گازەتىمىزدىڭ الدىڭعى نومىرلەرىندە بيلياردتان ەكى دۇركىن الەم چەمپيونى ەرنار چيمبايەۆتىڭ حالىقارالىق دارەجەدە وتە بەدەلدى «كرەمل كۋبوگىندا» جەڭىسكە جەتكەنىن حابارلاعانبىز. قازاقستاندىق سپورتشى ەلگە ورالعان سوڭ، ونىڭ جەڭىستى جولىن، بيلياردتىڭ قىر-سىرىن سۇراپ، ەرناردان قىسقاشا سۇحبات الدىق.
– ەرنار، ءسىزدى «كرەمل كۋبوگى» جارىسىندا جەڭىسكە جەتۋىڭىزبەن قۇتتىقتايمىز! ماسكەۋدەگى بۇل جارىس قالاي ءوتتى؟
– «كرەمل كۋبوگى» – بيلياردتان الەم چەمپيوناتىنان كەيىنگى ەكىنشى جۇرەتىن جارىس بولىپ ەسەپتەلەدى. بيىل بۇل جارىسقا دۇنيە ءجۇزىنىڭ 8 ەلىنەن 392 سپورتشى قاتىستى. مەن ءۇشىن جارىستىڭ باسى قيىنداۋ ءوتتى. سەبەبى، ويىن بابىنا كىرىپ، قارسىلاستارىما ۇيرەنىسۋ ءۇشىن ماعان ءبىراز ۋاقىت قاجەت. دەگەنمەن، بىر-ەكى كەزدەسۋدەن كەيىن وزىمە دەگەن سەنىم ارتىپ، شەبەرلىگىمدى بۇكىل جارىس بويى كورسەتە الدىم. ال جەكە قارسىلاستارعا كەلسەك، قىرعىزستان مەن وزبەكستاننىڭ سپورتشىلارى وتە مىقتى بولدى. بۇل ەلدەردىڭ وكىلدەرىمەن جارىستىڭ شەشۋشى كەزەڭدەرىندە سايىسقا ءتۇسىپ، تارتىستى ويىن كورسەتتىك. كوپتەگەن ويىندارىم 5:4 ەسەبىمەن سوڭعى پارتيانى جەڭۋ ارقىلى مەنىڭ پايداما اياقتالدى. باستىسى، تۋرنيردە جەڭىسكە جەتكەنىمە قۋانىشتىمىن.
– ءسىز بيلياردتىڭ «قۇراما پيراميدا» اتتى سايىسىنان جەڭىسكە جەتتىڭىز. بيلياردتىڭ بۇل ءتۇرىنىڭ ەرەكشەلىگى قانداي؟
– «قۇراما پيراميدانىڭ» بيلياردتىڭ وزگە سايىستارىنان باستى ەرەكشەلىگى – ول تەك قىزىل شارمەن وينالادى. ءوز كەزەگىندە ۇپاي جيناعان ادام وزىنە كەدەرگى جاساعان شاردى تورەشىگە ايتىپ الىپ تاستاي الادى. بۇل دا ايتىلعان سايىس وزگەشەلىكتەرىنىڭ ءبىرى.
– بيلياردقا دەگەن قىزىعۋشىلىق قاشان پايدا بولدى؟ وسى سپورت تۇرىنەن كاسىبي سپورتشى بولامىن دەپ ويلادىڭىز با؟
– العاش رەت بيليارد تاياقشاسىن 2003 جىلى 15 جاسىمدا قولعا الدىم. ول كەزدە تەك ويىن رەتىندە ۋاقىت وتكىزۋ ءۇشىن باراتىنمىن. الايدا، ۋاقىت وتە كەلە، سپورتتىڭ بۇل ءتۇرى ماعان جاقىن ەكەنىن ءتۇسىندىم. كاسىبي سپورتشى بولعىم كەلدى، سوندىقتان ەسەيگەن سايىن كۇندەلىكتى جاتتىعۋ جاساۋعا كىرىستىم. بيلياردقا كوڭىل قويىپ، ناتيجەسىندە بىرنەشە رەت قازاقستان چەمپيونى، 2010 جانە 2021 جىلدارى الەم چەمپيونى اتاندىم. ءقازىر ءوزىم جارىسقا قاتىساتىن ويىنشى عانا ەمەس، جاتتىقتىرۋشى قىزمەتىن اتقارامىن. شاكىرتىمنىڭ الدى ەلىمىزدىڭ چەمپيونى اتانىپ تا ۇلگەردى.
