الماتى وبلىسى پوليسيا دەپارتامەنتىنىڭ بۇرىنعى باسشىسى سەرىك كۇدەبايەۆ 10 جىلعا سوتتالدى.
ول جازاسىن قىلمىستىق اتقارۋ جۇيەسىنىڭ ورتاشا ءقاۋىپسىز مەكەمەسىندە وتەيتىن بولادى، دەپ حابارلايدى Almaty-akshamy.kz. قازاقپارات-قا سىلتەمە جاساپ.
ۇكىمدى تالدىقورعان قالالىق سوتىنىڭ ءتوراعاسى ابديللا ۋمبەتاي شىعاردى.
ايتا كەتەيىك، سەرىك كۇدەبايەۆقا بيلىك پەن لاۋازىمدىق وكىلەتتىگىن اسىرا پايدالانۋ جانە ازاپتاۋ باپتارى بويىنشا ايىپ تاعىلدى.
ءبىراق سوتتالۋشى تاعىلعان ايىپپەن كەلىسپەي، كىناسىز ەكەنىن جەتكىزدى.
«مەن كىنالى ەمەسپىن. تاعىلعان ايىپپەن كەلىسپەيمىن. حالقىما وق اتپادىم. سوت الدىنداعى پروسەستەردە جاساعان ارەكەتتەرىمنىڭ بارلىعى زاڭدى ەكەنىن ايتقانمىن. ەشقانداي ازاپتاۋ بولعان جوق. جابىرلەنۋشىلەردىڭ وزدەرى ونى جوققا شىعاردى»،- دەدى سەرىك كۇدەبايەۆ سوتتاعى سوڭعى سوزىندە.
بۇگىن ساعات 11:00 دە ءوتۋى ءتيىس سوت وتىرىسى بىرنەشە ساعاتقا كەشىگىپ باستالدى. سەرىك كۇدەبايەۆتى سوت زالىنا ارنايى كۇزەتپەن جەتكىزدى. سوت وتىرىسى 13:25-تە باستالدى. پروسەسس باستالماس بۇرىن سەرىك كۇدەبايەۆتىڭ ۇلى ارمان مىرزاقۇلوۆ اكەسىنىڭ ەلگە ءوز ەركىمەن كەلگەنىن مالىمدەدى.
پروكۋرور سۋديادان س.كۇدەبايەۆقا 9 جىل باس بوستاندىعىنان ايىرۋ جازاسىن تاعايىنداۋدى سۇرادى.
الماتى وبلىستىق پوليسيا دەپارتامەنتىنىڭ بۇرىنعى باسشىسى كۇدەبايەۆ قاڭتار وقيعاسىنا قاتىستى كۇدىكتى دەپ تانىلعان ەدى.
ول 2020 جىلدان باستاپ 2022 جىلدىڭ قاڭتارىنا دەيىن الماتى وبلىسى پوليسيا دەپارتامەنتىنىڭ باستىعى قىزمەتىن اتقاردى.
2022 جىلدىڭ 18 اقپانىندا ول ىشكى ىستەر ورگاندارىنان ءوز ەركىمەن بوساتىلدى.
30 ناۋرىز، ساعات 11:00-دە سەرىك كۇدەبايەۆقا قاتىستى سوت پروسەسسى ءوتۋى ءتيىس بولعان. ءبىراق ايىپتالۋشى سوتقا كەلمەدى. سوعان ونى سوتقا ءماجبۇرلى تۇردە جەتكىزۋ جونىندە قاۋلى شىقتى. ارتىنشا گەنەرالدىڭ ەلدەن قاشىپ كەتكەنى بەلگىلى بولىپ، وعان حالىقارالىق ىزدەۋ جاريالاندى.
ال 27 ءساۋىر كۇنى كۇدەبايەۆ تۇركيادا ۇستالىپ، ەلگە جەتكىزىلدى.