ءماجىلىس دەپۋتاتتارى قاينار اباسوۆ، بەرىك بەكجانوۆ، سىرىم ەرتايەۆ جانە عاني تاشقارايەۆ تۇركىستان وبلىسىنداعى سۋ العان ەلدىمەكەندەرگە باردى، دەپ حابارلايدى Almaty-akshamy.kz ءماجىلىستىڭ باسپا ءسوز قىزمەتىنە سىلتەمە جاساپ.
اتاپ ايتقاندا، ماقتاارال اۋدانىندا نوسەر جاۋىننىڭ سالدارىنان اۋداننىڭ 16 ەلدىمەكەندە سۋ دەڭگەيى كوتەرىلگەن. «قازگيدرومەت» مالىمەتىنشە، 11-18 ناۋرىز ارالىعىندا جاۋىن-شاشىننىڭ مولشەرى 87،7 مم بولدى، ال ورتاشا ايلىق نورماسى 51 مم قۇرايدى. وسىنىڭ سالدارىنان سىرداريا وزەنىنىڭ، جەر استى سۋ دەڭگەيى كوتەرىلگەن. تۇركىستان وبلىسى توتەنشە جاعدايلار دەپارتامەنتى باسشىسىنىڭ ايتۋىنشا، سىرداريا وزەنىنىڭ دەڭگەيى سوڭعى اپتادا ءۇش ەسەدەن اسقان. شاردارا سۋ قويماسىندا 5 ملرد. م3 سۋ جينالىپ، سىرداريا وزەنىنىڭ ارناسىمەن قىزىلوردا وبلىسىنىڭ جانە «كوكساراي» كونتررەگۋلياتورىنا سۋ اعىزىلۋدا. توتەنشە جاعدايلار مەن جەرگىلىكتى اتقارۋشى ورگاندار وكىلدەرىنىڭ بىرلەسكەن ارەكەتىنىڭ ناتيجەسىندە سۋ تاسقىنىنىڭ سالدارىن الدىن الدى.
دەپۋتاتتار ساپار بارىسىندا درەناجدىق كوللەكتوردىڭ، سۋ تاسقىنىنىڭ زارداپتارىن جويۋ جۇمىستارىمەن تانىستىپ، اپات سالدارىن جويۋ جونىندەگى اۋداندىق شتابتىڭ جۇمىسىنا قاتىسىپ، ولاردىڭ ۇسىنىس-پىكىرلەرىن تىڭدادى.
قاينار اباسوۆتىڭ ايتۋىنشا، وڭىردە كوتەرىلگەن نەگىزگى ماسەلەلەر – تىك درەناجداردىڭ تاپشىلىعى جانە جەر استى سۋلارىن اعىزۋعا ارنالعان كولدەنەڭ درەناجداردىڭ ناشار جاعدايىنا بايلانىستى جەر استى سۋلارىنىڭ جوعارى دەڭگەيى. سونداي-اق «قازۆودحوز» فيليالىندا تىك درەناجداردى كۇتىپ ۇستاۋعا جانە جوندەۋگە قاراجاتتىڭ جوقتىعى. مەكەمەنىڭ ەلەكتر قۋاتىنىڭ قارجىسىن تولەۋگە مۇمكىندىكتەرى جوق. سۋ تاسقىنىنان بولعان زالالدى جويۋ جۇمىستارى جەرگىلىكتى بيۋدجەت ەسەبىنەن قارجىلاندىرىپ، كوممەرسيالىق كاسىپكەرلىك نىساندارىن قالپىنا كەلتىرۋگە قارجى قاراستىرىلماعان.
ءوز كەزەگىندە، دەپۋتاتتار اتالعان ماسەلەلەردى ەرەكشە باقىلاۋعا الىپ، پارلامەنتتە تالقىلايتىندارىن ايتتى.