5 كەنشى ىزدەستىرىلىپ جاتىر.
ساعات 15:00-دەگى مالىمەت بويىنشا، قاراعاندىداعى كوستەنكو اتىنداعى شاحتادا 42 ادامنىڭ ءمايىتى تابىلدى، دەپ حابارلايدى Almaty-akshamy.kz
اۆاريانى جويۋ جونىندەگى رەسپۋبليكالىق جەدەل شتابتىڭ باسشىسى توتەنشە جاعدايلار ءمينيسترى، گەنەرال-مايور سىرىم ءشارىپحانوۆ شاحتاعا ءتۇسىپ، ءورت جانە كەنشىلەردىڭ قازا بولعان جەرلەرىن تەكسەرىپ شىقتى.
اۆاريانى جويۋ جونىندەگى جەدەل شتاب تاۋلىك بويى ىزدەستىرۋ-قۇتقارۋ جۇمىستارىن ۇيلەستىرىپ، ەڭ ءقاۋىپسىز جانە كەنشىلەر بولۋى مۇمكىن ىقتيمال ۋچاسكەلەر بويىنشا تاۋ-كەن قۇتقارۋشىلارىنىڭ ءوتۋ جولدارى پىسىقتالىپ جاتىر. ىزدەستىرۋ جۇمىستارى شامامەن بىر-بىرىنەن 4 شاقىرىم قاشىقتىقتا ورنالاسقان ەكى ءوندىرۋ ۋچاسكەسىنىڭ اۋدانىندا جۇرگىزىلىپ جاتىر.
تاۋ-كەن قۇتقارۋشىلارى قاجەتتى جابدىقتارمەن جانە بايلانىس قۇرالدارىمەن قامتاماسىز ەتىلگەن. گاز جاعدايىن باقىلاۋ جالعاسىپ جاتىر. ىزدەستىرۋ-قۇتقارۋ جۇمىستارىنا بارلىعى "كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى" ج ش س قاراعاندى فيليالىنىڭ 55 تاۋ-كەن قۇتقارۋشىسى جانە 15 تەحنيكاسى جۇمىلدىرىلدى.
"شۇعىل مەديسينالىق كومەكتى قامتاماسىز ەتۋ ءۇشىن 21 ادام جانە 7 بىرلىك جەدەل مەديسينالىق جاردەم تەحنيكاسى جۇمىلدىرىلدى. بۇدان باسقا، تجم جانە قاراعاندى وبلىسىنىڭ تجد-دا رەسپۋبليكالىق جانە وبلىستىق جەدەل شتابتار جۇمىس ىستەيدى"، دەلىنگەن توتەنشە جاعدايلار مينيسترلىگى تاراتقان اقپاراتتا.