كۇماندى جوبالاردان قاشىق ءجۇرىڭىز

 الماتى پوليسەيلەرى قالا تۇرعىندارىن تەلەفونداعى كۇماندى سىلتەمەلەرگە وتپەۋگە شاقىرادى

وڭىرلىك قىزمەتتە وتكەن بريفينگتە الماتى قالالىق پوليسيا دەپارتامەنتىنىڭ كريمينالدىق پوليسيا باسقارماسىنىڭ باستىعى قۋاتبەك ناۋاتوۆ بۇل ۆيرۋستىق فايلدار مەن قوسىمشالار بولۋى مۇمكىن، ولار قاسكۇنەمدەرگە ءموبيلدى بانكينگتەگى قاراجاتىڭىزعا قول جەتكىزۋگە مۇمكىندىك بەرەتىنىن ايتتى، دەپ حابارلايدى اlmaty-akshamy.kz.

«ءار ءتۇرلى سايتتارعا ءوزىڭىزدىڭ بانك كارتالارىڭىزدىڭ دەرەكتەرىن ەنگىزبەڭىز، سەبەبى بۇل ءسىزدىڭ جەكە اقپاراتىڭىزدى جيناۋ ءۇشىن ارنايى قۇرىلعان، ءارى قاراي ءسىزدىڭ بانك كارتاڭىزدان رۇقساتسىز تولەم جاساۋ ءۇشىن پايدالانىلاتىن «فيشينگتىك» سايتتار بولۋى مۇمكىن»، - دەپ جالعاستىردى ق. ناۋاتوۆ.

اقشانى كوبەيتۋگە ۋادە بەرەتىن نەمەسە ۇلكەن اقشالاي ۇتىستار تۋرالى حابارلايتىن ينتەرنەتتەگى كۇماندى بايقاۋلارعا قاتىسۋدىڭ قاجەتى جوق. 

ازاماتتارعا كريپتوۆاليۋتالارعا، اكسيالارعا، باعالى مەتالدارعا جانە ت.ب. ينۆەستيسيالاۋ ارقىلى ۇلكەن ديۆيدەندتەر بەرەتىن كۇماندى جوبالارعا اقشا سالماۋ كەرەكتىگى ەسكەرتىلدى. سونىمەن قاتار، الاياقتار ءارتۇرلى ەلدەردەن جوق ابونەنتتىك نومىرلەردەن قوڭىراۋ شالىپ، ولاردىڭ فيرمالارىنا (QuestraWorld، AssetWorldManagement) ينۆەستيسيالاۋدىڭ پايداسى تۋرالى نانىمدى تۇردە ايتا الادى.