ماماندار قازاقستان ارقىلى وتەتىن ءىرى ەسىرتكى تاسۋ ارناسىن انىقتادى

شارا بارىسىندا اۋعانستاندا وندىرىلگەن 30 كيلوگرامم گەروين تاركىلەندى.

ۇلتتىق قاۋىپسىزدىك كوميتەتى ءىرى حالىقارالىق ەسىرتكى سينديكاتىنىڭ زاڭسىز ارەكەتىنىڭ جولىن كەسۋگە باعىتتالعان كوپ ساتىلى حالىقارالىق وپەراسيانى ازىرلەپ، ىسكە اسىردى، دەپ حابارلايدى Almaty-akshamy.kz.

«بۇل قىلمىستىق توپ تاياۋ شىعىس پەن ازيا ازاماتتارىنان تۇردى. ەسىرتكى كونترابانداسى ارناسىنىڭ باعدارى اۋعانستاننان باستاۋ الىپ، ودان ءارى قازاقستان اۋماعى ارقىلى جۇرگەن، اقىرعى باراتىن جەرى نيدەرلاند بولعان.وسى توپ ارەكەتىنىڭ اۋقىمدى گەوگرافياسىن ەسكەرە وتىرىپ، ۇقك نيدەرلاند كورولدىگىنىڭ قۇقىق قورعاۋ ورگاندارىمەن ءوزارا ءىس-قيمىل ۇيىمداستىردى»، - دەلىنگەن ۇقك باسپا ءسوز قىزمەتىنىڭ حابارلاماسىندا.

وپەراسيانىڭ تابىستى ىسكە اسىرىلۋىنا ورتالىق ازيا وڭىرلىك ەسىرتكىگە قارسى كۇرەس جونىندەگى اقپاراتتىق-ۇيلەستىرۋ ورتالىعى مەن قازاقستان رەسپۋبليكاسى باس پروكۋراتۋراسىنىڭ قارقىندى تۇردە جاردەم كورسەتۋى ىقپال ەتتى.

بىرلەسكەن جەدەل ءىس-شارالار ناتيجەسىندە حالىقارالىق ەسىرتكى سينديكاتىنىڭ باستى قاتىسۋشىلارى انىقتالدى.

نيدەرلاند اۋماعىندا باقىلاناتىن جەتكىزۋ بارىسىندا كۋرەر ۇستالىپ، ودان اۋعانستاندا وندىرىلگەن 30 كيلوگرامم گەروين تاركىلەندى.

بۇدان ءارى، امستەردام قالاسىنىڭ قۇقىق قورعاۋ ورگاندارى ءتىنتۋ بارىسىندا ءىرى ەسىرتكى پلانتاسياسىن انىقتادى.

ساراپشىلاردىڭ دەرەكتەرى بويىنشا، جەتكىزىلەتىن ەلدە الىنعان ەسىرتكى قۇرالدارىنىڭ قۇنى 2 ملن. اقش دوللارىن قۇرايدى.

انىقتالعان فاكتىلەر بويىنشا نيدەرلاند قۇقىق قورعاۋ ورگاندارى سوتقا دەيىنگى تەرگەۋ جۇرگىزۋدە.