ونىڭ ايتۋىنشا، بۇل باعىتتاعى جۇمىستارعا بارىنشا جاۋاپكەرشىلىكپەن قاراۋ كەرەك
لاتىن الىپبيىنە كوشۋ توقتاپ قالمايدى. ءماجىلىس دەپۋتاتى ەرلان سايىروۆتىڭ پىكىرىنشە، پرەزيدەنت قۇرىلتايدا قازاق تىلىنە قاتىستى وتە ورىندى ماسەلە كوتەرگەنىن ايتتى، دەپ حابارلايدى Almaty-akshamy.kz Almaty.tv –گە سىلتەمە جاساپ.
ونىڭ ايتۋىنشا، بۇل باعىتتاعى جۇمىستارعا بارىنشا جاۋاپكەرشىلىكپەن قاراۋ كەرەك. سوندىقتان ارى قاراي لاتىن قارپىنە اۋىسۋ بايىپپەن جالعاساتىنىن جەتكىزدى. مەملەكەت باسشىسى دا كيريلليسادان لاتىن الىپبيىنە تەك سايكەس ارىپتەردى وزگەرتۋ ارقىلى كوشۋگە بولمايتىنىن ايتقان بولاتىن.
«قازىرگە دەيىن كىرگىزگەن مودەلدەردىڭ بارلىعى حالىقارالىق ستاندارتقا لاتىننىڭ ءوزىنىڭ لوگيكاسىنا سايكەس كەلمەي جاتىر عوي. سوندىقتان بۇل ماسەلە كونسەرۆاسيا ەمەس، كەرسىنشە، ىجداھاتتىلىق كەرەك. ەرتەڭ لاتىن ءالىپبيىن ەنگىزگەننەن كەيىن جاڭا پروبلەما بولمايىنداي جان-جاقتى قاراستىرىپ، تەزىرەك شەشۋدىڭ امالىن ايتىپ وتىر»، – دەدى ق ر پارلامەنتى ءماجىلىسىنىڭ دەپۋتاتى ەرلان سايىروۆ.
ال دەپۋتات امانجول التايەۆ پرەزيدەنت ايتقان ەلىمىزدىڭ جاڭا تاريحىن جازۋ كەرەك دەگەن ۇسىنىسىن قۇپتاپ وتىر. ويتكەنى ونىڭ پىكىرىنشە، ۇلت تاريحى تۇبەگەيلى زەرتتەلىپ بولعان جوق. بۇل باعىتتا جاس ۇرپاققا شىنايى تاريحتى جەتكىزەتىن تاريحشىلاردىڭ موينىندا ۇلكەن مىندەت تۇر دەپ سانايدى.
«وزدەرىڭىز جاقسى بىلەسىزدەر، كەڭەس ۇكىمەتى كەزىندەگى تاريحىمىز ۇلانعايىر بولسا دا، پىشاقتىڭ قابىنداي عانا وقۋلىعى بار حالىقپىز عوي. سوندىقتان تاريحتىڭ ءالى زەرتتەلمەگەن، زەرتتەۋدى قاجەت ەتەتىن اقتاڭداق بەتتەرى كوپ. تاريحتىڭ ءاربىر كەزەڭدەرىنە ءبىز ناقتى باعا بەرىپ، شىندىق – تاۋەلسىز قازاقستاننىڭ كوزقاراسىمەن زەرتتەلۋى وتە ماڭىزدى»، – دەدى ق ر پارلامەنتى ءماجىلىسىنىڭ دەپۋتاتى امانجول التايەۆ.