پارلامەنت ءماجىلىسىنىڭ دەپۋتاتى ءمادي احمەتوۆ قازاقستان رەسپۋبليكاسى ءىىم م.ەسبولاتوۆ اتىنداعى الماتى اكادەمياسىنىڭ پروفەسسورلىق-وقىتۋشىلار قۇرامىمەن جانە تىڭداۋشىلارمەن كەزدەسىپ، وقۋ ورنىنىڭ تىنىس-تىرشىلىگىمەن تانىستى.
اكادەميا باسشىسىنىڭ ورىنباسارى س.كەنەنبايەۆ ءماجىلىس دەپۋتاتىنا جاڭارتىلعان وقۋ كابينەتتەرىن، كومپيۋتەرلىك سىنىپتاردى، اكت زالىن كورسەتىپ، تاجىريبەلىك-باعدارلى وقىتۋ باعدارلامالارىن ەنگىزۋ جونىندەگى جۇمىستارمەن تانىستىردى. سونداي-اق، ول ءبىلىم ورداسىنداعى كيبەرورتالىقتىقتىڭ جۇمىسىمەن جانە گەنەرال رۇستەم قايداروۆ اتىنداعى كابينەتپەن تانىسىپ، حالىق قاھارمانى عازيز بايتاسوۆتىڭ تاقتاسىنا گۇل شوعىن قويدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
دەپۋتات م.احمەتوۆ اكادەميا كۋرسانتتارى مەن تىڭداۋشىلارى تۇراتىن كازارماعا دا كەلىپ، ولاردىڭ تۇرمىستىق جاعدايىمەن تانىستى. كۋرسانتتاردىڭ ومىرىمەن تانىستىرۋ پەتانك ويناۋعا ارنالعان اشىق الاڭ مەن دەمالىس اللەياسىندا جالعاستى. اكادەميا كلۋبىندا جەكە قۇراممەن كەزدەسۋدە تۇيتكىلدى ماسەلەلەردى شەشۋگە قاتىستى پىكىر الماسۋعا باسا نازار اۋدارىلدى. قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ءمادي احمەتوۆ ءوز سوزىندە الماتىداعى قاڭتار وقيعاسى كەزىندەگى لاڭكەستىك ارەكەتتەردى توقتاتۋعا اتسالىسقان ۇجىمعا العىس ايتىپ، وقۋ ورنىنىڭ كيبەرقاۋىپسىزدىك سالاسىنداعى ماماندار مەن ىشكى ىستەر مينيسترلىگىنىڭ جوعارى باسشى كادرلارىن دايارلاۋ جۇمىسىنىڭ ماڭىزدىلىعىن اتاپ ءوتتى.
سونداي-اق، م.احمەتوۆ مەملەكەت باسشىسى العا قويعان مىندەتتەر تۇرعىسىندا سايلانبالى ورگاننىڭ قىزمەتى، زاڭ شىعارۋ باستامالارى، الەۋمەتتىك كودەكستى ازىرلەۋ جانە باسقا دا باسىم ماسەلەلەر تۋرالى حاباردار ەتتى.
ەلىمىزدىڭ قۇقىق قورعاۋ جۇيەسىندە جۇرگىزىلىپ جاتقان رەفورماعا، سىبايلاس جەمقورلىققا قارسى كۇرەسكە، قىزمەت كورسەتۋدىڭ جاڭا ۇلگىسى اياسىندا ىشكى ىستەر ورگاندارىن جاڭعىرتۋعا قاتىستى ماسەلەلەر تۋرالى ويىن ورتاعا سالدى. كەزدەسۋگە قاتىسۋشىلار اكادەميا قىزمەتكەرلەرى ءۇشىن ءتيىمدى الەۋمەتتىك پاكەت قۇرۋعا، ياعني تۇرعىن ءۇي جالداۋ وتەماقىسىن تولەۋگە، جالپى، ولاردىڭ ەڭبەگىن ماتەريالدىق ىنتالاندىرۋعا قاتىستى تۇيتكىلدى ماسەلەلەردى تالقىلادى.
جەكە قۇرامنىڭ بارلىق وتىنىشتەرىن تىڭداعان ءماجىلىس دەپۋتاتى اكادەميانىڭ ماتەريالدىق-تەحنيكالىق بازاسىن جاقسارتۋدىڭ ناقتى ماسەلەلەرىن شەشۋگە ىقپال ەتۋگە، ونىڭ ىشىندە الەۋمەتتىك بلوك پەن جابدىققا قاتىستى ەڭ وزەكتىلەرىن باقىلاۋعا الۋعا ۋادە بەردى.