بالانىڭ ومىرىندەگى العاشقى جىل - اتا-انا ءۇشىن ەڭ ماڭىزدى ءارى مازاسىز كەزەڭدەردىڭ ءبىرى. اتا-انا اتانعان سوڭ، جاۋاپكەرشىلىك تە ارتادى، بالا ءۇشىن كوپ نارسە ىستەيدى، "ءبارىن دۇرىس جاساپ جاتىرمىن با" دەگەن ۋايىم دا قوسىلادى. كەيدە ءتىپتى وزىنە قاتىسى جوق "ءجيى ەستىلەتىن، ايتىلاتىن دياگنوزداردى" بالاسىنىڭ بويىنان ىزدەۋگە بەيىم بولادى. الايدا شامادان تىس بەلسەندىلىك پەن قامقورلىق كەيدە كومەكتەسۋدىڭ ورنىنا، كەرىسىنشە، زيان كەلتىرۋى مۇمكىن.
كەز كەلگەن ادام اتا-انا اتانعان ساتتەن بارىنشا بالاسىنىڭ دەنساۋلىعىنا، دامۋىنا، بويىنداعى وزگەرىسىنە، قىلىقتارىنا ءمان بەرۋى زاڭدى. ماماندار انالاردىڭ بالاعا كەلگەندە شامادان تىس الاڭداۋى مەن ۇرەيلەنۋى وزدەرىنە كەدەرگى ەكەنىن ايتادى. بۇل جاعدايدا دارىگەرلەر اتا-انالاردىڭ بالانىڭ جاعدايىنان گورى ءوز ۇرەيىن "ەمدەۋگە" تىرىساتىنىن ايتادى.
Aqshamnews.kz ءتىلشىسى بۇل جايىندا ماماننىڭ پىكىرىن ءبىلدى.
اقپاراتتىڭ كوپتىگى مەن الاڭداۋشىلىق
15 جىلعا جۋىق ەڭبەك ءوتىلى بار دارىگەر-پەدياتر، بالالار ينفەكسيونيسى اياگوز ابدەشوۆا وسى ۋاقىت ارالىعىندا كوپ نارسە جاقسى جاققا وزگەردى دەپ ايتۋعا بولاتىنىنا سەنىمدى. ايتۋىنشا، بۇرىن جاس اتا-انالار كوبىنە جەكە تاجىريبەسىنە (ەگەر بار بولسا)، اناسى مەن اجەسىنىڭ، تانىستارىنىڭ كەڭەسىنە سۇيەنەتىن.
ءقازىر ينتەرنەت پەن الەۋمەتتىك جەلىلەر ساپالى اقپارات كوزدەرىنە جول اشتى. اتا-انالار دارىگەر كەڭەسىن تەكسەرىپ، قانداي ادىستەر مەن دارىلەردىڭ شىنىمەن ءتيىمدى ەكەنىن، ال قايسىسى ماركەتينگتىك ءتاسىل عانا ەكەنىن تۇسىنە الادى. بۇل - ءسوزسىز ۇلكەن پليۋس.
الايدا اقپاراتتىڭ تىم كوپ بولۋى، ونىڭ ۇستىنە بىر-بىرىنە قايشى ءارى كەيدە سەنىمسىز مالىمەتتەردىڭ تارالۋى اتا-انالاردىڭ مازاسىزدىعىن كۇشەيتەتىنى تاعى بار. سونىڭ سالدارىنان ولار شىن مانىندە جوق پروبلەمالاردى ىزدەپ، بالانىڭ دەنساۋلىعىنا شامادان تىس الاڭداي باستايدى.
سابيلەر ءۇشىن نورما سانالاتىن جاعدايلار
پەدياتر اتا-انالار اراسىندا ەڭ ءجيى كەزدەسەتىن جاعداي - جاي عانا باقىلاۋدىڭ ورنىنا ولاردىڭ بىردەن ەمدەۋگە كىرىسىپ كەتەتىندىگىن ايتادى.
وسى كۇنى اتا-انالاردىڭ ءدارى قوبديشاسى كەيدە بالانىڭ وزىنەن دە جىلدام "ءوسىپ" جاتقانداي. كەي انالار قىزۋى جوق قاراپايىم تۇماۋدىڭ ءوزىن تىم "اسىرەلەپ"، شۇعىل ەمدى قاجەت ەتەتىن دياگنوزعا اينالادىرىپ الادى. كوپ جاعدايدا اتا-انالار جرۆي كەزىندە دە ەكىنشى پىكىر ىزدەپ كەلەدى جانە بالاسىنا مىندەتتى تۇردە ءدارى بەرۋدى تالاپ ەتەدى. يممۋنومودۋلياتور دەپ اتالاتىن پرەپاراتتاردى دا كەڭىنەن قولدانۋعا اۋەس.
