مالايزيا – قازاقستاننىڭ وڭتۇستىك-شىعىس ازياداعى نەگىزگى سەرىكتەستەرىنىڭ ءبىرى.
مالايزيا تابيعي اپات كەزىندە جانە ودان كەيىن مەملەكەتتىك قىزمەتشىلەردىڭ ءىس-قيمىل الگوريتمدەرىن جەتىلدىرۋ ءۇشىن قازاقستانمەن تاجىريبە الماسۋعا دايىن، دەپ حابارلايدى Almaty-akshamy.kz
بۇل تۋرالى مالايزيا پارلامەنتى سەناتى ءتوراعاسىنىڭ مىندەتىن اتقارۋشى نۋر دجازلان موحامەد قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا وتكەن كەزدەسۋدە مالىمدەدى.
مالايزيا – قازاقستاننىڭ وڭتۇستىك-شىعىس ازياداعى نەگىزگى سەرىكتەستەرىنىڭ ءبىرى. مالايزيادا مۋسسوندىق جاڭبىرلار مەن سۋ تاسقىنى ءجيى بولىپ تۇرادى. مالايزيا سەناتى باسشىسىنىڭ م.ا. اكادەميا قىزمەتكەرلەرىمەن جانە تىڭداۋشىلارىمەن كەزدەسۋدە سۋ تاسقىنىمەن كۇرەسۋ بويىنشا مەملەكەتتىك قىزمەتكەرلەر اراسىندا تاجىريبە الماسۋعا دايىن ەكەنىن اتاپ ءوتتى.
«سۋ تاسقىنىن باسقارۋ – وتە ماڭىزدى ءىس. قازاقستان مۇنداي اۋقىمدى سۋ تاسقىنىن كۇتپەگەنىن تۇسىنەمىز، ءبىراق الەمدە كليماتتىق وزگەرىستەرگە بايلانىستى نوسەر جاڭبىردان تۋىنداعان سۋ تاسقىنى الداعى ۋاقىتتا دا بولۋ ىقتيمالدىعى جوعارى. سوندىقتان مالايزيا تابيعي اپات كەزىندە جانە ودان كەيىن مەملەكەتتىك قىزمەتشىلەردىڭ ءىس-قيمىل الگوريتمدەرىن جەتىلدىرۋ ءۇشىن قازاقستانمەن تاجىريبە الماسۋعا دايىن. مالايزيا مەملەكەتتىك باسقارۋ اكادەمياسى تاراپىنان ءبىز مەملەكەتتىك قىزمەتشىلەردىڭ بىلىكتىلىگى مەن كوممۋنيكاتيۆتىك داعدىلارىن ارتتىرۋ بويىنشا وقىتۋ كۋرستارىن ۇيىمداستىرۋعا ءازىرمىز. داعدارىس كەزىندە جۇمىس ىستەيتىن ماماندار بىلىكتى بولۋى كەرەك جانە حالىقتىڭ مۇڭ-مۇقتاجىن تۇسىنە الۋى كەرەك»، – دەدى نۇر دجازلان موحامەد.
سونداي-اق سپيكەر مەملەكەتتىك قىزمەتشىلەر جۇمىسىنىڭ تيىمدىلىگىن ارتتىرۋ، مەملەكەتتىك باسقارۋدى سيفرلاندىرۋ جانە مەملەكەتتىك سەكتور جۇمىسىندا جاساندى ينتەللەكتتى پايدالانۋدىڭ ارتىقشىلىقتارىمەن ءبولىستى.
اكادەميا رەكتورى ەرلان ءابىل نۇر دجازلان موحامەدكە العىسىن ءبىلدىرىپ، مالايزيانىڭ مەملەكەتتىك باسقارۋ اكادەمياسىمەن ارىپتەستىك قارىم-قاتىناس ورناتۋعا دايىن ەكەنىن اتاپ ءوتتى. كەزدەسۋ سوڭىندا اكادەميا تىڭداۋشىلارى مەن قىزمەتكەرلەرى سۇراقتارىنا جاۋاپ الدى.