«لەنينگراد قاسىرەتىنىڭ» كۋاگەرى

27 قاڭتاردا لەنينگرادتىڭ فاشيست باسقىنشىلارىنىڭ قورشاۋىنان ازات ەتىلگەنىنە 80 جىل تولدى. بۇل تاريحي وقيعانى جىر الىبى جامبىل جابايەۆ ءوزىنىڭ «لەنينگرادتىق ورەندەرىم» اتتى جىرىندا ماڭگىلىككە قالدىرعان. اتالعان قاسىرەتتى ءوز كوزىمەن كورگەندەردىڭ ءبىرى – وتستاۆكاداعى مايور، شەكارا ارداگەرى يۋريي فەدوروۆيچ نيكيفوروۆ.

لەنينگراد قورشاۋىندا بولعان كۇندەردى باسىنان كەشىرگەن يۋريي فەدوروۆيچپەن كەزدەسۋ الماتى وبلىسى قاراساي اۋدانى شەكارا قىزمەتىنىڭ ساربازدارى ءۇشىن ەرەكشە اسەرلى بولدى. ارداگەرمەن كەزدەسۋ شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى ءتوراعاسىنىڭ ورىنباسارى، الماتى وبلىسى بويىنشا فيليالىنىڭ باسشىسى، زاپاستاعى پولكوۆنيك داۋلەتقالي مامىرحانوۆتىڭ باسشىلىعىمەن ۇيىمداستىرىلدى.

كەزدەسۋ بارىسىندا ارداگەر لەنينگراد قورشاۋىنداعى قيىن كەزەڭدەر تۋرالى جان تەبىرەنتەرلىك ەستەلىكتەرىمەن ءبولىستى. ول سول كەزدەگى قورشاۋداعى ءومىردى، اشتىقتان امان قالعان بالالىق شاعىن ەسكە الدى. اكەسى سوعىستىڭ العاشقى كۇنىندە مايدانعا اتتانىپ، ۆەنگريادا قازا تاپسا، اناسى قورشاۋداعى قيىنشىلىقتان قايتىس بولعانىن، ال اعاسى ەكەۋىن اجەسىنىڭ قالاي قۇتقارىپ قالعانىن ايتتى.

يۋريي فەدوروۆيچ سۋۆوروۆشىلار مەكتەبىن اياقتاعان سوڭ، اسكەري بايلانىسشىلاردى دايارلايتىن ۋچيليششەگە ءتۇسىپ، قازاقستاندا شەكارا قىزمەتىندە ۇزاق جىلدار قىزمەت ەتتى. وسى جىلداردا ول قازاق راديوسىنىڭ ديكتورى مۇقاعالي ماقاتايەۆپەن تانىسىپ، ونىڭ ولەڭدەرىن تىڭداعانىن ەرەكشە ماقتانىشپەن اڭگىمەلەدى.

كەزدەسۋ سوڭىندا شەكارا قىزمەتىنىڭ ءبولىم باستىعى پودپولكوۆنيك ساعادات اۋەزوۆ ارداگەردىڭ تاعىلىمدى اڭگىمەسى ءۇشىن العىسىن ءبىلدىرىپ، جاس ساربازدارعا اق جول تىلەدى.