ءبىراق بۇل ۋاقىتشا عانا.
قىس – قىر استىندا. اۋىلداعى اعايىن قىستان قىسىلماي شىعۋى ءۇشىن الدىمەن مال ازىعىنىڭ قامىن جاساسا، كەيىن ەرتە كوكتەمگە دەيىن ءۇيدى جىلىتۋدىڭ جايىن ويلايدى. قالالاردا پەش ارقىلى جىلىتىلاتىن جەر ۇيلەر يەلەرىنىڭ باستى ماسەلەسى دە – وسى. ءبىراق جىلداعى ءداستۇر بويىنشا بيىل كومىردىڭ باعاسى وسكەنى بايقالادى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
تامىز، قىركۇيەك پەن قازان ايلارى – قاتتى وتىنعا دەگەن سۇرانىس كۇرت وسەتىن ۋاقىت. سۇرانىس بار جەردە باعانىڭ ءوسۋى دە بولارى ءسوزسىز. ايتالىق، جەرگىلىكتى "مايكوبەن-ۆەست" كومپانياسى كەنىشتەن بوساتىلاتىن ءبىر توننا كومىردىڭ باعاسىن 500 تەڭگەگە ءوسىردى. بىلتىر ءبىر تونناسى 7500 تەڭگەدەن جونەلتىلسە، بيىلعى باعا – 8000 تەڭگە. ال "بوگاتىر-كومىر" مەن "گامما سارىكول" كاسىپورىندارى ازىرشە باعاعا وزگەرىستەر ەنگىزگەن جوق. العاشقىسى كەنىشتەن قاتتى وتىننىڭ تونناسىن 3413 تەڭگەدەن، سوڭعىسى 7000 تەڭگەدەن ساتۋدا.
بۇل باعا قاراپايىم تۇتىنۋشىلارعا جەتكەنگە دەيىن ەكى، ءتىپتى ءۇش ەسەگە دەيىن قىمباتتايدى. ەلدى مەكەن كەنىشتەن نەعۇرلىم الشاق بولسا، باعا دا سوعۇرلىم قىمباتتاي تۇسپەك.
"تاس كومىردىڭ ءبىر تونناسىنىڭ باعاسى 9500 تەڭگەدەن باستالىپ، 25 مىڭ تەڭگەگە دەيىن جەتەدى. قوڭىر وتىننىڭ تونناسى 11 500 تەڭگەدەن باستالىپ، 20 مىڭ تەڭگەگە دەيىن بولادى. ياعني، باعا ەلدى مەكەننىڭ قاشىقتىعىنا بايلانىستى وزگەرەدى. سەبەبى جەتكىزۋ قىزمەتىنىڭ اقىسى ەسەپكە الىنادى"، - دەيدى پاۆلودار وبلىستىق ەنەرگەتيكا جانە تۇرعىن ءۇي – كوممۋنالدىق شارۋاشىلىق باسقارماسىنىڭ باسشىسى ەرجان سالحانوۆ.
وسىدان-اق باعانىڭ وسكەنىن بايقاۋ قيىن ەمەس. سالىستىرمالى تۇردە قاراساق، بىلتىر ەلدى مەكەندەردىڭ كەنىشتەردەن اراقاشىقتىعى مەن كومىردىڭ سۇرپىنا قاراي تۇرعىندارعا ءبىر تونناسى 8-20 مىڭ تەڭگە ارالىعىندا ساتىلعان-دى. بيىلعى باعا 1500-5000 تەڭگە ارالىعىندا ءوسىپ وتىر. بۇعان دەيىنگى تاجىريبە كورسەتكەندەي، قارا سۋىق تۇسكەندە باعا تاعى قۇبىلۋى ابدەن مۇمكىن.
جالپى، پاۆلودار وبلىسىنىڭ تۇرعىندارى ءۇشىن قىس بويى 399 مىڭ توننا كومىر كەرەك بولادى. ءقازىر وڭىردەگى ساتۋ نۇكتەلەرىندە ازىرشە 15 مىڭ تونناسى بار. ايماقتا اۋىلدارعا كومىر تاسىمالداۋمەن 300-دەن استام جەكە كاسىپكەر اينالىسادى.
ال وڭىردەگى الەۋمەتتىك نىسانداردى جىلىتۋعا 130،3 مىڭ توننا كەرەك. بۇگىندە ونىڭ 17،5 مىڭ تونناسى جەتكىزىلدى.
ايتا كەتەيىك، ەلىمىزدە وندىرىلەتىن 63 ملن تونناعا جۋىق كومىردىڭ 37 ملن تونناسى پاۆلودار وبلىسى اۋماعىنداعى كەنىشتەردەن شىعارىلادى.