الەمدىك كوفە نارىعى جىل سايىن ءوسىپ كەلە جاتقانىمەن، ءار ەلدىڭ كوفەنى تۇتىنۋ دەڭگەيى وزگەرىپ وتىرادى.
جاڭا زەرتتەۋ بويىنشا سولتۇستىك ەۋروپا مەملەكەتتەرى ادام باسىنا شاققانداعى كوفە تۇتىنۋدان ءالى دە كوش باستاپ تۇر، - دەپ حابارلايدى Aqshamnews.kz ءتىلشىسى.
Cafely كومپانياسىنىڭ دەرەكتەرىنە نەگىزدەلگەن ينفوگرافيكا 2025 جىلى 65 ەلدى جان باسىنا شاققانداعى تاۋلىكتىك كوفە تۇتىنۋ كولەمى بويىنشا سالىستىرادى. ناتيجەلەر ءار ايماقتاعى كوفەگە دەگەن مۇلدە وزگەشە ادەتتەردى كورسەتەدى.
سۋرەت: naked-science.ru
ليۋكسەمبۋرگ الەمدەگى ەڭ كوپ كوفە ىشەتىن ەل اتاندى - ءبىر ادام كۇنىنە ورتا ەسەپپەن 5،31 كەسە كوفە تۇتىنادى.
مۇنداي كورسەتكىشتىڭ جوعارى بولۋىنا ەلدە جۇمىس ىستەپ، ءبىراق كورشى مەملەكەتتەردە تۇراتىن "شەكاراارالىق قىزمەتكەرلەردىڭ" ۇلەسى اسەر ەتىپ وتىر. ەڭبەك نارىعىنىڭ 47%-ىن وسىنداي جۇمىسشىلار قۇرايدى جانە ولاردىڭ كۇندەلىكتى ادەتتەرى ليۋكسەمبۋرگ ستاتيستيكاسىنا ەنگىزىلەدى.
كوفە مادەنيەتىمەن تانىمال فينليانديا مەن شۆەسيا دا الدىڭعى قاتاردان كورىندى. جالپى العاشقى ون ەلدىڭ بارلىعى — ەۋروپادا ورنالاسقان مەملەكەتتەر.
ال كولەمى ۇلكەن اقش، جاپونيا جانە برازيليا سەكىلدى ەلدەردە كوفە جان باسىنا شاققانداعى تۇتىنۋ بويىنشا كورسەتكىش الدەقايدا تومەن.
- اقش - كۇنىنە 1،22 كەسە (24-ورىن)
- جاپونيا - كۇنىنە 1 كەسەگە جەتپەيدى
- برازيليا - 1،58 كەسە (18-ورىن)
- رەسەي - كۇنىنە 0،5 كەسە (46-ورىن)
رەيتينگتىڭ سوڭىندا شاي ءىشۋدى ءجون كورەتىن ەلدەر ورنالاسقان.
ءۇندىستان – ەڭ تومەن كورسەتكىشكە يە: كۇنىنە 0،02 كەسە. ياعني جەتى اپتادا ءبىر كەسە كوفە ىشۋمەن تەڭ. افريكا مەن وڭتۇستىك ازيانىڭ بىرنەشە مەملەكەتتەرىندە دە كوفە تۇتىنۋ كولەمى وتە تومەن - كۇنىنە 0،3 كەسەدەن از.