كۇيەۋىنەن تاياق جەپ جۇرگەن الماتىلىق ايەل ادىلدىك ىزدەيدى

وتباسىلىق زورلىق-زومبىلىقتان زارداپ شەگىپ جۇرگەن الماتىلىق ايەل ادىلدىك ىزدەپ ءجۇر.

الماتىلىق ارايلىم جەكسەمبەكوۆا كۇيەۋى العاش رەت وسى كوكتەمدە وتباسىلىق جانجالدان كەيىن ۇرعانىن ايتادى. ايتۋىنشا، سودان كەيىن ۇرىپ-سوعۋ جيىلەپ كەتكەن. كۇيەۋى ​​جۇكتى ايەلدى پاتەرگە جاۋىپ، بەس كۇن قاتارىنان زورلىق جاساپ، ۇرىپ-سوعىپ، ۆانناداعى سۋعا باتىرعان. ول ءوزىن سوققىعا جىققان كۇيەۋى جازادان قۇتىلىپ كەتە مە دەپ قورقادى، دەپ حابارلايدى Almaty-akshamy.kz.

«ىشىمنەن تەۋىپ، سۋعا باتىردى، بايلاپ ۇستادى. سول كۇندەر ەسىمدە، بىلەسىز بە، سول بەس كۇندە تەزىرەك ولتىرسە ەكەن دەپ تىلەدىم. اكىمشىلىك سوت قاۋلىسىندا ول شىنىمەن دە ەسىرتكىلىك زات اسەرىندە بولعانى كورسەتىلگەن»، - دەدى زورلىق-زومبىلىق قۇربانى.

 ايەل پوليسياعا ارىز جازعان، الايدا، ونىڭ ايتۋىنشا، بۇل ۇزاق ۋاقىت بويى قارالماعان. بىرنەشە ايدان كەيىن عانا قىلمىستىق ءىس قوزعالعان. الايدا كۇيەۋى بوستاندىقتا. ونىڭ ايتۋىنشا، كۇيەۋى ءجيى قورقىتادى.

پوليسيا وقيعانىڭ بارلىق ءمان-جايى انىقتالسا، ەر ادام جازالاناتىنىن حابارلادى.

«بوستاندىق اۋدانىنىڭ پوليسيا ءبولىمى ق ر قك-نىڭ 110-بابى («ازاپتاۋ») بويىنشا قىلمىستىق ءىس قوزعادى. قازىرگى ۋاقىتتا ءىستىڭ ءمان-جايىن انىقتاۋعا جانە كىنالى ادامدى قىلمىستىق جاۋاپكەرشىلىككە تارتۋعا باعىتتالعان جەدەل-ىزدەستىرۋ شارالارى كەشەنى جۇرگىزىلىپ جاتىر»، - دەدى پوليسيا دەپارتامەنتىنىڭ وكىلى سالتانات ازىربەك.

بۇل رەتتە زاڭگەرلەر سوڭعى كەزدەرى تۇرمىستىق زورلىق-زومبىلىق وقيعالارى جيىلەپ كەتكەنىن ايتادى. ولار مۇنداي زاڭسىز ارەكەتتەر ءۇشىن جازانى قاتايتىپ، تاراپتاردىڭ تاتۋلاسۋىنا زاڭمەن تىيىم سالۋدى ۇسىنىپ وتىر.

ال ەر ادام تەك ەكى جىلعا دەيىن باس بوستاندىعىنان ايىرىلۋى مۇمكىن. تەرگەۋ قاشان اياقتالاتىنى ازىرگە بەلگىسىز.