ەلىمىزدە باسپاناعا مۇقتاج ازاماتتاردىڭ ماسەلەسىن 2026 جىلعا دەيىن قاراستىرىلعان تۇرعىن ۇي-كوممۋنالدى ينفراقۇرىلىمدى دامىتۋدىڭ تۇجىرىمداماسى اياسىندا رەتتەۋ كوزدەلىپ وتىر. بۇل تۋرالى ق ر پارلامەنت ماجىلىسىندە وتكىزىلگەن دوڭگەلەك ۇستەلدە ق ر ييدم قۇرىلىس جانە تكش ىستەرى كوميتەتى ءتوراعاسىنىڭ ورىنباسارى باۋىرجان قابدول ايتتى، دەپ حابارلايدى almaty-akshamy.kz
«قازاقستاننىڭ حالىق پارتياسى» فراكسياسى ۇيىمداستىرعان ءىس-شاراعا ءماجىلىس دەپۋتاتتارى، ۇلتتىق ەكونوميكا جانە قارجى مينيسترلىكتەرىنىڭ، ستراتەگيالىق جوسپارلاۋ جانە رەفورمالار اگەنتتىگىنىڭ، سىبايلاس جەمقورلىققا قارسى ءىس-قيمىل اگەنتتىگىنىڭ، قارجى نارىعىن رەتتەۋ جانە دامىتۋ اگەنتتىگىنىڭ، سونداي-اق «وتباسى بانك» اق مەن «قازاقستاندىق تۇرعىن ءۇي كومپانياسى» اق وكىلدەرى قاتىستى.
ب.قابدول ايتقانداي، قازاقستاندا باسپانا كەزەگىندە تۇرعانداردىڭ ماسەلەسىن 2026 جىلعا دەيىنگى تۇرعىن ۇي-كوممۋنالدى ينفراقۇرىلىمدى دامىتۋدىڭ تۇجىرىمداماسى اياسىندا شەشۋ كوزدەلگەن. سوعان سايكەس رەسپۋبليكالىق جانە جەرگىلىكتى بيۋدجەت ارقىلى حالىقتىڭ الەۋمەتتىك وسال توپتارىنا (ساتىپ الۋ قۇقىعىنسىز) جالعا بەرىلەتىن تۇرعىن ءۇيدى سالۋ نەمەسە ساتىپ الۋ قاراستىرىلادى. بيىل 10 مىڭنان اسا پاتەردى ساتىپ الۋ جوسپارلانعان. بۇعان قوسا كىرىس كولەمىنە بايلانىستى كەزەكتە تۇرعانداردىڭ ساناتتارىنا وراي «وتباسى بانكى» ارقىلى 2-5% مولشەرلەمەسى بويىنشا كرەديتتىك باسپانانى سالىپ، جەڭىلدىكپەن نەسيەلەۋ كوزدەلگەن. 2023 جىلى 14 مىڭداي كرەديتتىك پاتەردىڭ قۇرىلىسىنا 158،5 ملرد تەڭگە جۇمسالماق. ال «وتباسى بانكى» ارقىلى كەزەكتە تۇرعاندارعا جەڭىلدەتىلگەن زايىم بەرۋ ءۇشىن بيىل 6،8 مىڭ پاتەر ساتىپ الۋ كوزدەلگەن. سونىمەن قاتار جەكە تۇرعىن ءۇي قورىنداعى پاتەردىڭ جالداۋ اقىسىن سۋبسيديالاۋ (كوپ بالالى وتباسىلار، جەتىم بالالار، 1-2 توپتاعى مۇگەدەكتىگى بار ادامدار، سىرقاتى بار بالالاردى تاربيەلەپ وتىرعان، وتباسىنىڭ ءبىر مۇشەسىنە شاققاندا كۇنكورىس دەڭگەيىنەن تومەن تابىسى بار وتباسىلار) جولعا قويىلعانىن ايتا كەتەيىك.
حالىقتىڭ تولەم قابىلەتىنە بايلانىستى سۇرانىستى قاناعاتتاندىرۋ ءۇشىن ءتيىمدى يپوتەكالىق باعدارلامالارعا (ق ر ۇلتتىق بانكى بەكىتكەن يپوتەكالىق باعدارلامالار جانە «2-10-20»، «5-10-20» جەڭىلدەتىلگەن كرەديت) سايكەس باستاپقى جارنانىڭ ءبىر بولىگىن جەرگىلىكتى اتقارۋشى ورگاندار الەۋمەتتىك كومەك رەتىندە نەمەسە بيۋدجەتتىك كرەديت تۇرىندە تۇرعىن ءۇي سەرتيفيكاتىمەن وتەۋى مۇمكىن.
بۇدان باسقا قۇرىلىس جانە تكش ىستەرى كوميتەتى ءتوراعاسىنىڭ ورىنباسارى كوپپاتەرلى تۇرعىن ءۇي قۇرىلىسىنا ارنالعان تەتىكتەر تۋرالى ايتىپ بەردى.
«تۇرعىن ءۇي-قۇرىلىس كووپەراتيۆىنە كوپپاتەرلى باسپانانىڭ قۇرىلىسىنا بايلانىستى جەر ۋچاسكەسى بەرىلىپ، قۇرىلىس ۇيىمىمەن ءتيىستى كەلىسىمشارت جاسالادى. سودان كەيىن قاجەتتى جۇمىستار اياقتالعان بويدا سالىنعان تۇرعىن ءۇيدى قابىلداۋعا قاتىسادى»، دەدى ب.قابدول.
بۇل ورايدا مينيسترلىك تۇرعىن ءۇي-قۇرىلىس كووپەراتيۆىنىڭ قىزمەتىن رەتتەۋ ماقساتىندا 2019 جىلى «تۇرعىن ءۇي قاتىناستارى تۋرالى» زاڭىنا ءتيىستى تۇزەتۋلەر ەنگىزدى. سوعان سايكەس ازاماتتار كوپپاتەرلى تۇرعىن ءۇيدىڭ قۇرىلىسىن اتالعان تەتىك ارقىلى جۇزەگە اسىرۋعا مۇمكىندىك الىپ وتىر.
ءوز كەزەگىندە تۇرعىن ءۇي-قۇرىلىس كووپەراتيۆىنە قاتىسۋ كەلىسىمشارتتارىن تىركەۋدى وسى باسقارمانىڭ (ءتوراعاسىنىڭ) ۇسىنىسى بويىنشا بەلگىلى ءبىر وڭىردەگى ساۋلەت، قالا قۇرىلىسى جانە قۇرىلىس قىزمەتىنە جاۋاپتى جەرگىلىكتى اتقارۋشى ورگاندار جۇزەگە اسىراتىنىن اتاپ وتكەن ءجون. بۇل قولعا الىنعان امالدىڭ ناتيجەسىندە مەردىگەر كومپانيالاردىڭ الىپساتارلىق ارەكەتتەرى تىيىلادى دەپ كوزدەلگەن.