ەرتەڭ الماتى مۋزەيىندە 18 مامىر – حالىقارالىق مۋزەيلەر كۇنى اياسىندا كورنەكتى مەملەكەت جانە قوعام قايراتكەرى، ەتنوگراف-عالىم وزبەكالى جانىبەكوۆتىڭ ءومىرى مەن قىزمەتىنە ارنالعان «مادەني مايدان» اتتى كورمە اشىلادى، دەپ حابارلايدى Almaty-akshamy.kz
كورمەدە ءو.جانىبەكوۆتىڭ وتباسىنان الىنعان فوتولار، ارحيۆتىك قۇجاتتار، ەڭبەكتەرى مەن ماراپاتتارى، كيىمدەرى، جەكە زاتتارى، قولجازبالارى، ەسكيزدەرى، الماتى مۋزەيى قورىنان ءو.جانىبەكوۆتىڭ ۇلگىسى بويىنشا تىگىلگەن «سازگەن سازى» ءانسامبلىنىڭ العاشقى ورىنداۋشىسىنىڭ ساحنالىق كيىمى، فوتوسۋرەتتەرى، مۋزىكالىق اسپاپتار مەن ازىرەت سۇلتان مەملەكەتتىك تاريحي-مادەني مۋزەي قورىعىنىڭ قورىنان ءو.جانىبەكوۆتىڭ جەكە زاتتارى جانە ت.ب. ۇسىنىلادى.
ءو.جانىبەكوۆتىڭ باستاماسىمەن ەلىمىزدە جۇزگە جۋىق مۋزەي مەن ەتنوگرافيالىق زالدار اشىلىپ، «سازگەن سازى»، «شەرتەر»، «ادىرنا»، «التىناي» فولكلورلىق-ەتنوگرافيالىق، ءان-بي انسامبلدەرى، تەاترلار، «كازرەستاۆراسيا»، «بىرەگەي ىسقىمەن وينالاتىن مۋزىكالىق اسپاپتاردىڭ مەملەكەتتىك كوللەكسياسى» قۇرىلدى. سونداي-اق، ءو.جانىبەكوۆتىڭ ارقاسىندا ۇلى دالانىڭ ءبىرقاتار ەسكەرتكىشتەرى ساقتالدى. قالپىنا كەلتىرىلگەن ەسكەرتكىشتەردىڭ قاتارىندا قوجا احمەت ياسساۋي، تاجىك، قاراحان، ءايشا-بيبى، اق-ۇيىق جانە بابادجا-حاتۋن كەسەنەلەرى مەن جاركەنت مەشىتى جانە وتىرار ارحەولوگيالىق ەسكەرتكىشتەرى بار.
ءو. جانىبەكوۆتىڭ تىكەلەي ىقپالىمەن قازاقتىڭ ءتول مەيرامى ناۋرىز قايتا جاندانىپ، قاسيەتتى تايقازان قازاقستانعا قايتارىلدى.
ا.بايتۇرسىن ۇلى، م.جۇماباي ۇلى، م.دۋلات ۇلى، ج.ايماۋىت ۇلى، ش.قۇدايبەردى ۇلىنىڭ ىستەرىن قايتا قاراۋ كوميسسيانى قۇرۋدىڭ باستاماشىسى بولدى. ناتيجەسىندە الاش زيالىلارىنىڭ داڭقتى ەسىمدەرى قايتا ءتىرىلدى.
كورمەنىڭ سالتاناتتى اشىلۋىندا ءو.جانىبەكوۆتىڭ زامانداستارى، قىزمەتتەس بولعان ارىپتەستەرى، شاكىرتتەرى مەن ۇرپاقتارى قاتىسىپ، ەستەلىكتەرىمەن بولىسەدى.