ءماجىلىس 2025 جىلدىڭ قورىتىندى جالپى وتىرىسىن وتكىزدى، دەپ حابارلايدى aqshamnews.kz
"بۇگىن ءبىز 2025 جىلدىڭ قورىتىندى جالپى وتىرىسىن وتكىزدىك. بۇل جىل ساياسي جاعىنان دا، زاڭنامالىق تۇرعىدان دا وقيعالارعا تولى بولدى. جىل باسىندا ەل دامۋىنىڭ ستراتەگيالىق باعىتىن ايقىنداعان، اۋقىمدى ساياسي رەفورمالاردىڭ نەگىزىن قالاعان ماڭىزدى قۇجات – مەملەكەت باسشىسىنىڭ تاريحي جولداۋىنىڭ ءۇش جىلدىعى اتاپ ءوتىلدى. وسى ايتۋلى وقيعاعا وراي ءبىز ارنايى ءبىر پلەنارلىق وتىرىس وتكىزدىك. جيىن قورىتىندىسى بويىنشا، ەلىمىزدىڭ بارلىق ازاماتىن ورتاق ماقساتىمىز – ادىلەتتى قازاقستان قۇرۋ جولىندا توپتاسۋعا شاقىراتىن قارار قابىلداندى"، – دەدى ءماجىلىس ءتوراعاسى ەرلان قوشانوۆ.
بيىلعى جىل ەلدىگىمىز ءۇشىن ماڭىزى زور مەرەيتويلارعا تولى بولدى.
"قازاقستان رەسپۋبليكاسى كونستيتۋسياسىنىڭ 30 جىلدىعىن اتاپ وتتىك. ول – تاۋەلسىزدىك پەن قۇقىقتىق ءتارتىپتىڭ ىرگەتاسىنا اينالعان نەگىزگى زاڭىمىز. مەملەكەت باسشىسىنىڭ تاپسىرماسى بويىنشا دەپۋتاتتاردىڭ باستاماشىلىعىمەن كونستيتۋسيانىڭ 30 جىلدىعىنا بايلانىستى راقىمشىلىق جاساۋ تۋرالى زاڭ قابىلداندى. ول ىزگىلىكتىڭ سيمۆولىنا اينالدى دەۋگە بولادى. ەلىمىزدەگى 17 مىڭعا جۋىق سوتتالعان ادام وسى راقىمشىلىق تالاپتارىنا ىلىكتى. وتكەن جىل ۇلى وتان سوعىسىنداعى حالقىمىزدىڭ ەرلىگىن ەسكە الۋعا ارنالعان اۋقىمدى ءىس-شارالار ءوتتى. ءماجىلىس دەپۋتاتتارى دا حالىقارالىق دەڭگەيدەگى جانە ەل ىشىندەگى اۋقىمدى ءىس-شارالارعا قاتىسىپ، ۇلى جەڭىسكە تاعزىم ەتتى. بۇل تاريحي وقيعا بەيبىت كۇننىڭ باعاسىن تەرەڭ ۇعىندىرىپ، سۇراپىل سوعىس جىلدارىنداعى قازاقستاندىقتاردىڭ ەرەن ەرلىگى مەن قايسارلىعىن تاعى دا جادىمىزدا جاڭعىرتتى"، – دەدى ءماجىلىس سپيكەرى.
ونىڭ ايتۋىنشا، جۇرتشىلىقپەن تىكەلەي ديالوگ ورناتقان بىرەگەي الاڭ – ۇلتتىق قۇرىلتاي جيىندارى جالعاسىن تاپتى. وسى ورايدا پرەزيدەنتتىڭ بۋرابايدا سويلەگەن ءسوزى باعدارلامالىق سيپاتقا يە بولدى.
ەرلان قوشانوۆ 2025 جىل سىرتقى ساياسي بەلسەندىلىك ارتىپ، ماڭىزدى حالىقارالىق باستامالار قارقىن العان كەزەڭگە اينالعانىن باسا ايتتى.
"مەملەكەت باسشىسى بىرىككەن ۇلتتار ۇيىمى باس اسسامبلەياسىنىڭ 80ء-شى سەسسياسىنىڭ جالپى دەباتىنا؛ قىتايدا وتكەن شانحاي ىنتىماقتاستىق ۇيىمىنا مۇشە ەلدەردىڭ مەملەكەت باسشىلارى كەڭەسىنىڭ وتىرىسىنا؛ تاجىكستانداعى تمد كوشباسشىلارى كەڭەسىنىڭ وتىرىسىنا قاتىسىپ، ءسوز سويلەدى. پرەزيدەنت بۋداپەشتتە وتكەن تۇركى مەملەكەتتەرى ۇيىمىنىڭ بەيرەسمي سامميتىنە، سونداي-اق قازاقستاننىڭ الەمدىك ارەناداعى ۇستانىمىن نىعايتا تۇسەتىن باسقا دا ماڭىزدى حالىقارالىق ءىس-شارالارعا قاتىستى. بۇدان بولەك، جىل بويى مەملەكەت باسشىسىنىڭ ستراتەگيالىق ماڭىزدى ساپارلارى مەن شەتەل باسشىلارىنىڭ ەلىمىزگە قارىمتا ساپارلارى بولدى.
پرەزيدەنتتىڭ باستاماسىمەن بىرىككەن ۇلتتار ۇيىمىنىڭ ورتالىق ازيا مەن اۋعانستانعا ارنالعان ورنىقتى دامۋ ماقساتتارى جونىندەگى وڭىرلىك ورتالىعىنىڭ اشىلۋى ايماقتىڭ ستراتەگيالىق ماڭىزى ارتىپ كەلە جاتقانىن كورسەتەدى. بۇل قازاقستاننىڭ جاھاندىق ديالوگتىڭ بەلسەندى جانە سەنىمدى قاتىسۋشىسى رەتىندەگى ءرولىن تاعى ءبىر ناقتىلاي ءتۇستى"، – دەدى ءماجىلىس ءتوراعاسى.