ماماندار اعاشتاردى وڭدەۋگە قولدانىلاتىن پرەپاراتتىڭ ادامعا زيانى جوقتىعىن ايتادى

الماتىنىڭ جاسىل جەلەگىن بيولوگيالىق وڭدەۋ جۇمىسى باستالدى. 

قالانىڭ جاسىل جەلەگىن بيولوگيالىق وڭدەۋ جۇمىسىنا پايدالانىلاتىن پرەپاراتتىڭ وزىندىك ءيىسى بار، ءبىراق ادامدارعا زيانى جوق. بۇل تۋرالى جاسىل ەكونوميكا باسقارماسىنان ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

باسقارما مالىمەتىنشە، جاسىل جەلەكتى وندەۋ جۇمىستارى تۇنگى ۋاقىتتا جۇرگىزىلەدى. ناقتىراق ايتساق، ساعات 23:00 - 06:00 ارالىعىندا. سەبەبى كۇن ساۋلەسى دارىلىك زاتتىڭ زيانكەستەرگە اسەرىن تومەندەتەدى.

وڭدەۋگە قازاقستان اۋماعىندا قولدانۋعا رۇقسات ەتىلگەن قاۋىپتىلىكتىڭ تومەنگى ساناتىنداعى بيولوگيالىق پرەپارات قولدانىلادى.

ۇسىنىلعان اقپاراتقا سۇيەنسەك، پرەپاراتتىڭ وزىندىك ءيىسى بار. دەگەنمەن قورشاعان ورتاعا، ادامدارعا، ءۇي جانۋارلارى مەن وزگە دە ءتىرى اعزالارعا ەش زيانى جوق.

ءبىرىنشى كەزەڭ جۇمىستارى قالا بويىنشا ءبىر اي بويى جۇرگىزىلەدى. كەلەسى ءۇش كەزەڭ ماۋسىم، شىلدە، تامىز ايلارىندا وتكىزىلەدى.

«اۋلالار، ساياباقتار مەن كوشە بويىنداعى بارلىق جاسىل جەلەكتى وڭدەۋ جوسپارلانعان. وسى ورايدا قالا تۇرعىندارى مەن قوناقتارىن تۇسىنىستىك تانىتىپ، مامانداردىڭ جۇمىسىنا كەدەرگى كەلتىرمەۋدى سۇرايمىز»، - دەپ حابارلادى باسقارمادان.