لۋۆر مۋزەيىندەگى كورمەگە الەمدەگى ەڭ كونە قۇرانداردىڭ ءبىرى – VIII عاسىردا جازىلعان كاتتا لونگار قۇرانى قويىلماق. بۇل تۋرالى Almaty-akshamy.kz Inform.kz-كە سىلتەمە جاساپ حابارلايدى.
كونە قۇران «وزبەكستان وازيستەرىنىڭ قازىنالارى. كەرۋەن جولدارىنىڭ قيىلىسىندا» دەپ اتالاتىن كورمە اياسىندا لۋۆردە تۇڭعىش رەت كورسەتىلمەك.
كورمە 24 قاراشادان باستاپ كەلەر جىلدىڭ 6 ناۋرىزىنا دەيىن اشىق بولادى. مۇندا قابىرعا كەسكىندەمەلەرى، سارايلاردىڭ ويىپ جاسالاتىن بولشەكتەرى، ساندىك-قولدانبالى ونەر بۇيىمدارى سياقتى ءارتۇرلى جادىگەرلەر ورنالاستىرىلادى.
بارلىعى 168 مۋزەي ەكسپوناتىمەن تانىسۋعا مۇمكىندىك بار: وزبەكستاننىڭ 13 مۋزەيىنەن جەتكىزىلەتىن 137 بۇيىم، ولار ءبىزدىڭ داۋىرىمىزگە دەيىنگى V–VI عاسىرلاردى، ياعني تيمۋريدتەر كەزەڭىنە دەيىنگى زاماندى قامتيدى. سونداي-اق، الەمنىڭ وزىق مۋزەيلەرىنە تيەسىلى 31 بۇيىم قويىلماق.
ەسكە سالساق، وزبەكستاندا VIII عاسىرداعى قۇران كىتابىن قالپىنا كەلتىرۋ جۇمىستارى اياقتالىپ، ول رەستاۆراسيادان كەيىن كوپشىلىك نازارىنا ۇسىنىلعان بولاتىن. عىلىمي زەرتتەۋلەرگە سايكەس، قۇران كىتابى ۇزاق ۋاقىت بويى وزبەكستاننىڭ قاشقاداريا وبلىسى قاماشين اۋدانىنداعى لانگار وتا مەشىتىندە ساقتالىپ كەلگەن. مادەنيەت جانە ونەردى دامىتۋ قورى مەن وزبەكستان مۇسىلماندارى ءدىني باسقارماسى بىرلەسىپ ۇيىمداستىرعان جوباعا فرانسيانىڭ بەلگىلى لۋۆر مۋزەيىنىڭ ماماندارى جۇمىلدىرىلدى.