ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ كەڭەيتىلگەن تاقىرىپتىق وتىرىس ءوتتى، دەپ حابارلايدى ءماجىلىستىڭ باسپا ءسوز قىزمەتى.
جيىننىڭ باستى ماقساتى – وتاندىق گاز سالاسىنىڭ جاعدايىن تالقىلاۋ، مەملەكەت باسشىسى ق.ك. توقايەۆتىڭ VIII شاقىرىلىمنىڭ ءبىرىنشى سەسسياسىنىڭ اشىلۋىندا بەرگەن تاپسىرماسىن جۇزەگە اسىرۋ.
ءىس-شاراعا ءماجىلىس دەپۋتاتتارىمەن قاتار ەنەرگەتيكا مينيسترلىگىنىڭ جانە «QazaqGaz» ۇلتتىق كومپانياسىنىڭ باسشىلارى قاتىستى.
وتىرىستى اشقان كوميتەت ءتوراعاسى ەدىل جاڭبىرشين دەپۋتاتتاردى مينيسترلىكتىڭ جانە «QazaqGaz» ۇلتتىق كومپانياسىنىڭ وتكەن كەزەڭدەگى قىزمەتىنىڭ قورىتىندىلارىمەن تانىستىرىپ قانا قويماي، ودان ءارى دامۋدى تالاپ ەتەتىن ماسەلەلەردى قاراستىرۋ ەكەنىن ايتتى.
ەنەرگەتيكا ءمينيسترى الماسادام ساتقالييەۆ وتكەن جىلى گاز سالاسىندا رەفورما جۇرگىزىلگەنىن بايانداپ، جەر قويناۋىن پايدالانۋ سالاسىندا جاقسارتىلعان مودەلدىك كەلىسىمشارت قابىلدانعانىن ايتتى.
قابىلدانعان رەفورمالار گازدىڭ رەسۋرستىق بازاسىن ۇلعايتۋعا جانە گاز سالاسىنا ينۆەستيسيالار تارتۋعا باعىتتالعان. ناتيجەسىندە ءبىز 2029 جىلعا قاراي شامامەن ون ميلليارد تەكشە مەتر گازدىڭ قوسىمشا ءوسىمىن كۇتەمىز، – دەدى مينيستر.
سونىمەن قاتار ا. ساتقالييەۆ بۇگىنگى تاڭدا QazaqGaz قاشاعان كەن ورنىندا قۋاتى جىلىنا ءبىر ميلليارد تەكشە مەتر بولاتىن گاز وڭدەۋ زاۋىتىن سالىپ جاتقانىن، سونداي-اق، مەملەكەت باسشىسىنىڭ تاپسىرماسى بويىنشا ماڭعىستاۋ وبلىسىنىڭ جاڭاوزەن قالاسىنداعى «قازاق گاز وڭدەۋ» زاۋىتىنىڭ بازاسىندا جاڭا گاز وڭدەۋ زاۋىتىن سالۋ تۋرالى شەشىم قابىلدانعانىن ايتتى. زاۋىتتار جوسپار بويىنشا 2025 جىلى پايدالانۋعا بەرىلەدى.
ءمينيستردىڭ ايتۋىنشا، جالپى گاز سالاسىنىڭ ينۆەستيسيالىق تارتىمدىلىعىن ارتتىرۋ جانە ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ماقساتىندا ەنەرگەتيكا مينيسترلىگى وسى جىلى ۇلتتىق ەكونوميكا مينيسترلىگىمەن كەلىسىم بويىنشا گازعا كوتەرمە باعانى 5 جىل ىشىندە كەزەڭ-كەزەڭىمەن ۇلعايتۋدى جوسپارلاپ وتىر.
2023 جىلعى 1 شىلدەدەن باستاپ 2024 جىلعى 30 ماۋسىمعا دەيىن حالىق ءۇشىن گازدىڭ بولشەك باعاسىنىڭ ءوسۋى ەل بويىنشا 1-3 تەڭگەنى قۇرايدى، ال ءىرى كوممەرسيالىق تۇتىنۋشىلار مەن سيفرلىق ماينينگتى جۇزەگە اسىراتىن تۇلعالار ءۇشىن گازدىڭ ورتاشا بولشەك باعاسى ءبىر تەكشە مەتر ءۇشىن 33 تەڭگەنى قۇرايدى، – دەدى مينيستر.
ال بولشەك ساۋدا باعالارىن 1 ليتر ءۇشىن 50-70 تەڭگەگە مەملەكەتتىك رەتتەۋ ناتيجەسىندە وتكەن جىلى سۇيىتىلعان مۇناي گازىن ىشكى تۇتىنۋ 2021 جىلمەن سالىستىرعاندا 400 مىڭ تونناعا نەمەسە 28 پايىزعا وسكەن.
ودان ءارى «QazaqGaz»ۇك» باسقارما ءتوراعاسى سانجار جاركەشوۆ گاز سالاسىنداعى جاعداي تۋرالى بايانداما جاسادى.
وتكەن جىلى ەلىمىزدە گاز تۇتىنۋدىڭ ەڭ جوعارى دەڭگەيى تىركەلدى. بولجام بويىنشا 2030 جىلعا قاراي تاۋارلىق گازدىڭ بولجامدى تۇتىنىلۋى 44 ملرد تەكشە مەترگە جەتۋى مۇمكىن، ال رەسۋرستىق بازا بار بولعانى 35 ملرد تەكشە مەتر بولادى. وسى ورايدا گاز سالاسىنا جۇيەلى رەفورمالار قاجەت، – دەدى باسقارما ءتوراعاسى.
وتىرىس بارىسىندا دۇيسەنباي تۇرعانوۆ، سامات مۇسابايەۆ، اجار ساعىندىقوۆا، باۋىرجان سماعۇلوۆ، ارمان قالىقوۆ، ەربولات ساتىبالدين، ايان زەينۋللين ءتيىستى ورگان باسشىلارىنا گاز سالاسىندا قوردالانعان ماسەلەلەرگە قاتىستى سۇراقتارىن قويدى.
جيىندى قورىتىندىلاعان ەدىل جاڭبىرشين تاۋارلىق جانە سۇيىتىلعان گازدىڭ رەسۋرستارىن ۇلعايتۋ، ەلدى گازبەن قامتاماسىز ەتۋ، گاز سالاسىنداعى ينۆەستيسيالىق تارتىمدىلىقتى ارتتىرۋ، الاۋلاردا ىلەسپە گازدى جاعۋدى جانە كەرى ايداۋدى قىسقارتۋعا ىنتالاندىرۋشى تاسىلدەر كەشەنىن ازىرلەۋ قاجەت ەكەنىن اتاپ ءوتىپ، مەملەكەتتىڭ ەنەرگەتيكالىق قاۋىپسىزدىگىن قامتاماسىز ەتۋ ەڭ باستى مىندەت ەكەنىن ايتتى.