– تالاي حالىقارالىق جارىستارعا قاتىسىپ ءجۇرسىز، قازاقستان بيلياردىنىڭ دەڭگەيىن قالاي باعالار ەدىڭىز؟
– قازاقستان قۇراماسىنىڭ دەڭگەيى وتە جوعارى. ەلىمىزدە 5 الەم چەمپيونى بار. ونىڭ ءبىرى ءوزىم، سونداي-اق ءاليحان كارانەيەۆتى ايتا الامىن. ول – الەمنىڭ 3 دۇركىن چەمپيونى. قانىبەك ساعىندىقوۆ، اۋەز ەلۋبايەۆ جانە الىمبەك وماروۆ تا بيليارد الەمىنىڭ شىڭىنا شىققان جىگىتتەر. ولاردى دۇنيە ءجۇزى بويىنشا بيليارد سۇيەر قاۋىم تانيدى. جاس سپورتشىلارىمىزدىڭ دا قارقىنى جامان ەمەس. ءارقاشان ءبىرىنشى ورىن الا بەرمەسە دە، حالىقارالىق جارىستاردا كەمى جۇلدەگەر بولىپ كەلەدى.
– الدا بيليارد فەدەراسياسىنىڭ جانە ءوزىڭىزدىڭ قانداي جوسپارلارىڭىز بار؟
– بيىل قاراشا ايىندا كەزەكتى الەم چەمپيوناتى ءوتۋى كەرەك. قازىرگى باستى نازار وسى جارىستا. دەگەنمەن، ودان بۇرىن 20 قىركۇيەكتە ىشكى بىرىنشىلىك وتەدى. وسى تۋرنيردە ۇزدىك كورىنگەن سپورتشىلار كەيىن الەم چەمپيوناتىنا ەل نامىسىن قورعاۋعا اتتانادى. ايتا كەتكەن ءجون، قازاقستان چەمپيوناتىنا فەدەراسياعا تىركەلىپ، ىرىكتەۋدەن وتكەن بارلىق ادامدار قاتىسا الادى.
– ەلىمىزدە بيليارد ودان ءارى دامۋى ءۇشىن نە ىستەۋ كەرەك؟
– ەڭ ءبىرىنشى جەكە بيلياردشىلاردى قارجىلاندىراتىن دەمەۋشىلەر كوبەيۋى كەرەك. كەيدە وتە شەبەر سپورتشىلارىمىز قارجىلاي كومەك بولماۋىنان ءىرى دۇنيەجۇزىلىك جارىستارعا قاتىسا الماي جاتادى. ەكىنشىدەن، ەل ىشىندە بيلياردتان وتكىزىلەتىن جارىستار كوبەيۋى قاجەت. رەسەيمەن سالىستىراتىن بولساق، قازاقستاندا تۋرنيرلەر 2-3 ەسە از وتەدى. ياعني سپورتشىلارىمىز ءۇشىن تاجىريبە الماسىپ، شەبەرلىگىن شىڭدايتىن مۇمكىندىك تە از. سوندىقتان «الماتى كۋبوگى» نە «نۇر-سۇلتان كۋبوگى» سىندى تۋرنيرلەر وتكىزگەنىمىز ءجون. سوندا جاستاردىڭ بيلياردقا دەگەن قىزىعۋشىلىعى ارتادى جانە تۋىمىزدى كوكتە جەلبىرەتەتىن جاڭا چەمپيوندار پايدا بولادى.
– سۇحبات بەرگەنىڭىز ءۇشىن العىس بىلدىرە وتىرىپ، الداعى جارىستاردا ساتتىلىك تىلەيمىز!