باستى نازاردا، ارينە، شالعاي ايماقتارداعى، اۋداندارداعى مەكتەپتەر بولادى»، - دەدى ول.