ال شىن مانىندە، سابيلەردە اۋرۋ ەمەس، نورما سانالاتىن جاعدايلار وتە كوپ.
فيزيولوگيالىق تۇماۋ، ءجيى كەكىرۋ، ءومىرىنىڭ العاشقى ايلارىنداعى ءىشتىڭ ءتۇيىلۋى - بۇل اۋرۋ ەمەس، اعزانىڭ بەيىمدەلۋ كەزەڭدەرى.
ەگەر بالا بەلسەندى بولسا، جاقسى ەمسە، سالماق قوسىپ جاتسا - ەمدەۋدىڭ قاجەتى جوق. الاڭداۋعا تەك جاعدايى ناشارلاعاندا: السىزدىك، تاماقتان باس تارتۋ، جوعارى تەمپەراتۋرا، تىنىس الۋىنىڭ بۇزىلۋى نەمەسە سالماق جوعالتۋ كەزىندە عانا نەگىز بار.
"ماڭگىلىك كلاسسيكا": قىزىپ كەتۋ، ءىشتىڭ ءتۇيۋى جانە بورتپە
قىزىپ كەتۋ. بالا تەرلەپ، مازاسىزدانىپ تۇرسا دا، ۇلكەندەر ونى توڭىپ قالدى دەپ ويلايدى. سونىڭ سالدارىنان تەرىدە بورتپە پايدا بولادى، بالا ناشار ۇيىقتايدى، ال اتا-انالار سەبەپتى اللەرگيا مەن "ءالسىز يممۋنيتەتتەن" ىزدەي باستايدى. قوسپانى اۋىستىرادى، ءتۇرلى ەم ىزدەيدى.
ال شىن مانىندە، بالانى جاي عانا جەڭىل كيىندىرىپ، ءبىر قابات كيىمىن سىدىرىپ قويسا جەتكىلىكتى.
سابيلەرگە كوبىنە جىلى كورپە مەن قالىڭ كيىمگە وراپ، قىمتاي بەرگەننەن گورى كيىمنىڭ ءبىر قاباتىن كەم كيگىزگەن دۇرىس ەكەن.
جاڭا تۋعان نارەستەلەردىڭ تەرىسىنىڭ قىزارا ءبورتۋى (فيزيولوگيالىق اكنە) - تاعى ءبىر ءجيى كەزدەسەتىن جاعداي. بەتىندە نەمەسە ماڭدايىندا قىزىل بورتپەلەردىڭ پايدا بولۋىن اناسىنا ديەتا ۇستاۋدىڭ، قوسپانى اۋىستىرۋدىڭ نەمەسە "بىردەڭە دۇرىس ەمەس" دەپ ويلاۋدىڭ قاجەتى جوق.
بۇل - تەرىنىڭ قالىپتى فيزيولوگيالىق كۇيى. ول ءومىرىنىڭ العاشقى 2-4 اپتاسىندا پايدا بولىپ، بىرنەشە اپتادان ءۇش ايعا دەيىن ساقتالۋى مۇمكىن.
ءىشتىڭ ءتۇيىپ اۋىرۋى مەن ءىش ءوتۋ/قاتۋعا قاتىستى الاڭداۋشىلىق تا ءجيى كەزدەسەدى.
العاشقى ايلاردا نورما شەگى وتە كەڭ. نەگىزگى باعدار - بالانىڭ جالپى جاعدايى. ەگەر ول بەلسەندى بولسا، جاقسى تاماقتانسا (ەمسە)، سالماق قوسىپ جاتسا جانە ءوزىن جاقسى سەزىنسە - ۋايىمداۋعا نەگىز جوق.
اتا-انالار "ءىش قاتۋ" دەپ قابىلدايتىن جاعدايلاردىڭ كوپشىلىگى - ءسابي ديسحەزياسى. بۇل كەزدە بالا كۇشەنەدى، قىزارادى، دىبىس شىعارادى، ءبىراق ءناجىسى جۇمساق بولادى.
تەك ءناجىس قاتتى، اۋىرسىنۋمەن، قانمەن نەمەسە ءىشتىڭ قاتتى كەبۋىمەن قاتار جۇرسە، ءارى بالا سالماق قوسپاي، تاماقتان باس تارتسا عانا الاڭداۋعا نەگىز بار.
يممۋنيتەت جانە "ءالسىز اعزا" تۋرالى ميفتەر
"ءالسىز يممۋنيتەت" - اتا-انالاردىڭ ايتاتىن ەڭ سۇيىكتى دياگنوزى. بالا بىر-ەكى رەت جرۆي-مەن اۋىرسا بولدى، وعان بىردەن وسى تاڭبا جاپسىرىلادى. ۇيدە شامدار، تامشىلار، يممۋنومودۋلياتورلار پايدا بولادى.
