مۇنداي جۇمىستار 14 باعىتتاعى جولداردا جۇرگىزىلىپ وتىرادى.
جولدى جوندەۋمەن شۇعىلداناتىن قازاقستاندىق ماماندار جىل سايىن جاسايتىن جۇمىستارى تۋرالى ايتىپ بەردى، دەپ حابارلايدى Almaty-akshamy.kz.
«ەلىمىزدە رەسپۋبليكالىق ماڭىزى بار جولداردى سالۋ جانە جاڭارتۋمەن قاتار، پايدا بولعان شۇڭقىرلاردى جوندەۋ جانە تەگىستەۋ سياقتى جۇمىستار جۇيەلى تۇردە جاسالادى»، - دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
«قازاقاۆتوجول» كاسىپورنى جولداردى بۇزىلۋدان ساقتاۋعا جانە قوزعالىس قاۋىپسىزدىگىن قامتاماسىز ەتۋگە باعىتتالعان كەشەندى باعدارلاما اياسىندا 2021 جىلى 658 مىڭ شارشى مەترگە جۋىق شۇڭقىر جولدى جوندەپ، 189 مىڭ شارشى مەترگە جۋىق جولدى تەگىستەگەن. سونىمەن قاتار، 11 مىڭنان استام جول بەلگىسى، 480 اقپاراتتىق پاننو، 35 جارىق ديودتى جول بەلگىسى جانە 757 مەتر كوپىر قورشاۋى قويىلدى.
سونىمەن قاتار، 189 كولىك پاۆيلونى مەن دەمالىس الاڭى جوندەلىپ، 4،9 مىڭ شارشى مەتر دىبىس شىعاراتىن جولاقتار ورناتىلدى. جولداعى شاقىرىمدى كورسەتىپ تۇراتىن 3547 بەلگى، 28 مىڭنان استام دابىل باعانى جانە 55 مىڭنان اسا كاتافوت قويىلعان.
«بۇل شارالاردىڭ بارلىعى جولداعى قاۋىپسىزدىكتى قامتاماسىز ەتىپ، اپاتتىڭ ازايۋىنا جانە جۇرگىزۋشىلەردىڭ زەيىنىن ارتتىرۋعا وڭ اسەر ەتەدى. ايتالىق، دىبىس شىعاراتىن جولاقتار كەلە جاتقان قاتاردان شىعىپ كەتكەندە نەمەسە ءقاۋىپتى ۋچاسكەگە جاقىنداعاندا، جۇرگىزۋشىلەردىڭ نازارىن ارتتىرادى. جارىق ديودتى كاتافوتتار مەن جول بەلگىلەرى تۇنگى ۋاقىتتا باعدار كورسەتىپ وتىرادى»، – دەيدى جول ماماندارى.
مامانداردىڭ ايتۋىنشا، كەشەندى باعدارلاما اياسىنداعى مۇنداي جۇمىستار جىل سايىن رەسپۋبليكالىق ماڭىزى بار جولداردىڭ 14 باعىتىندا جۇرگىزىلەدى.