ماماندار الماتىداعى الەۋمەتتىك وسال توپتاعى وتباسىنا بارىپ، مۇرجاسىن تازالاپ بەردى

ءبىر ايلىق اكسيا اياسىندا جادىناما تاراتىلادى.

الماتىدا 1205 ءۇي پەش جاعادى، ونىڭ ىشىندە 51 ءۇي - تۇركسىب اۋدانىندا. جىلىتۋ ماۋسىمى جاقىنداعاندا ءقاۋىپتىڭ الدىن الۋ ءۇشىن بۇگىن توتەنشە جاعدايلار باسقارماسىنىڭ ماماندارى الەۋمەتتىك وسال توپتاعى وتباسىنا بارىپ، مۇرجاسىن تەكسەرىپ، تازالاپ بەردى، دەپ حابارلايدى Almaty-akshamy.kz Almaty.tv سىلتەمە جاساپ.

ءبىر ايلىق اكسيا اياسىندا جادىناما تاراتىلادى. وندا ءورت قاۋىپسىزدىگىن الدىن الۋ تۋرالى جازىلعان. ودان بولەك ءۇيدىڭ ىشىندە ىس شىقسا، دابىل قاعاتىن قۇرىلعىلاردىڭ جۇمىسى دا تەكسەرىلەدى.

«ءوزىم وت جاعام. گاز قوياتىن اقشا دا جوق، پاتەردە تۇرامىز. قانشاما حالىق گازعا ۋلانىپ جاتقانىن ەستىپ ءجۇرمىز. قۇداي ساقتاسىن، بالالارىم امان بولسىن!» – دەدى قالا تۇرعىنى راحمەتجان مانسۇروۆ. 

«تۇرعىندار مەن قالا قوناقتارىن قاۋىپسىزدىك ەرەجەسىن قاتاڭ ساقتاۋعا شاقىرامىز. وتپەن ويناۋعا، سالعىرت قاراۋعا بولمايدى. جىلۋ ماۋسىمى باستالعاندا ءار ءۇي يەسى اسا ساق بولعانى ءجون»، – دەدى تۇركسىب اۋدانى تجب باس مامانى انۋار كاليمولدانوۆ.

بىلتىر تۇركسىب اۋدانىنىڭ وزىندە 31 ءورت جاعدايى تىركەلگەن. پەش جۇمىسىنىڭ بۇزىلۋىنا قاتىستى 8 وقيعا ورىن الدى.