الايدا يممۋنيتەت دارىمەن "ەمدەلمەيدى". ول ۋاقىت وتە كەلە، باسقا بالالارمەن بايلانىس ارقىلى باسقا دا ۆيرۋستارمەن "ۇشىراسا" وتىرىپ، قالىپتاسادى. ەڭ باستىسى، يممۋنيتەت بالانىڭ بويىندا ەرەسەكتەردىڭ سابىرلى رەاكسياسى ارقىلى قالىپتاسادى.
ءومىرىنىڭ ءبىرىنشى جىلىنداعى بالالارعا يممۋنومودۋلياتورلار قاجەت ەمەس. كوپتەگەن پرەپاراتتاردىڭ تيىمدىلىگى دالەلدەنبەگەن، ولار ينفەكسيا جيىلىگىن ازايتپايدى جانە يممۋنيتەتتى كۇشەيتپەيدى.
يممۋنيتەت تۋرالى شىنىمەن ويلانۋ قاجەت بولاتىن جاعدايلار: ينفەكسيالار اۋىر وتسە، اسقىنۋلار بولسا، ءجيى اۋرۋحاناعا جاتقىزىلسا، سالماق قوسپاۋ، سوزىلمالى ديارەيا نەمەسە ساڭىراۋقۇلاق ينفەكسيالارى بايقالسا.
ال اسقىنۋسىز وتەتىن ءجيى جرۆي - دياگنوز ەمەس، نورما.
سيتومەگالوۆيرۋستى قانداي جاعدايدا ەمدەۋدىڭ قاجەتى جوق؟
كەيىنگى جىلدارى انالار ءجيى ايتاتىن تاعى ءبىر "قورقىنىش" - سيتومەگالوۆيرۋس (سمۆ). بۇرىن ول تۋرالى از ايتىلسا، ءقازىر ول مازاسىز اتا-انالار ءۇشىن قورقىنىشتى دياگنوزعا اينالدى. كوبى تالداۋ قورىتىندىلارىمەن كەلىپ، كورسەتكىش بولماسا دا، بالانى ۆيرۋسقا قارسى اۋىر پرەپاراتتارمەن ەمدەۋدى تالاپ ەتەدى.
سمۆ-تى انىقتاۋ وڭاي. بالالار ونى ەرتە جاستا سىلەكەي، ويىنشىقتار، تۇرمىستىق قارىم-قاتىناس ارقىلى جۇقتىرادى. دەنساۋلىعى جاقسى سابيلەردە ول كوبىنە سيمپتومسىز وتەدى.
كوبىنە انىقتالاتىن IgG انتيدەنەلەرى - بۇل بالانىڭ اۋرۋى ەمەس، انادان بەرىلگەن قورعانىس انتيدەنەلەرى.
سمۆ-تى تەك تۋا بىتكەن ينفەكسيا كلينيكالىق بەلگىلەرمەن وتسە نەمەسە يممۋن تاپشىلىعى بار بالالاردا عانا ەمدەۋ قاجەت. قالعان جاعدايلاردا ونى ەمدەۋدىڭ قاجەتى جوق.
ۆاكسيناسيانى نەگە كەيىنگە قالدىرۋعا بولمايدى؟
كەي اتا-انالار ەكپەدەن اۋرۋدان دا قاتتى قورقادى. بۇل - ەڭ وكىنىشتى قاتەلىكتەردىڭ ءبىرى.
"ول ءالى كىشكەنتاي، اعزاسىنا اۋىرلىق تۇسەدى" دەگەن ۋاجدەردى ءجيى ەستىپ جاتامىز دەيدى دارىگەر.
ناتيجەسىندە بالا ەڭ قاجەت كەزىندە قورعانىسسىز قالادى. ۆاكسيناسيا ءۇشىن ءمىنسىز ۋاقىت بولمايدى. ءارقاشان كەيىنگە قالدىرۋعا سەبەپ تابىلادى.
سوندىقتان، ماماننىڭ سوزىنشە، مەديسينالىق قارسى كورسەتىلىم بولماسا، ەكپەنى ۋاقىتىندا العان دۇرىس.
بالالار دارىگەرىنىڭ سوزىنشە، ءبىر عانا قاراپايىم شىندىق بار: سابيگە كوپ ءدارى، شەكسىز تەكسەرۋ نەمەسە ستەريلدى ورتا قاجەت ەمەس.
باستىسى، سابىرلى، سانالى اتا-انا، ۋاقىتىندا سالىنعان ەكپە قاجەت.