ەكى اپتا بويى ماماندار كەمەنىڭ زاقىمدانۋىنىڭ ىقتيمال سەبەپتەرىن زەرتتەدى
حالىقارالىق عارىش ستانساسىنىڭ (حعس) قۇرامىنا كىرەتىن «سويۋز مس-22» عارىش كەمەسىنە قاتىستى جاعدايدى "روسكوسموس" ساراپتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ماماندار حابارلاعانداي، 2022 جىلعى 15 جەلتوقساندا حعس-تا توتەنشە جاعداي ورىن الدى: رەسەيلىك-امەريكاندىق ەكيپاجبەن جەرگە ورالۋى ءتيىس «سويۋز مس-22» عارىش كەمەسى اسپابىنىڭ جانە قۇراستىرۋ بولىگىنىڭ سىرتقى قابىعىنا زاقىم كەلگەنى انىقتالدى.
ەكى اپتا بويى ماماندار كەمەنىڭ زاقىمدانۋىنىڭ ىقتيمال سەبەپتەرىن زەرتتەدى. ميكرومەتەوريتتىڭ سوعۋى سەبەپتەردىڭ ءبىرى رەتىندە اتالدى.
توتەنشە جاعدايدىڭ سەبەپتەرىن انىقتاۋ، كەمەنىڭ تەحنيكالىق جاعدايىن تالداۋ جانە ودان ءارى ءىس-قيمىل بويىنشا ۇسىنىستار ازىرلەۋ ءۇشىن قۇرىلعان ەكى جۇمىس توبىنىڭ قورىتىندىلارى تىڭدالدى.
«كەمەنىڭ جىلۋدى باسقارۋ جۇيەسىنىڭ رادياتورىنىڭ ىستەن شىعۋى سىرتقى مەحانيكالىق زاقىم سالدارىنان ەكەنى بەلگىلى بولدى»، - دەپ جازدى "روسكوسموستىڭ" باسپا ءسوز قىزمەتى.
كوميسسيا سونداي-اق جۇمىس توپتارىنىڭ قورىتىندىلارى نەگىزىندە 2023 جىلدىڭ قاڭتارىندا حعس رەسەيلىك سەگمەنتىنىڭ جەرۇستى ماماندارى مەن ەكيپاجىنىڭ ودان ءارى ءىس-قيمىلدارى تۋرالى، ستانسيانىڭ ىقتيمال وزگەرۋى جايىندا ۇيىمداستىرۋشىلىق شەشىمدەر قابىلداناتىنىن مالىمدەدى.