بازالىق مولشەرلەمە 14% دەڭگەيىندە ساقتالىپ قالدى.
قازاقستاننىڭ ۇلتتىق بانك ءتوراعاسى عالىمجان ءپىرماتوۆ بازالىق موشەرلەمەنىڭ نەگە وزگەرىسسىز قالعانىن ءتۇسىندىردى، دەپ حابارلايدى Almaty-akshamy.kz.
«بۇل شەشىم وسى جىلدىڭ مامىر-ماۋسىم ايلارىندا جۇرگىزىلگەن بولجامدىق راۋندتىڭ قورىتىندىسى نەگىزىندە قابىلداندى. ءبىز ينفلياسيا ءوسىپ، جىل سوڭىنا قاراي 13-15% دەڭگەيىندە قالىپتاسادى دەپ بولجاپ وتىرمىز. 2022 جىلعى ناۋرىزدان باستاپ گەوساياسي جاعدايدىڭ شيەلەنىسۋى جانە قازاقستاننىڭ قارجى نارىعىنا قىسىمنىڭ ايتارلىقتاي كۇشەيۋىنىڭ اياسىندا قازاقستاندا ينفلياسيا ۇدەي تۇسكەنىن ەسكەرگەن ءجون. رەسەي فەدەراسياسىنا قارسى سانكسيالارعا بايلانىستى جاھاندىق جەتكىزىلىم تىزبەگىندەگى پروبلەمالاردىڭ شيەلەنىسۋى الەمدەگى ءوندىرىس قۇنىنىڭ قىمباتتاۋىنا الىپ كەلدى. شەشىم قابىلداعاندا ءبىز وسى فاكتورلاردىڭ بارلىعىن ەسكەرەمىز»، - دەدى ول ۇلتتىق بانك سايتىندا جاريالانعان سۇحباتتا.
ونىڭ پايىمىنشا، بازالىق مولشەرلەمەنىڭ ساقتالۋى ينفلياسيانى باسەڭدەتپەك.
«ورتا مەرزىمدى كەزەڭدە ينفلياسيانى باسەڭدەتۋ ماقساتىمەن ينفلياسيامەن كۇرەستىڭ جانە ەكونوميكانىڭ ءوسۋى اراسىنداعى تەڭگەرىمدى ەسكەرە وتىرىپ، ءبىز بازالىق مولشەرلەمەنى 14% دەڭگەيىندە ساقتاپ قالدىق. بازالىق مولشەرلەمەنىڭ جوعارى بولۋى كونترسيكلدىك بيۋدجەت ساياساتىمەن جانە سىرتقى ينفلياسيالىق قىسىمنىڭ السىرەۋىمەن بىرگە 2023 جىلى ينفلياسيانىڭ 7،5-9،5%-عا دەيىن باياۋلاۋىنا ىقپال ەتەدى»، - دەپ ءتۇسىندىردى ۇلتتىق بانك باسشىسى.
بۇعان دەيىن ق ر پرەمەر-مينيسترىنىڭ ورىنباسارى – قارجى ءمينيسترى ەرۇلان جاماۋبايەۆ بازالىق مولشەرلەمە دەڭگەيىن قايتادان قاراۋ كەرەك دەگەن ۇستانىم ايتقان بولاتىن.