سولاي بولا تۇرا، الەمدە 730 ملن ادام ءبىر ءۇزىم نانعا زار بولىپ، اشتىق ازابىن تارتۋدا.
بىرىككەن ۇلتتار ۇيىمى كەلتىرگەن دەرەككە قاراعاندا، كۇن سايىن كۇللى الەم بويىنشا ءبىر ملرد تاعام پورسياسى قوقىسقا تاستالادى، دەپ حابارلايدى Almaty-akshamy.kz.
ياعني، الەمدەگى ازىق-تۇلىكتىڭ بەستەن ءبىر بولىگى تۇتىنىلماي قوقىسقا تاستالادى. كۇندە. بۇعان مىناداي فاكتورلار سەبەپ بولۋدا: - ىسىراپشىلدىق؛ جوسپارلاماۋ (تۇتىنۋ قاجەتتىلىگىنە قاراي شاقتاپ الماۋ)؛ ازىقتى ساقتاۋدا ءتيىستى قۇرالداردىڭ (توڭازىتقىش، ت.ب.) بولماۋى.
ساراپشىلاردىڭ ەسەبىنشە، ىسىراپ بولاتىن ازىقتى اقشاعا شاققاندا جىلىنا ءبىر ترلن دوللار ءراسۋا بولادى. تاعام قالدىقتارىنىڭ نەگىزگى بولىگى ءۇي شارۋاشىلىعىنا تيەسىلى – كۇنىنە قوقىسقا تاستالاتىن بر ملرد تاعامنىڭ شامامەن 60%-ن قۇرايدى. سودان كەيىنگى ورىندارعا قوعامدىق تاماقتاندىرۋ ورىندارى (28 پايىز) مەن بولشەك ساۋدا تۇر – 12%. وسى ورايدا بۇل ستاتيستيكالىق مالىمەتتە تاسىمالداۋ كەزىنەن نارىققا جەتكەنشە اقاۋ شالاتىن نەمەسە تۇتىنۋعا جارامسىز كۇيگە تۇسەتىن ازىق-تۇلىك قامتىلماعانىن، ياعني، ەسكەرىلمەگەنىن ايتا كەتپەكپىز.. سونىڭ وزىندە ادامنىڭ توبە شاشىن تىك تۇرعىزاتىن ىسىراپشىلدىق ورىن الىپ وتىر.
جىل سايىن الەمدە ءبىر ادام ورتا ەسەپپەن 79 كەلىگە جۋىق تاعامدى قوقىسقا تاستايتىنى بەلگىلى بولدى. سوڭعى ون بەس جىل ىشىندە ۇلىبريتانيا، اۆستراليا، يندونەزيا، مەكسيكا جانە وڭتۇستىك افريكادا ازىق-تۇلىك قالدىقتارىنىڭ ايتارلىقتاي ازايعانى بايقالدى. وسىلايشا، جاپونيا ازىق-تۇلىك قالدىقتارىن ۇشتەن بىرىنە، ال ۇلىبريتانيا شامامەن 18%-عا قىسقارتتى.