رەسپۋبليكا كۇنى تۇماندى البيون تورىندە دە تويلاندى.
لوندوندا ۋاقىتشا تۇرىپ جاتقان قازاقستاندىقتار ورتالىق الاڭعا شىعىپ، فلەشموب ۇيىمداستىردى، دەپ Almaty-akshamy.kz قازاقپاراتقا سىلتەمە جاساپ.
ۇلىبريتانيانىڭ ورتالىعىندا ورنالاسقان الەمگە ايگىلى ترافالگار الاڭىنا ءبىر توپ وتانداسىمىز جينالىپ، ولاردىڭ الدىندا قازاقستان رەسپۋبليكاسىنىڭ ەڭبەك سىڭىرگەن قايراتكەرى ەرلان رىسقالي جىردان شاشۋ شاشتى. ول مۇقاعالي ماقاتايەۆ پەن باكىر تاجىبايەۆتىڭ ولەڭدەرىنە ورىلگەن «قازاعىم-اي»، «اۋىلىم» اندەرىن ناقىشىنا كەلتىرىپ ورىندادى. ءداستۇرلى ءان ونەرىمىزدىڭ كوشىن ورگە سۇيرەپ جۇرگەن ءانشى ۇلتىمىزدىڭ باي مادەنيەتىن شەتەلدە ناسيحاتتاۋ ماڭىزدى ەكەنىن ايتادى.
«ماقساتىمىز - قازاقتىڭ ءانىن، ءداستۇرىن، دومبىراسىن جانە ۇلتتىق كيىمىن شەتەلدىكتەر الدىندا پاش ەتۋ. رەسپۋبليكا كۇنىندە الەمدى اۋزىنا قاراتىپ وتىرعان ۇلىبريتانيا سياقتى ۇلى مەملەكەتتىڭ استاناسىندا ءداستۇرلى ونەرىمىزدىڭ سالتانات قۇرۋى ۇلكەن جەتىستىك دەپ بىلەمىن»، - دەيدى ەرلان رىسقالي.
ۇلىبريتانيا - تۋريزم بويىنشا دۇنيەجۇزىندە ونىنشى ورىن الاتىن مەملەكەت. جىل سايىن بۇل جاققا الەمنىڭ تۇكپىر-تۇكپىرىنەن 40 ميلليونعا جۋىق ادام قىدىرىپ كەلەدى. پاندەميا باسىلعالى ولاردىڭ سانى ارتا ءتۇستى. بۇل جولى لوندوننىڭ كورنەكى ورىندارىن ارالاپ جۇرگەن ساياحاتشىلار فلەشموب قاتىسۋشىلارىمەن تانىسىپ، قازاق ونەرىنەن سۋسىنداۋعا مۇمكىندىك الدى.
«مەن امەريكادان ۇلىبريتانياعا قىدىرىپ كەلدىم. قازاقستاندا رەسپۋبليكا كۇنى تويلانىپ جاتقانىن ەستىپ، قۋاندىم. ءبىز سىزدەرگە باقىت پەن بايلىق، دەنساۋلىق پەن ماحاببات تىلەيمىز. رەسپۋبليكا كۇنى قۇتتى بولسىن!» - دەيدى اماندا بويل ەسىمدى تۋريست.
«ترافالگار الاڭىندا ۇلتتىق كيىمدەرىڭىزدى كورىپ، ءداستۇرلى اندەرىڭىزدى تىڭداپ ريزا بولىپ جاتىرمىز. ءبىز انگليانىڭ جەرگىلىكتى تۇرعىندارىمىز. مەرەكەمەن قۇتتىقتايمىز!» - دەيدى مارگارەت سميت.
فلەشموب قاتىسۋشىلارى - ۇلىبريتانيادا جۇمىس بابىمەن جۇرگەن نەمەسە ءبىلىم الىپ جاتقان وتانداستارىمىز. رەسپۋبليكا كۇنىن قازاقستاندا مەرەكەلەۋ مۇمكىن بولماعاندىقتان، تۇماندى البيون تورىندە تويلاۋدى ۇيعارىپتى. ۇستەرىندە شاپان مەن قامزول، قولدارىندا دومبىرا مەن جالاۋ. ولار بالالارىن دا ەرتىپ كەلىپ، ءانۇراندى ءبارى بىرگە ورىندادى.
«لوندونعا قىدىرىپ كەلدىم. ءبىر جاعىنان، اعىلشىن ءتىلىن ۇيرەنۋ ماقساتىم ەدى. قازاق باۋىرلارىمنىڭ وسىندا تويلاپ جاتقانىن ەستىپ كەلدىم. شىن جۇرەكتەن قۋانىپ جاتىرمىن. ەلىمىز تىنىش، جۇرتىمىز امان بولسىن!» - دەيدى وتانداسىمىز ارمان كۇمىسباي.
ۇلىبريتانيا - 70 ميلليونعا جۋىق ادام تۇراتىن الىپ مەملەكەت. نەگىزگى حالقىن اعىلشىن، شوتلاند، ۋەلس جانە يرلاند ۇلتتارى قۇرايدى. ولاردان بولەك ۇندىلىك، پاكىستاندىق، اۋعانستاندىق جانە باسقا دا يمميگرانتتاردىڭ ۇرپاقتارى ءتاتۋ-تاتتى ءومىر سۇرەدى. بارلىعىنىڭ ادەت-عۇرىپتارى مەن سالت–داستۇرلەرىنىڭ ساقتالۋىنا جانە مەرەكەلەرىن كەڭ كولەمدە اتاپ وتۋىنە جاعداي جاسالعان. قازاقستاندىقتار بيىل قايتا تۇلەگەن رەسپۋبليكا كۇنىن الداعى ۋاقىتتا بۇدان دا كەڭ كولەمدە تويلاۋدى جوسپارلاپ وتىر.