ماماندار تەڭگەنىڭ كۇرت قۇنسىزدانۋىنا نە سەبەپ بولعانىن ايتتى

بۇنداي ديناميكالىق قۇبىلىسقا سەبەپ بولعان باستى نارسە – دوللارعا دەگەن سۇرانىستىڭ ارتۋى جانە نارىقتاعى ساتۋشىلاردىڭ شەكتەۋلى بولۋى. 

بۇل تۋرالى ق ر ۇلتتىق بانكىنىڭ مونەتارلىق وپەراسيالار دەپارتامەنتى ديرەكتورىنىڭ ورىنباسارى يۆان سەرديۋكتىڭ تۇسىندىرمەسىندە ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ءبىز ديۆيدەند تولەۋدىڭ باستالۋىنا بايلانىستى دوللارعا دەگەن سۇرانىستىڭ ارتقانىن كورىپ وتىرمىز. يمپورتتىق وپەراسيالاردى جۇزەگە اسىرۋ ءۇشىن ۆاليۋتا ساتىپ الۋعا سۇرانىس ادەتتەگىدەي ارتقان. ەندى شەتەلدىك ۆاليۋتا ۇسىنىسىنىڭ شەكتەۋلىگىنە كەلسەك. مامىر ايىنىڭ سوڭىندا ەكسپورتتاۋشىلار پايدالى قازبالاردى وندىرۋگە سالىق تولەۋ جانە «ۇلكەن سالىق اپتاسى» اتالاتىن مەرزىمدە ەكسپورتقا رەنتا سالىعىن تولەۋ ءۇشىن ۆاليۋتالىق ءتۇسىمدى ساتتى. ماۋسىم ايىندا ءبىز ساتۋدىڭ مۇنشا كولەمىن بايقامادىق. سوندىقتان بانكتەر بارلىق ساتىپ الۋشى كليەنتتەردى بيرجالىق ساۋدا-ساتتىققا جىبەردى، ونىڭ ىشىندە قارسى اعىندار بولماعاندىقتان، بۇل ۆاليۋتاعا قوسىمشا سۇرانىس تۋدىرادى»، - دەيدى يۆان سەرديۋك.

 سونداي-اق ول ماۋسىم ايىندا ورتاشا كۇندىك ساۋدا-ساتتىق كولەمى 95 ملن اقش دوللارىن قۇراعانىن، بۇل مامىر ايىمەن سالىستىرعاندا 18%-عا از ەكەنىن اتىپ ءوتتى. 

قازىرگى ۋاقىتتا ساۋدا-ساتتىقتىڭ جالپى كولەمى 1،6 ملرد اقش دوللارىنا تەڭ. ياعني، ۆاليۋتا نارىعى تۇرعىسىنان ەكونوميكالىق بەلسەندىلىك ايتارلىقتاي تومەن دەڭگەيدە قالىپ وتىر. 

جالپى العاندا، تەڭگە ديناميكاسى جالپى الەمدىك ۇردىسكە سايكەس كەلەدى. اقش مەملەكەتتىك باعالى قاعازدار كىرىستىلىگىنىڭ ءوسۋى مەن اقش دوللارىنىڭ جاھاندىق دەڭگەيدە نىعايۋى كوپتەگەن دامۋشى ەلدەردىڭ ۆاليۋتالارىنا قىسىم كورسەتتى. ماۋسىم ايىنىڭ باسىنان باستاپ دامۋشى نارىقتارداعى ۆاليۋتالاردىڭ ديناميكاسى كوبىنە تەرىس بولدى: برازيليا رەالى 10،7%-عا، تۇرىك ليراسى 5،8%-عا السىرەدى، سول سياقتى، يندونەزيا ءرۋپييى مەن مەكسيكا پەسوسى جانە وڭتۇستىك افريكا راندى شامامەن 2%-عا السىرەدى. ال، بۇل رەتتە J.P. Morgan دامۋشى ەلدەرىنىڭ ۆاليۋتا يندەكسى 2،2%-عا تومەندەگەن ەدى.