مادەنيەت جانە اقپارات ءمينيسترى ايدا بالايەۆا سۋ تاسقىنىنان زارداپ شەككەندەرگە كومەك كورسەتۋ ماقساتىندا «كۇشىمىز بىرلىكتە» اكسياسى باستالعانىن حابارلادى.
مەملەكەت باسشىسى حالقىمىز ءۇشىن باستى قۇندىلىقتاردىڭ ءبىرى بىرلىك پەن ءوزارا كومەك ەكەنىن ۇنەمى ايتىپ كەلەدى. بۇگىندە ەلىمىزدىڭ بىرنەشە وڭىرىندە تابيعي اپات ءقاۋپى كۇشەيىپ، كوكتەمگى سۋ تاسقىنى باستالدى. كەي جاعدايلاردا سۋ تاسقىنىنىڭ زاردابىن جويۋعا، ونىڭ كۇشەيۋىنە جول بەرمەۋ ءۇشىن جۇمىس كۇشى جەتىسپەيدى. دەگەنمەن قازاقستاندىق ەرىكتىلەر قيىندىق كەزىندە ەشقاشان شەت قالعان ەمەس. مەملەكەت باسشىسى دا اۋىزبىرلىكتىڭ ارقاسىندا قازاقستان حالقى ەڭ قيىن كەزەڭدەردى ەڭسەرگەنىن بىرنەشە رەت اتاپ ءوتتى. ءقازىر دە كوپتەگەن وتانداستارىمىز سۋ تاسقىنىنان زارداپ شەككەندەرگە كومەك كورسەتىپ، قول ۇشىن سوزىپ جاتىر – دەپ جازدى مينيستر.
ول وسى باعىتتا مينيسترلىكتە جەدەل جيىن ءوتىپ، ازاماتتىق قوعامنىڭ وسىنداي يگى باستامالارىنا قولداۋ كورسەتۋ ماسەلەسى تالقىلانعانىن ايتتى.
زارداپ شەككەندەرگە كومەك كورسەتۋ ءۇشىن «كۇشىمىز بىرلىكتە» اكسياسىن باستاۋ تۋرالى شەشىم قابىلداندى. جۇمىستى مەنىڭ ورىنباسارىم ەۆگەنيي كوچەتوۆ ۇيلەستىرەدى. ءقازىردىڭ وزىندە ەرىكتى فرونت-وفيستەر جەلىسى نەگىزىندە زارداپ شەككەندەرگە كومەك كورسەتكىسى كەلەتىندەر ءۇشىن ءبىرىڭعاي بايلانىس ورتالىعى جۇمىس ىستەيدى – دەدى ايدا بالايەۆا.
