مال ءجۇنىن ءۇيدى جىلىتۋدا پايدالانۋعا بولادى

ناقتىراق ايتقاندا، مال جۇنىنەن ءۇيدى جىلىتۋعا ارنالعان ماتەريال شىعارۋ جوسپارلانۋدا.

اقتوبەدە قويدىڭ ءجۇنىن پايدالانۋدىڭ جاڭا ءتاسىلى ويلاپ تابىلدى. شيكىزات يتاليا تەحنولوگياسى بويىنشا وڭدەلەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

بىرەگەي ءوندىرىس شەتەلدىك ينۆەستورلاردىڭ قولداۋىمەن جۇزەگە اسىرىلماق. جوبا قۇنى - شامامەن 10 ملن دوللار.

 «مەملەكەت تاراپىنان، ارينە، قولداۋ بار. ماسەلە مىنادا - بىزدە ءجۇننىڭ باستاپقى وڭدەلۋى اۋىل شارۋاشىلىعى مينيسترلىگىنە قارايدى، ال ونىڭ كەيىنگى وڭدەۋ جۇمىستارى، وڭدەۋ ونەركاسىبى يندۋستريا جانە ينفراقۇرىلىمدىق دامۋ مينيسترلىگىنىڭ قاراۋىندا. ولاردىڭ بىزگە ۇسىناتىن سۋبديكسيالانعان نەسيە بەرەتىن مەملەكەتتىك قولداۋ باعدارلامالارى بار»، - دەيدى كاسىپورىن ديرەكتورى ەرلان جاڭابەرگەنوۆ. 

ءوڭىردىڭ بارلىق اۋداندارىندا قوي ءجۇنىن جيناۋ پۋنكتتەرى اشىلادى. ساراپشىلاردىڭ ايتۋىنشا، جوبانى ىسكە اسىرۋ ۇلكەن اسەرىن تيگىزۋدە، مىسالى، وتاندىق فەرمەرلەر ءوز شيكىزاتتارىن وتكىزە الادى. جىل سايىن ايماقتا ءۇش جارىم مىڭ تونناعا دەيىن قوي ءجۇنى جينالادى. سونداي-اق، جانۋارلاردىڭ تەرىسى دە وڭدەلەدى، ولاردان جەلاتين ءونىمىن شىعارۋ جوسپارلانىپ وتىر.

دايىن ءونىمنىڭ ءبىرىنشى پارتياسىن كەلەسى جىلى الۋ جوسپارلانۋدا. جاڭا ءوندىرىستىڭ ىسكە قوسىلۋىنا بايلانىستى تۇراقتى جۇمىس ورىندارى پايدا بولىپ، اۋدانداردا ءجۇندى وڭدەپ شىعاراتىن ورتالىقتار اشىلادى.