بۇگىندە مەديسينالىق وڭالتۋ مىندەتتى الەۋمەتتىك مەديسينالىق ساقتاندىرۋ پاكەتىندەگى باعاسى قىمبات ءارى ەڭ سۇرانىسقا يە قىزمەتتەردىڭ ءبىرى. رەابيليتاسيانى ينسۋلت نەمەسە جاراقات العان، تىزە نەمەسە جامباس بۋىندارىن الماستىرعان، ءتۇرلى سوزىلمالى اۋرۋلارمەن اۋىراتىن پاسيەنتتەر قاجەت ەتەدى.
2024 جىلى الماتى قالاسى بويىنشا ءمامس پاكەتى شەڭبەرىندە كورسەتىلەتىن رەابيليتاسيالىق قىزمەتتەرگە 9،5 ملرد تەڭگە قاراستىرىلعان. قىزمەتتى الماتى قالاسىنداعى 78 ەمدەۋ مەكەمەسى كورسەتەدى.
ساقتاندىرۋ ارقىلى مەديسينالىق وڭالتۋدان كىمدەر وتە الادى؟ رەابيليتاسيادان ءوتۋ جولدارى قانداي؟ وسى جانە وزگە دە ساۋالدارعا مەديسينالىق ساقتاندىرۋ قورىنىڭ الماتى فيليالى وكىلدەرى جاۋاپ بەردى.
مەديسينالىق وڭالتۋ قىزمەتىن قانداي كلينيكالار كورسەتەدى؟
2024 جىلى الماتىدا 78 ۇيىم مەديسينالىق وڭالتۋ قىزمەتىن كورسەتۋگە تاپسىرىس الدى. تىزىمگە ەمحانالار، اۋرۋحانالار، جەكە مەنشىك مەديسينا ورتالىقتارى، وڭالتۋ جانە سپورتتىق-وڭالتۋ كەشەندەرى، شيپاجاي كەشەندەرى، مەديسينالىق-الەۋمەتتىك مەكەمەلەر، ەمدەۋ-ساۋىقتىرۋ كەشەندەرى ەنگەن. ولاردىڭ تىزىمىمەن قوردىڭ fms.kz رەسمي سايتى ارقىلى تانىسۋعا بولادى.
مەديسينالىق وڭالتۋ كىمدەرگە كورسەتىلەدى؟
رەابيليتاسيادان:
- نەگىزگى نەمەسە سوزىلمالى اۋرۋدى ەمدەۋ قاجەت بولعاندا؛
- ينسۋلت ت.ب. سىندى اۋىر ناۋقاستاردان كەيىن؛
- كەيبىر حيرۋرگيالىق وپەراسيالاردان كەيىن؛
- جاراقات العاننان كەيىن؛
- سىرقات سالدارىنان ادامنىڭ قيمىل-قوزعالىسى شەكتەلگەن جاعدايلاردا وتۋگە بولادى.
پاسيەنت بۇرىن وڭالتۋدان وتپەگەن. نەدەن باستاعان ءجون؟
1. كەز-كەلگەن پاسيەنت مەديسينالىق قىزمەتكە جۇگىنۋ ءۇشىن ەڭ الدىمەن تىركەلگەن ەمحاناسىنا بارادى.
2. ەمدەۋشى دارىگەر رەابيليتولوگ ماماننان نەمەسە مۋلتيديسيپلينارلىق توپ ماماندارىنان كونسۋلتاسيا الۋعا جىبەرەدى.
3. ولار اۋرۋدىڭ پايدا بولۋى مەن كۇشەيۋ قارقىنىنا، سىرقاتتىڭ دەنساۋلىق جاعدايىنا بايلانىستى مالىمەتتەردى ەسكەرە وتىرىپ، وڭالتۋعا دەگەن قاجەتتىلىك بار-جوعىن ايقىندايدى. باستاپقى رەابيليتاسيالىق دياگنوز قويىپ، پاسيەنت دەنساۋلىعىن قالپىنا كەلتىرۋ جوسپارىن، كۋرستىڭ مەرزىمىن ت.ب. انىقتايدى.
4. ەگەر كەشەندى تەكسەرۋ ناتيجەسىندە رەابيليتاسيا ءتيىمدى دەپ تابىلسا، پاسيەنت وڭالتۋدان امبۋلاتوريادا، ستاسيوناردا، ستاسيوناردى الماستىراتىن ەمدەۋ مەكەمەسىندە، ۇيدە وتە الادى. جوسپارلى تۇردە ەم قابىلدايتىن پاسيەنت ستاسيونارعا «اۋرۋحاناعا جاتقىزۋ بيۋروسى» پورتالى ارقىلى جاتقىزىلادى.
مەديسينالىق وڭالتۋ ءۇش كەزەڭنەن تۇرادى
ءبىرىنشىسى اۋرۋى اسقىنىپ تۇرعان ناۋقاستارعا، حيرۋرگيالىق وپەراسيا جاساتقان، جاراقات العان ادامدارعا ارنالعان. ول ستاسيونارلاردىڭ قۇرىلىمدىق بولىمشەلەرىندە جۇرگىزىلەدى.
ەگەر اۋرۋحاناعا جاتقىزۋ قاجەت بولماسا، مەديسينالىق كومەك كورسەتىلگەننەن كەيىن جانە نەگىزگى اۋرۋ ەمدەلىپ بولعاننان كەيىن پاسيەنت وڭالتۋدىڭ ەكىنشى نەمەسە ءۇشىنشى كەزەڭىنە جىبەرىلەدى.
وڭالتۋدىڭ ەكىنشى كەزەڭى مامانداندىرىلعان بولىمشەلەردە نەمەسە رەسپۋبليكالىق دەنساۋلىق ساقتاۋ ۇيىمدارى، مامانداندىرىلعان وڭالتۋ ورتالىقتارى مەن كوپبەيىندى ستاسيونارلار بازاسىندا وتەدى. بۇل كەزەڭ اۋرۋ باستالعان ساتتەن باستاپ توعىز اي ىشىندە جۇرگىزۋ قاجەت. كۋرستىڭ ۇزاقتىعى مەن جيىلىگى نوزولوگياعا، ناۋقاستى دەنساۋلىق جاعدايىنا تاعى دا باسقا فاكتورلارعا بايلانىستى بولماق.
ءۇشىنشى كەزەڭدە مەديسينالىق وڭالتۋ ەمحانا-امبۋلاتوريا دەڭگەيىندە، كۇندىزگى جانە تاۋلىك بويعى ستاسيونارلاردا، وڭالتۋ ورتالىقتارىندا، ساناتورييلەر مەن كۋرورتتاردا، ۇيدەگى ستاسيونار جاعدايىندا، سونداي-اق قاشىقتىقتان جۇرگىزىلەدى. كۋرستىڭ جيىلىگى مەن ۇزاقتىعى پاسيەنت دەنساۋلىعىنا قاراي بەلگىلەنەدى.