پرەزيدەنت تاپسىرماسى. ايتىلدى. جاسالدى.
مادەنيەت جانە سپورت مينيسترلىگى مەملەكەت باسشىسى تاپسىرمالارىنىڭ ورىندالۋى تۋرالى ەسەپ بەردى.
«ءبىز مادەنيەت سالاسىندا جۇمىس ىستەيتىن ازاماتتارعا جەتكىلىكتى تۇردە كوڭىل بولمەي وتىرمىز. بۇل – ەڭ الدىمەن، كىتاپحانا، مۋزەي، تەاتر قىزمەتكەرلەرىنە قاتىستى ماسەلە. ۇكىمەت مادەنيەت قىزمەتكەرلەرىنىڭ ەڭبەكاقىسىن كوبەيتۋى ءتيىس»، – دەپ قاسىم-جومارت توقايەۆ ءوز جولداۋىندا تاپسىرما بەرگەن بولاتىن.
مادەنيەت جانە سپورت مينيسترلىگى پرەزيدەنت تاپسىرماسى اياسىندا كەلەسىدەي جۇمىستار اتقارىلعانىن حابارلادى:
- 2022 جىلى مادەنيەت جانە ارحيۆ ءىسى قىزمەتكەرلەرىنىڭ ەڭبەكاقىسى 23%-عا كوتەرىلدى.
- بيىل جىل باسىنان سالا قىزمەتكەرلەرىنىڭ ەڭبەكاقىسى تاعى 22%-عا ارتتى.
- الداعى ەكى جىلدا مادەنيەت جانە ارحيۆ ءىسى قىزمەتكەرلەرىنىڭ ايلىعى 55%-عا كوتەرىلەتىن بولادى.
پرەزيدەنت قاسىم-جومارت توقايەۆتىڭ 2025 جىلعا دەيىن رەسپۋبليكالىق مادەنيەت جانە ارحيۆ ءىسى ۇيىمدارى قىزمەتكەرلەرىنىڭ ەڭبەكاقىسىن 100%-عا كوتەرۋ تۋرالى تاپسىرماسى اياسىندا بيىل 1 قاڭتاردان سالا ماماندارىنىڭ ايلىعى ورتا ەسەپپەن تاعى 22%-عا ارتتى. وسىلايشا سوڭعى ەكى جىلدا 64 مىڭعا جۋىق مادەنيەت جانە ارحيۆ ءىسى قىزمەتكەرلەرىنىڭ ەڭبەكاقىسى ورتا ەسەپپەن 45%-عا كوتەرىلدى.
«2023 جىلدىڭ قاڭتارىنان بارلىق ساناتتاعى قىزمەتكەرلەردىڭ ايلىعى وسكەنىن اتاپ ءوتۋ كەرەك. بۇل باسشىلار مەن جەتەكشىلەر، نەگىزگى پەرسونالمەن قاتار، ەدەن جۋۋشى، كۇزەتشى، ۆاحتەر سەكىلدى جۇمىسكەرلەردىڭ دە ەڭبەكاقىسى كوتەرىلدى»، – دەدى ق ر مادەنيەت جانە سپورت ۆيسە-مينيسترى نۇرعيسا داۋەشوۆ.
مادەنيەت جانە سپورت مينيسترلىگى سالا ماماندارىنىڭ ايلىعىن ودان ءارى ۇلعايتۋعا باستاماشى بولادى. ماسەلەن، شىعارماشىلىق جوعارى وقۋ ورىندارىنداعى كونسەرتمەيستەرلەردىڭ ەڭبەكاقىسىن كوتەرۋ جوسپاردا بار. ول ءۇشىن زاڭنامالىق اكتىلەرگە ءتيىستى وزگەرىستەر ەنگىزۋ بويىنشا بەلسەندى جۇمىس ءجۇرىپ جاتىر.
سونداي-اق، «ۇلتتىق» مارتەبەسى بار مادەنيەت ۇيىمدارى قىزمەتكەرلەرىنىڭ ەڭبەكاقىسى ەكى ەسەگە جۋىق ءوستى. بۇگىندە ەلىمىزدە وسى ساناتقا جاتاتىن 5 ۇيىم بار. مينيسترلىك الداعى ۋاقىتتا اتالعان نىسانداردىڭ ءتىزىمىن كەڭەيتۋدى جوسپارلاپ وتىر.
قالامگەرلەردى قولدايمىز
«قازاق قالامگەرلەرىنىڭ ۇزدىك شىعارمالارىنا قوسا، بالالارعا ارنالعان شەتەل جازۋشىلارىنىڭ دا تاڭداۋلى تۋىندىلارىن اۋدارىپ، كوپتەپ باسىپ شىعارۋدى جانە تاراتۋدى قولعا العان ءجون»، – دەپ پرەزيدەنت ءوزىنىڭ «تاۋەلسىزدىك بارىنەن قىمبات» اتتى ماقالاسىندا تاپسىرما بەرگەن ەدى.
