اباي اتىنداعى قازاق ۇلتتىق وپەرا جانە بالەت تەاترىندا قۇرمانعازى ساعىرباي ۇلىنىڭ 205 جىلدىعىنا وراي «كۇمبىرلەگەن كۇي اتاسى – قۇرمانعازى» اتتى كونسەرتى ۇيىمداستىرىلدى.
كونسەرتتە وپەرا جانە بالەت تەاترىنىڭ جەتەكشى ارتىستەرى مەن نۇرعيسا تىلەندييەۆ اتىنداعى مەملەكەتتىك اكادەميالىق فولكلورلىق-ەتنوگرافيالىق «وتىرار سازى» وركەسترى قاتىستى.
«كۇي ۇلتىمىزدىڭ ءۇنى مەن ءسوزى بولعان، حالقىمىز دۇنيەگە اكەلگەن كوركەم قۇندىلىقتاردىڭ شىڭى. ال، قۇرمانعازى - ۇلتتىق مادەنيەت پەن مۋزىكانى الەمدىك دەڭگەيگە شىعارعان ونەر يەسى. حالقىمىز ءۇشىن كۇي مەن قۇرمانعازى ەسىمى بىر-بىرىمەن استاسىپ كەتكەن ۇعىم. ول ۇلتىمىزعا، ەلىمىزگە ورتاق، ادامزات مادەنيەتىنىڭ تاريحىندا وشپەس ءىز قالدىرعان تۇلعا. كەشتە قۇرمانعازىنىڭ رۋحىن اسقاقتاتىپ، تىڭداۋشىنىڭ جىگەرىن وياتىپ، سەرپىلدىرەتىن تانىمال كۇيلەرى ورىندالادى. ول كۇيلەر – تاعدىردىڭ تالقىسىنا، ءومىردىڭ قاتالدىعىنا مۋزىكا ارقىلى بەرىلگەن جاۋاپ، جاناشىرلىعىنىڭ بەلگىسى»، – دەيدى ق ر ەڭبەك سىڭىرگەن قايراتكەرى نۇرجان بايبوسىنوۆ.
سونىمەن قاتار، باعدارلامادا احمەت جانە عازيزا جۇبانوۆتاردىڭ «قۇرمانعازى» وپەراسىنان اريا مەن دۋەتتەر شىرقالىپ، بازارباي جۇمانيازوۆتىڭ «ماحامبەت» وپەراسىنان اريا، نۇرعيسا تىلەندييەۆ، دينا نۇرپەيىسوۆا، ەۆگەنيي برۋسيلوۆسكييدىڭ شىعارمالارى ورىندالادى. سونداي-اق، كەشتە وپەرا سوليستەرى تالعات كۇزەمبايەۆ (ق ر ەڭبەك سىڭىرگەن ءارتىسى، ق ر مەملەكەتتىك سىيلىعىنىڭ لاۋرەاتى)، بالاپان جۇبايەۆا (ق ر ەڭبەك سىڭىرگەن ءارتىسى)، يلياس ارتاعالييەۆ، ەسەنگەلدى رزا، ايدوس جاباعين، تولەگەن راحىمبايەۆ ونەر كورسەتتى.
