ماعزۇم مىرزاعالييەۆ: اەس-تىڭ قايدا سالىناتىنى ءالى بەلگىسىز

ازىرگە قالدىقتار ءۇشىن ناقتى ورىن بەلگىلەنگەن جوق.

ق ر ەنەرگەتيكا ءمينيسترى ماعزۇم مىرزاعالييەۆ ورتالىق كوممۋنيكاسيالار قىزمەتىندە وتكەن بريفينگتە اەس سالىنۋى ىقتيمال ورىندارعا سيپاتتاما بەردى، دەپ حابارلايدى Almaty-akshamy.kz  

«بۇل ماسەلە 2013 جىلدان بەرى تالقىلانىپ كەلەدى. سەگىز جىلدان بەرى وسى ماقساتتا ءارتۇرلى جەر ۋچاسكەلەرى ولاردىڭ سەيسميكالىق احۋالىنا، جەلىلەر سياقتى ينفراقۇرىلىمنىڭ بولۋىنا جانە ارينە، تۇتىنۋعا نەگىزدەلە وتىرىپ زەردەلەندى. ال، ءقازىر ەكى ورىن بار. ءبىز ولار تۋرالى بىرنەشە رەت ايتتىق، ءبىر لوكاسيا - بالقاشتىڭ جانىنداعىۇلكەن ەلدى مەكەنى بولسا، ەكىنشىسى - كۋرچاتوۆ قالاسى»، - دەدى ماعزۇم مىرزاعالييەۆ جۋرناليستەردىڭ سۇراعىنا بەرگەن جاۋابىندا.

ەنەرگەتيكا ءمينيسترىنىڭ ايتۋىنشا، اتالعان لوكاسيالار سەيسميكالىق قاۋىپسىزدىگى بويىنشا ىرىكتەلىپ وتىر.

«ۇلكەن لوكاسياسى ينفراقۇرىلىمنىڭ بولۋى تۇرعىسىنان قاراعاندا، قىزىقتىراق، باسىمىراق كورىنەدى. ويتكەنى ول جەردەن كەرنەۋى 500 كيلوۆولت بولاتىن «سولتۇستىك-وڭتۇستىك» ەلەكتر تاسىمالداۋ جەلىسى وتەدى. ال ۇلكەن كەنتى ءبىزدىڭ نەگىزگى ەنەرگيا تۇتىنۋشىلارىمىز – وڭتۇستىك وڭىرلەرگە جاقىن. ءبىراق ورىندى تاڭداۋ تۋرالى تۇپكىلىكتى شەشىم ءالى قابىلدانباعانىن اتاپ وتكەن ءجون. دەسە دە، بۇل جۇمىس باستالىپ كەتتى. «سامۇرىق-قازىنا» قورى ءتيىستى زەرتتەۋلەر مەن ەسەپ جۇرگىزۋ ءۇشىن جوبالىق توپ ۇيىمداستىردى»، - دەدى ۆەدومستۆو باسشىسى.

مينيستر، سونداي-اق، اەس قىزمەتىنەن پايدا بولاتىن ءوندىرىس قالدىقتارىن ساقتاۋ ورنىن تاڭداۋ ماسەلەسىنە تۇسىنىكتەمە بەردى.

«بۇل دا - ءتيىستى جوبالىق توپتىڭ الدىندا تۇرعان مىندەتتەردىڭ ءبىرى. ياعني، ول جەردە ءبىز تەك ۋچاسكەنى عانا ەمەس، تەحنولوگيالاردى دا انىقتاۋىمىز كەرەك. قۋاتىن انىقتاۋىمىز كەرەك، سودان كەيىن ساقتاۋ ماسەلەسىن شەشۋىمىز كەرەك. ازىرگە قالدىقتار ءۇشىن ناقتى ورىن جوق»، - دەدى ماعزۇم مىرزاعالييەۆ.