پارلامەنت ءماجىلىسىنىڭ جالپى وتىرىسىندا «2022 – 2024 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسى ماقۇلداندى، دەپ حابارلايدى almaty-akshamy.kz قازاقپاراتقا سىلتەمە جاساپ.
«ءۇش جىلعا ارنالعان رەسپۋبليكالىق بيۋدجەت جوباسى مەملەكەت باسشىسىنىڭ تاپسىرمالارىن جانە Nur Otan پارتياسىنىڭ سايلاۋالدى باعدارلاماسىنىڭ بارلىق مىندەتتەمەلەرىن قامتيدى. بيۋدجەت جوباسىن قاراۋ بارىسىندا ونىڭ باعىتتارى ەگجەي-تەگجەيلى تالقىلاندى، سوندىقتان نەگىزگى پارامەترلەرىنە قىسقاشا توقتالىپ وتەيىن. رەسپۋبليكالىق بيۋدجەت تۇسىمدەرى بيىلدىڭ جوسپارىنا قاراعاندا 432 ملرد تەڭگەگە ۇلعايا وتىرىپ، 2022 جىلعا 13 ترلن تەڭگە كولەمىندە بولجانىپ وتىر. رەسپۋبليكالىق بيۋدجەتكە تۇسەتىن مۇناي تۇسىمدەرىنىڭ ۇلەسى بىرتىندەپ ازاياتىن بولادى. ماسەلەن، اعىمداعى جىلعى 43،6%-دان 2024 جىلعا قاراي ول 28،6%-عا دەيىن تومەندەيدى»، - دەدى ق ر قارجى ءمينيسترى ەرۇلان جاماۋبايەۆ.
ونىڭ ايتۋىنشا، ۇلتتىق قوردان بەرىلەتىن كەپىلدەندىرىلگەن ترانسفەرت 2022 جىلى اعىمداعى جىلمەن سالىستىرعاندا 300 ملرد تەڭگەگە، ال 2023 جانە 2024 جىلدارى تاعى 200 ملرد تەڭگەگە ازايا وتىرىپ، جوسپارلانعان. كەلەسى جىلعا ۇلتتىق قوردان بەرىلەتىن نىسانالى ترانسفەرت 550 ملرد. تەڭگە جانە 2023-2024 جىلدارعا 400 ملرد تەڭگە مولشەرىندە ايقىندالدى.
«مۇنايعا قاتىستى ەمەس تۇسىمدەردىڭ ۇلەسى بيىلعى 56،4%-تەن 2024 جىلعا قاراي 71،4%-كە دەيىن وسەدى دەپ بولجانعان. بيۋدجەت تاپشىلىعى 2022 جىلى جالپى ىشكى ونىمگە 3،3%-دان 2024 جىلى 2،5%-عا دەيىن كەزەڭ-كەزەڭمەن تومەندەۋمەن جوسپارلانىپ وتىر»، - دەدى مينيستر.
ونىڭ سوزىنە قاراعاندا، شىعىستار كەلەسى جىلى 15،9 ترلن تەڭگەنى قۇرايدى. بيۋدجەتتىڭ الەۋمەتتىك باعىتى ساقتالدى. ءۇش جىلدىق كەزەڭدە الەۋمەتتىك سالا شىعىستارى 26،7 ترلن تەڭگە بولادى. ونىڭ ىشىندە 2022 جىلى بيىلدىڭ دەڭگەيىنە قاراعاندا 643،2 ملرد تەڭگەگە ۇلعايا وتىرىپ، 8،1 ترلن تەڭگەنى قۇرايدى.
