ماجار ستۋدەنتتەرى ابايدىڭ «كوزىمنىڭ قاراسى» جانە «ولەڭ - ءسوزدىڭ پاتشاسى» شىعارمالارىن ماجار جانە قازاق تىلدەرىندە ورىندادى.
قازاقستان تاۋەلسىزدىگىنىڭ 30 جىلدىعى اياسىندا ماجارستاننىڭ مەملەكەتتىك جينالىسى سپيكەرىنىڭ ورىنباسارى شاندور لەجاكتىڭ قولداۋىمەن لاكيتەلەك حالىق ينستيتۋتىندا قازاق اقىنى جانە اعارتۋشىسى اباي ءمۇسىنىنىڭ سالتاناتتى اشىلۋ ءراسىمى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ماجارستاننىڭ ساياسي قايراتكەرلەرى، اكادەميالىق جانە قوعامدىق توپتارىنىڭ وكىلدەرى قاتىسقان ءراسىم بارىسىندا ش. لەجاك كورنەكتى اقىن جانە ويشىل ابايدىڭ شىعارماشىلىق مۇراسى باتىس جانە شىعىس مادەنيەتىن رۋحاني بايلانىستىراتىنىن ايتتى.
ماجارستان پرەمەر-مينيسترىنىڭ ورىنباسارى – قارجى ءمينيسترى، ەكونوميكالىق ىنتىماقتاستىق جونىندەگى قازاقستان-ماجارستان ۇكىمەتارالىق كوميسسياسىنىڭ تەڭ ءتوراعاسى ميحاي ۆارگا ماجارستان ۇكىمەتى «شىعىسقا تەرەزە» سىرتقى ساياسي ستراتەگياسى شەڭبەرىندە عىلىمي-مادەني مۇرا سالاسىنداعى ەكى ەل اراسىنداعى قاتىناستارىن دامىتۋدى جالعاستىراتىنىن اتاپ ءوتتى.
قازاقستان ەلشىسى جانىبەك ءابدىراشوۆ ابايدىڭ ەڭبەكتەرى ەلدەر مەن حالىقتاردىڭ جاقىنداسۋىنا سەپتىگىن تيگىزەتىنىن، ال ونىڭ رۋحاني مۇراسى ارقىلى ماجار جاستارى قازاق دالاسىنىڭ مادەنيەتىمەن تانىسا الاتىنىن جەتكىزدى.
ءىس-شارا اياسىندا ماجار ستۋدەنتتەرى ابايدىڭ «كوزىمنىڭ قاراسى» جانە «ولەڭ - ءسوزدىڭ پاتشاسى» شىعارمالارىن ماجار جانە قازاق تىلدەرىندە ورىندادى. سونىمەن بىرگە ەلشىنىڭ قازاق ءتىلى مەن قازاقستان مادەنيەتىن وقىپ جاتقان ماجار ستۋدەنتتەرىمەن كەزدەسۋى ءوتتى. اباي ءمۇسىنى ماجارستاننىڭ رۋحاني ورتالىقتارىنىڭ ءبىرى سانالاتىن لاكيتەلەك حالىق ينستيتۋتىنىڭ باعىندا ورناتىلعان.
قازىرگى ۋاقىتتا ينستيتۋت الەمدىك تىلدەر مەن مادەنيەتتەردى زەرتتەۋگە ارنالعان بىرەگەي جوبا قۇردى، ماجار جاستارى اراسىندا كەڭىنەن تانىمال بولدى. قازاقستان، رەسەي، بەلارۋس جانە موڭعوليادان كەلگەن جەتەكشى شەتەلدىك عالىمداردىڭ، لينگۆيستەردىڭ، مادەنيەتتانۋشىلاردىڭ جانە باسقا دا مامانداردىڭ وسى ەلدەردىڭ مادەنيەتى مەن تاريحىن زەردەلەۋ بويىنشا ستۋدەنتتەرگە ارنالعان وقىتۋ ءىس-شارالارىن وتكىزۋ جونىندەگى جوباعا قاتىسۋى ىقپال ەتەدى.