اۆتوتراسسالاردا 133 جىلىتۋ بەكەتى جۇمىس ىستەپ تۇر.
قازاقستاندىق ماماندار قىسقى ماۋسىمدا جول جۇرگەن ازاماتتارعا قيىندىق تۋىنداماۋ ءۇشىن قانداي ارەكەتتەر جاسالىپ جاتقانى جايىندا ايتىپ بەردى، دەپ حابارلايدى Almaty-akshamy.kz.
«رەسپۋبليكالىق جولداردى قىسقى ماۋسىمدا كۇتىپ ۇستاۋعا «قازاقاۆتوجول» ج ش س كاسىپورنى 1 مىڭنان استام ارنايى تەحنيكا جۇمىلدىردى. كوكتايعاققا قارسى 122 مىڭ تەكشە مەتردەن اسا قۇم مەن ۇنتاق، 18 مىڭ تونناعا جۋىق تۇز جانە حيميالىق رەاگەنتتەر دايىندالدى. سونىمەن قاتار، قار قۇرساۋى پايدا بولۋى مۇمكىن جەرلەردە 55 مىڭ مەتردەن استام قاردان قورعايتىن قالقاندار جانە 5 مىڭعا جۋىق ۋاقىتشا جول بەلگىلەرى ورناتىلۋدا»، - دەلىنگەن يندۋستريا مينيسترلىگىنىڭ حابارلاماسىندا.
مامانداردىڭ ايتۋىنشا، بۇگىنگى تاڭدا رەسپۋبليكالىق جولداردىڭ بارلىعى اشىق. ولاردى كۇتىپ ۇستاۋ جۇمىستارى تاۋلىك بويى جۇرگىزىلەدى. قار باساتىن بارلىق ۋچاسكەلەردە اۋا رايىنىڭ وزگەرۋىنە بايلانىستى جانە جول ەلەمەنتتەرىن اۋىستىرۋ ءۇشىن شۇعىل ارەكەت ەتەتىن تاۋلىك بويعى پاترۋلدەۋ ۇيىمداستىرىلدى. سونداي-اق، ساپاردا قيىن جاعدايعا تاپ بولعان جولاۋشىلار ءۇشىن ەل بويىنشا 133 جىلىتۋ بەكەتى جۇمىس ىستەيدى.
وقىس جاعدايلار تۋىنداعان كەزدە جول قوزعالىسىنا قاتىسۋشىلار 1403 ءنومىرى بويىنشا تاۋلىك بويى ىستەيتىن call-ورتالىققا حابارلاسا الادى.