مارقۇم ءاقنار گۇلستاننىڭ اناسى ادىلدىككە قول جەتكىزە الماي جۇرگەنىن ايتىپ، پرەزيدەنت توقايەۆقا ۇندەۋ جولدادى.
“قىزىمنىڭ قايتىس بولعانىنا بۇگىن تۇپ-تۋرا بەس ءجۇز كۇن بولدى. وسى بەس ءجۇز كۇننەن بەرى قاراي ءالى ادىلدىككە قول جەتكىزە الماي كەلە جاتىرمىن. ءىس ءالى شەشىلگەن جوق. ۇزدىكسىز شاعىمدانۋىمنىڭ ناتيجەسىندە ءىس ۇلتتىق قاۋىپسىزدىك كوميتەتىنىڭ تەرگەۋىنە بەرىلدى. ءالى دە تولىققاندى شەشىم شىققان جوق. كۇدىكتىلەر ۇستالعان جوق. مەنىڭ جالعىز قىزىمدى ولتىرگەندەر جازالانباي جاتىر. بۇل ءىستى جابۋعا بولمايدى. ءبىزدىڭ قازاقستان رەسپۋبليكاسىندا زاڭ بار. اقوردادا ايتىلعان ءار تاپسىرما ورىندالۋعا ءتيىس. مەملەكەت باسشىسى ارالاسىپ، ءادىل شەشىم شىعارۋعا كومەكتەسەدى دەپ ءالى دە ۇمىتتەنەمىن”، - دەدى ول.
سونداي-اق، ءاقناردىڭ اناسى ۇلتتىق قاۋىپسىزدىك كوميتەتىنىڭ باسشىسى ەرمەك ساعىمبايەۆ، باس پروكۋرور بەرىك اسىلوۆقا دا ۇندەۋ جاسادى.
ءاقناردىڭ قازاسى تۋرالى نە بەلگىلى؟
2024 جىلعى شىلدەدە الماتىلىق ءاقنار گۇلستان كوپقاباتتى ءۇيدىڭ تەرەزەسىنەن قۇلاپ، اۋىر جاراقاتتان قازا تاپتى. مارقۇمنىڭ تۋىستارى ونىڭ وزىنە قول جۇمساعانىنا سەنبەيدى جانە ونى تانىستارى ولتىرگەنىن ايتتى.
مارقۇمنىڭ اناسى گۇلستان ءقاميتتىڭ ايتۋىنشا، قىزى قۇلار الدىندا ازاپتالعان. ساراپتاما ناتيجەسى بويىنشا ءاقناردىڭ دەنەسىندە جاراقات ىزدەرى بولعان، تىستەلگەن جانە تىرنالعان جارالار بايقالعان. پاتەردەن سىنعان تىرناقتار مەن جۇلىنعان شاشتار تابىلعان. ايەلدىڭ سوزىنشە، قىزىن ەكى كۋرستاسى ازاپتاپ، كەيىن تەرەزەدەن لاقتىرىپ جىبەرگەن.
قايتىس بولعان قىزدىڭ اناسى ۇسىنعان كادرلار