«بيۋدجەتتىڭ جالپى كولەمىندەگى بۇل شىعىستارىنىڭ ۇلەسى ەندىگى جىلى 50،8%-عا دەيىن وسەدى. شىعىستار كولەمىنىڭ كوپ بولىگى ازاماتتاردى الەۋمەتتىك قامسىزداندىرۋ مەن ولارعا كومەك كورسەتۋگە باعىتتالعان. دەنساۋلىق ساقتاۋ جۇيەسىن دامىتۋعا ارنالعان شىعىستار 2022-2024 جىلدارى 5،7 ترلن تەڭگەنى، ونىڭ ىشىندە 2022 جىلعا 1،8 ترلن تەڭگەنى قۇرايدى. وسى قاراجات اياسىندا مەديسينا قىزمەتكەرلەرىنىڭ ەڭبەكاقىسىن ۇلعايتۋ كوزدەلگەن»، - دەدى ءا. ەرعالييەۆ.
ونىڭ سوزىنە قاراعاندا، ءبىلىم جانە عىلىم جۇيەسىن دامىتۋعا 3 جىلعا 7 ترلن تەڭگە، ونىڭ ىشىندە 2022 جىلعا 1،8 ترلن تەڭگە كوزدەلگەن. بۇل بيىل بولىنگەن قاراجاتتان 477،1 ملرد تەڭگەگە ارتىق.
«ەكونوميكانىڭ ناقتى سەكتورىن قولداۋعا جانە دامىتۋعا ارنالعان شىعىستار ورتا مەرزىمدى كەزەڭدە 3،6 ترلن تەڭگەنى، ونىڭ ىشىندە 2022 جىلعا 2 ترلن تەڭگەنى قۇرايدى. وسى باعىت اياسىندا بارلىق مەملەكەتتىك باعدارلامالاردى ىسكە اسىرۋعا شىعىستار كوزدەلگەن. ولار بىرتىندەپ ۇلتتىق جوبالارعا ۇلاساتىن بولادى»، - دەدى مينيستر.
زاڭ جوباسىن تالقىلاۋ بارىسىندا ءبىرقاتار تۇزەتۋلەر ەنگىزىلدى. تۇزەتۋلەردىڭ ءبىرىنشى بلوگى مەملەكەت باسشىسىنىڭ بيىلعى 1 قىركۇيەكتەگى جولداۋىن قارجىلىق قامتاماسىز ەتۋگە باعىتتالعان. ماسەلەن، 2022 جىلعا ازاماتتىق قىزمەتشىلەردىڭ جەكەلەگەن ساناتتارىنىڭ ەڭبەكاقىلارىن كوتەرۋگە 143،4 ملرد تەڭگە سوماسىندا قاراجات كوزدەلگەن. تۇزەتۋلەردىڭ ەكىنشى بلوگى دەپۋتاتتاردىڭ باستاماشىلىعى بويىنشا حالىقتىڭ ءومىر ءسۇرۋ ساپاسىن ارتتىرۋعا جانە وڭىرلەردى دامىتۋعا باعىتتالعان.
بۇدان بۇرىن حابارلانعانداي، ۇلتتىق بانك ءتوراعاسى ەربولات دوسايەۆ ەلىمىزدە ينفلياسيانىڭ ءوسۋىنىڭ نەگىزگى سەبەپتەرىن ايتتى. ءماجىلىستىڭ جالپى وتىرىسىندا ق ر ۇلتتىق ەكونوميكا ءمينيسترى اسەت ەرعالييەۆ 2022 جىلى بيۋدجەت تاپشىلىعى جالپى ىشكى ونىمگە قاتىستى 3،3% دەڭگەيىندە بولجانىپ وتىرعانىن ايتتى.
مينيستر 2022 جىلى تاۋارلار ەكسپورتى 60،1 ميلليارد دوللار دەڭگەيىندە بولجانىپ وتىرعانىن جانە 2026 جىلعا دەيىن 79،8 ميلليارد دوللارعا دەيىن ۇلعاياتىنىن جەتكىزدى. تاۋارلار يمپورتى 2022 جىلى 40،8 ميلليارد دوللاردان 2026 جىلى 43،4 ميلليارد دوللارعا دەيىن ۇلعايادى.