مەملەكەت باسشىسىنىڭ تاپسىرماسى نەگىزىندە مادەنيەت جانە سپورت مينيسترلىگى تاراپىنان مىنانداي ءىس-شارالار ۇيىمداستىرىلدى:
- 2021 جىلى وتاندىق قالامگەرلەردىڭ بالالارعا ارنالعان 40 كوركەم ادەبيەتى جالپى تارالىمى 120 مىڭ دانامەن باسىلىپ شىعىپ، ەلىمىزدەگى كىتاپحانالارعا تاراتىلدى. ونىڭ ىشىندە 4 كىتاپ الەم بالالار ادەبيەتى اۆتورلارىنىڭ قازاق تىلىندەگى اۋدارماسى.
- 2022 جىلى 23 بالالار ادەبيەتى جالپى تارالىمى 69 مىڭ دانامەن ايماقتارداعى بارلىق مەملەكەتتىك كىتاپحانالارعا تاراتىلدى. ونىڭ ىشىندە 2-ەۋى الەم بالالار ادەبيەتىنىڭ قازاق تىلىندەگى اۋدارماسى.
- 2022 جىلى «ۇزدىك بالالار ادەبيەتى»، «ۇزدىك كوميكس» سىندى 7 نوميناسيادان تۇراتىن «ايبوز» ۇلتتىق ادەبي بايقاۋى ۇيىمداستىرىلدى. جەڭىمپازدارعا 5 ملن تەڭگەدەن قارجىلاي سىيلىق تابىستالىپ، ەڭبەكتەرى باسىلىپ، كىتاپحانالارعا تاراتىلدى.
- 2023 جىلى بالالار ادەبيەتىن جانە جاس قالامگەرلەردى قولداۋ ماقساتىندا العاش رەت پرەزيدەنتتىك ارناۋلى ادەبي سىيلىق تاعايىندالادى. پرەزيدەنتتىك ادەبي سىيلىق 18–35 جاس ارالىعىنداعى جاس قالامگەرلەرگە «پروزا»، «پوەزيا»، «دراماتۋرگيا»، «بالالار ادەبيەتى» نوميناسيالارى بويىنشا تابىستالىپ، ءار جەڭىمپازعا 4 ملن تەڭگەدەن استام سىياقى بەرىلەدى.
تاريحي قۇجاتتار ەلگە قايتارىلدى
پرەزيدەنت تاپسىرماسى اياسىندا 2022 جىلى شەتەلدەن 7000 تاريحي قۇجات ەلگە قايتارىلدى. قۇندى قۇجاتتاردا ەلىمىزدىڭ تاريحى تۋرالى تىڭ اقپاراتتار بار. ولاردى ءقازىر وتاندىق تاريحشىلار مەن عالىمدار زەرتتەپ جاتىر. قۇجاتتار ۆەنگريا، گەرمانيا، يتاليا سەكىلدى جانە ت.ب. ەۋروپالىق وداق ەلدەرىنەن اكەلىنگەن. بىلتىر عالىمدارىمىز 14 مەملەكەتكە ىزدەستىرۋ-زەرتتەۋ جۇمىستارىمەن باردى. ولار جيناعان قۇجاتتار قاتارىندا 445 فوتوسۋرەت، 206 كىتاپ جانە سيرەك قولجازبالار بار. حرونولوگيالىق تۇرعىدان 918–1990 جىلدار ارالىعىن قامتيدى.
قايتارىلعان قۇجاتتار ق ر ۇلتتىق ارحيۆىنە تاپسىرىلدى. ءقازىر مادەنيەت جانە سپورت مينيسترلىگى ءبىرىڭعاي دەرەكتەر بازاسىن قۇرۋ باعىتىندا جۇمىس جۇرگىزىپ جاتىر. باعالى تاريحي قۇجاتتاردى تاراتۋ ءۇشىن فوتوالبومدار، جيناقتار، حرونوگرافتار، ءومىرباياندىق انىقتامالىقتار جانە باسقا دا پايدالى ماتەريالدار باسپادان شىعارىلا باستادى.
«ارحەولوگتار مەن تاريحشىلارىمىزدىڭ جۇمىسى مۇنىمەن بىتپەيدى. 2025 جىلعا دەيىن قازاقستاندىق عالىمدار شەتەلگە تاعى بىرنەشە ەكسپەديسيا جوسپارلاپ وتىر»، – دەپ اتاپ ءوتتى مادەنيەت جانە سپورت ۆيسە-مينيسترى نۇرعيسا داۋەشوۆ.