Skills Enbek (https://skills.enbek.kz/) پلاتفورماسىندا «كۇمىس جاس» جوباسى اياسىندا 50 جاستان اسقان قازاقستاندىقتار تەگىن ءبىلىم الىپ، ودان ءارى جۇمىسقا ورنالاسۋ ءۇشىن جاڭا داعدىلاردى يگەرە الادى.
Skills Enbek پلاتفورماسىندا «كۇمىس جاس» اتتى قوسىمشا بەت بار، وندا بارلىق قول جەتىمدى كۋرستاردىڭ ءتىزىمى ورنالاستىرىلعان، دەپ حابارلايدى Almaty-akshamy.kz.
قازىرگى ۋاقىتتا ماركەتينگ، تۋريزم، اقپاراتتىق تەحنولوگيالار، اۋىل شارۋاشىلىعى، قارجى، ءبىلىم بەرۋ جانە الەۋمەتتىك قىزمەت كورسەتۋ باعىتتارى بويىنشا 100-دەن استام كۋرس ۇسىنىلدى.
ازاماتتار وقۋ ءتىلىن جانە ماتەريالدى ۇسىنۋدىڭ ىڭعايلى ءپرينسيپىن تاڭداي الادى، سونىمەن قاتار وقۋ بارىسىن باقىلاۋ مۇمكىندىگى بار.
پايدالانۋشىلار ءۇشىن داعدىلاردى يگەرگەنى تۋرالى سەرتيفيكات بەرۋ كوزدەلگەن، ەلەكتروندىق ەڭبەك بيرجاسىنداعى (enbek.kz) تۇيىندەمەدە بارلىق يگەرگەن داعدىلارى تۋرالى اقپارتتار اۆتوماتتى تۇردە كورسەتىلەدى. جۇمىس بەرۋشى جۇمىس ىزدەۋشىنىڭ تۇيىندەمەسىنەن سەرتيفيكاتتار مەن العان داعدىلارىن كورەدى.
جاقىن ارادا «كۇمىس ۋنيۆەرسيتەتى» جوباسى اياسىندا جەتەكشى جوعارى وقۋ ورىندارىمەن ىنتىماقتاستىق ارقىلى ۇسىنىلاتىن كۋرستار جەلىسىن كەڭەيتۋ جوسپارلانۋدا.