«ءىسىم وڭسىن دەسەڭىز، سول ءىستىڭ مامانى بولىڭىز،
داڭقىم شىقسىن دەسەڭىز، كوپشىلىكتىڭ ادامى بولىڭىز» دەپ حالىق دانالىعىندا ايتىلعانداي، مەنىڭ تاڭداعان ماماندىعىم حالىققا، ەلگە ەڭ قاجەتتى ماماندىق، تەك ونى ۇيرەنىپ، مەڭگەرىپ، ناعىز مايتالمان مامان بولۋ مەنىڭ قۇزىرەتىمدە.
ماماندىق تاڭداۋعا مەنىڭ بالا ارمانىم، الدىما قويعان ماقساتتارىم باستاۋ بولدى. ماقساتقا جەتۋ ءۇشىن ارمانىڭدى دۇرىس تاڭداۋىڭ كەرەك. ەگەر ارمان ىسكە اسپاسا، ماقساتىمنىڭ قۇر بولعانى. ەڭ باستىسى، كىم بولعىڭىز كەلەتىنىن انىقتاۋ جانە ءوز ماقساتىڭا تاباندىلىقپەن جەتۋگە تىرىسۋ. ءومىردىڭ قاي سالاسىندا جەتىستىككە جەتۋدى قالاساڭ دا، ءوز جولىڭداعى قيىنشىلىقتاردى جەڭە وتىرىپ، بۇكىل قوعامنىڭ يگىلىگى ءۇشىن ادال ەڭبەك ەتۋ.
كىشكەنە كەزىمدە ايدىڭ جارىعىنا، كۇننىڭ جىلۋىنا قىزىعا قاراپ، ولاردىڭ ادامعا پايداسى جايلى كوپ ويلاناتىنمىن. ەسەيە كەلە، مەن دە ادامدارعا جارىق، جىلۋ سىيلاسام دەگەن وي پايدا بولدى. ول ءۇشىن ەڭ الدىمەن ادامنىڭ جۇرەگىندە جىلۋلىق بولۋى كەرەكتىگىن سەزەتىنمىن. مىنە، ەر جەتىپ، ەس بىلگەننەن كەيىن ادامدارعا جۇرەك جىلۋىمەن بىرگە پايداسى مول ەلەكتر مامانى بولۋ ارقىلى الەمگە جارىق سىيلاۋعا بولاتىنىن ءتۇسىندىم. وسىلايشا مەن ەلەكتر مامانى بولۋعا شەشىم قابىلداپ، الماتى قالاسىنداعى ەلەكترومەحانيكا كوللەدجىنە وقۋعا ءتۇستىم.
قيىندىقتارى مەن قىزىقتارى قاتار كەزدەسەتىن ستۋدەنتتىك كەزەڭنىڭ ءار كۇنىن ىزدەنۋمەن، تالپىنىسپەن ۇيرەنسەم، بىلسەم دەپ كىرىسىپ كەتىپ، ءقازىر مىنە 2-كۋرستى دا باستادىق.
ساباقتان تىس ۋاقىتىمدا تەوريادان وتكەن ءبىلىمىمدى تاجىريبە جۇزىندە جەتىلدىرۋ ءۇشىن ۇستازداردان قوسىمشا ءدارىس الۋعا تىرىسامىن. سەبەبى، تەحنولوگيانىڭ دامىعان ۋاقىتىندا ەلەكتر سالاسى دا قارقىندى دامۋدا، سوندىقتان وزگەرىستەر مەن جاڭاشىلدىقتىڭ اعىمىنا ىلەسىپ، ءبىلىم مەن بىلىگىمىزدى كۇن سايىن ارتتىرىپ وتىرۋىمىز كەرەك. قازىرگى تاڭدا ءومىرىمىزدى ەلەكترسىز ەلەستەتۋ مۇمكىن ەمەس.
شاعىن ءۇي-جايدان باستاپ ۇلكەن زاۋىتتاردىڭ جۇمىسى تىكەلەي ەلەكتر جۇيەسىنە بايلانىستى. سوندىقتان دا، بۇل ماماندىق ءاردايىم سۇرانىسقا يە. ەلەكتر مامانى جۇمىس تاجىريبەسى جانە ءبىلىم دەڭگەيىنە بايلانىستى ءتۇرلى دارەجەلەرگە بولىنەدى.
ەگەر ءوز ءىسىڭنىڭ مامانى بولساڭ، بۇل سالادا ۇلكەن جەتىستىكتەرگە جەتۋگە بولادى. سول سەبەپتەن ءوز ماماندىعىمدى، بىلىكتىلىگىمدى ءارقاشان جەتىلدىرىپ، ناعىز مامان بولۋعا تالپىنۋدامىن. ەلەكتر مامانىنىڭ جۇمىسى دالدىكتى، مۇقياتتىلىقتى، جاۋاپكەرشىلىك پەن ساقتىقتى قاجەت ەتەدى.
ءقازىردىڭ وزىندە بوس ۋاقىتىمدا وسى سالادا اعاما كومەكتەسە ءجۇرىپ، ماماندىعىمدى قاتەسىز تاپقانىما كوزىم جەتۋدە. ءوزىم سىمدار مەن ەلەكتر جابدىقتارىن مونتاجداۋ جۇمىستارىن قىزىعا اتقارامىن. ەگەر ادامدا ءوز ماماندىعىنا دەگەن سۇيىسپەنشىلىك بولسا، وندا جۇمىستا بەرەكە دە، تابىس تا، جەتىستىك تە بولارى ءسوزسىز. مەن دە بولاشاقتا ادامداردىڭ جايلىلىعى مەن قاۋىپسىزدىگى ءۇشىن، عالامشاردىڭ ەكولوگيالىق بولاشاعى ءۇشىن قىزمەت ەتەتىنىمدى ماقتان ەتەمىن!
الماتى ەلەكترمەحانيكا كوللەدجىنىڭ
2 كۋرس ستۋدەنتى ايبۋسىن بەكزات اسەت ۇلى