سۋعا شومىلىپ، جاعاجايدا كۇنگە قىزدىرىنعان جاقسى، ارينە. ءبىراق اۋرۋ تاۋىپ الماڭىز. كۇنگە كوپ قىزدىرىنۋ تەرىگە اسەر ەتىپ، ءتىپتى قاتەرلى ىسىك تۋدىرۋى مۇمكىن. جازدا كۇنگە قىزدىرىنساڭىز، قىستا اۋىرمايسىز، اعزاڭىز دارۋمەنگە تولادى دەگەندى ەستىپ جاتامىز.
الايدا پايداسى كوپ كۇننىڭ دە زيانى بار. مامانداردىڭ ايتۋىنشا، كۇن كوزىندە شامادان تىس قىزدىرىنۋ تەرى اۋرۋلارىنا اكەپ سوعۋى مۇمكىن. قاتەرلى ىسىككە دەيىن اسقىنىپ كەتۋى دە عاجاپ ەمەس، دەپ حابارلايدى Almaty-akshamy.kz 24.kz-كە سىلتەمە جاساپ.
انەت بەيبىت، كوپسالالى حيرۋرگيا ورتالىعىنىڭ رەكونسترۋكسيالىق جانە پلاستيكالىق حيرۋرگيا سەكتورىنىڭ ونكولوگ، حيرۋرگ، دەرماتولوگى:
كۇن استىندا ۇزاق ۋاقىت ءجۇرۋ سالدارىنان بىزدە ءارتۇرلى تەرى اۋرۋلارى پايدا بولادى. ەڭ قاراپايىم ءتۇرى – فوتودەرماتيت كۇن ساۋلەسىنەن پايدا بولاتىن اۋرۋ. بۇل اۋرۋ بىزدە كوبىندە بەتكە، مويىنعا جانە اياق-قولدارعا شىعادى. بۇل اۋرۋ ارنايى مامانداردىڭ كومەگىمەن ەمدەلەدى. كۇن ساۋلەسىنىڭ استىندا كوپ ءجۇرۋ، شامادان تىس كوپ ءجۇرۋ، دەنەنى قىزدىرۋ وسى تەرى وبىرىنا دا اكەپ سوعۋى مۇمكىن. تەرى وبىرىنىڭ نەگىزگى 3 تۇرىنە مەلانوما، كارسينوما، بازاليوما جاتادى.
كۇن كوزى تەك تەرى وبىرىن تۋدىرىپ قانا قويمايدى. ول تەرىنى قۇرعاتادى، ەرتە قارتايۋعا اكەلەدى، نەبىر داقتار پايدا بولۋى مۇمكىن.
انەت بەيبىت، كوپسالالى حيرۋرگيا ورتالىعىنىڭ رەكونسترۋكسيالىق جانە پلاستيكالىق حيرۋرگيا سەكتورىنىڭ ونكولوگ، حيرۋرگ، دەرماتولوگى:
ءبىزدىڭ ورتالىققا كوبىنە بازاليوما اۋرۋىمەن كەلەتىن ناۋقاستار وتە كوپ. بۇل اۋرۋ كۇن ساۋلەسى استىندا ۇزاق جىلدار بويى جۇرگەندە پايدا بولادى. ەڭ ماڭىزدى ەرەجە – ساعات 11 مەن 3ء-تىڭ اراسىندا، كۇن ەڭ بەلسەندى بولعان ۋاقىتتا سپورتپەن اينالىسپاۋ، اۋىر فيزيكالىق جۇمىس جاساماۋ. سونداي-اق وزەن-كولدەرگە شومىلۋعا بولمايدى.
مامانداردىڭ ايتۋىنشا، زيانى كوپ ەكەن دەپ كۇن كورمەي كەتپەۋ قاجەت. مۇنىمەن قاتار پايداسى دا بار. تەك شامادان تىس كۇنگە قىزدىرىنۋعا بولمايدى.
نازگۇل جانتەمىروۆا، ءىى ساناتتى ونكولوگ-حيرۋرگ: - ۋلتراكۇلگىن ساۋلەنىڭ اسەرىنەن تەرىدەگى زات الماسۋ، قان اينالىمى جاقسارادى. مينەرالدى زاتتاردىڭ الماسۋىن قالىپتاستىراتىن «د» دارۋمەنى كوبەيىپ، سىنعىش سۇيەكتىڭ جەتىلۋىنە، قاجەتتى دارۋمەندى سىڭىرۋگە سەبەپ بولادى. ءبىراق بەلگىلى ءبىر ۋاقىتتا كۇن كوزى وتكىر ەمەس ۋاقىتتا جۇرگەن دۇرىس.
ءقازىر كۇننەن قورعايتىن جاقپا مايلاردىڭ ءتۇر-تۇرى شىققان. ءبىرىنىڭ پايداسى كوپ دەگەنمەن، ءبىرىنىڭ زيانى بولۋى مۇمكىن.
نازگۇل جانتەمىروۆا، ءىى ساناتتى ونكولوگ-حيرۋرگ:
كۇننەن قورعايتىن جاقپا مايلاردىڭ پايداسى بار. قورعاۋ كوەفيسيەنتى 50 جاقپا مايدى تەرىنىڭ قالقانى دەسە دە بولادى. ءبىراق ونىڭ قۇرامىن تولىق تەكسەرىپ، تەرىڭىزگە سايكەس كەلەتىن ءتۇرىن قولدانعان ءجون. سوندا كەرى اسەر تۋدىرمايدى.
اققۇبا ءوڭدى ادامداردا كۇيىكتەن ساقتايتىن تابيعي قورعانىس از. ولار ءۇشىن كۇننىڭ قاتەرلى ىسىككە اكەپ سوعۋ مۇمكىندىگى تەرىسى قاراتورى ادامدارعا قاراعاندا الدەقايدا جوعارى. سونداي-اق دەنەسىندە مەڭ، پيگمەنتتىك داقتار كوپ ادامداردا تەرى قاتەرلى ىسىگىنە شالدىعۋ ءقاۋپى بار.