قالا بويىنشا 4 بەكەت جۇمىس ىستەپ تۇر
كۇزدە الماتىدا اۆتوبۋستارعا گاز قۇياتىن جاڭا بەكەت اشىلماق. بۇل تۋرالى «QAZAQGAZ» ۇلتتىق كومپانياسىنىڭ ءتوراعاسى سانجار جاركەشوۆ ايتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بۇل ءوز رەتىندە گاز قۇيۋ بەكەتىنىڭ تاپشىلىعىن ازايتپاق.
الماتىداعى گاز قۇياتىن 3 بەكەتتىڭ ىستەن شىعۋى قوعامدىق كولىك قوزعالىسىن شەكتەپ، كەپتەلىستە تۇرۋعا ءماجبۇر ەتكەن ەدى. كەسىرىنەن ينتەرۆال ۇزارىپ، جولاۋشىلاردان تۇسەتىن شاعىم جيىلەدى.
«1-2 ايداي قينالدىق. 5-6 ساعات كەزەكتە تۇرعان كۇندەرىمىز بولدى. حالىق مەنى جەپ قويا جازدايتىن "قايدا ءجۇرسىڭ؟" دەپ. ولارعا ءتۇسىندىرىپ ايتا المايسىڭ. ءقازىر ەندى دۇرىستالدى. باسشىلارعا راحمەت»، – دەدى اۆتوبۋس جۇرگىزۋشىسى باقىت قوڭىربايەۆ.
ال ءقازىر اۆتوبۋسقا گاز قۇيۋ شامامەن 10 مينۋت ۋاقىت الادى. قىزمەتكەرلەردىڭ ايتۋىنشا، ءدال وسى بەكەتكە كۇنىنە 200-دەي اۆتوبۋس كەلەدى. ايتا كەتسەك، قالا بويىنشا 4 بەكەت جۇمىس ىستەپ تۇر.
«ءقازىر «الماتىەلەكتروترانس» بويىنشا 700-دەن استام اۆتوبۋس بار. كەلەسى جىلى تاعى قوعامدىق كولىك الامىز. ونىڭ ءبارى گازبەن جۇرەدى. اۆتوبۋس كوبەيگەن سايىن بەكەت سانىن ارتىرسا جاقسى بولار ەدى»، – دەدى №1 كوممۋنالدىق اۆتوبۋس پاركىنىڭ ديرەكتورى ەرلان سەمبايەۆ.
ال «QAZAQGAZ» ۇلتتىق كومپانياسى ءتوراعاسى جىل سوڭىنا قاراي 5-بەكەت ىسكە قوسىلاتىنىن ايتتى.
«الماتى قالاسىنىڭ اكىمدىگىمەن بىرلەسىپ 2 اگنكس كومپرەسسورلىق ستانسا قۇرىلادى. قىركۇيەكتىڭ سوڭىندا 5-ستانسا بەرىلەدى. كەيىن تاعى دا 2 ستانسا سالىنادى»، – دەدى «QAZAQGAZ» ۇلتتىق كومپانياسى» اق باسقارما ءتوراعاسى سانجار جاركەشوۆ.
ۇلتتىق كومپانيا وكىلدەرى جاڭا 2 بەكەتتىڭ قۇرىلىسىن الداعى 2 جىلدا اياقتاپ، قولدانىسقا بەرۋدى جوسپارلاپ وتىر. ىسكە اسسا الماتىدا گاز قۇياتىن 7 بەكەت جۇمىس ىستەيتىن بولادى.