قازاقستاننىڭ ەپيداحۋالى ناشار. ەلدىڭ ءبىر وبلىسى «سارى» بەلدەۋدە، قالعان ءوڭىردىڭ بارلىعى «قىزىل» ايماقتا ورنالاسقان. سوعان قاراماستان، ءبىلىم ساپاسىنا الاڭداۋشىلىق تانىتقان ۇكىمەت ۆاكسينا قارقىنىن ارتتىرىپ، وقۋشىلاردى ءداستۇرلى فورماتتا وقىتۋعا شەشىم قابىلدادى.
دۇنيە ءجۇزىنىڭ باسقا مەملەكەتتەرىندەگى كوۆيدتىك احۋال قانداي دەڭگەيدە ەكەنىنە Almaty-akshamy.kz ءتىلشىسى عالامتور ماتەريالدارى ارقىلى شولۋ جاسايدى.
«حابار 24» سايتىنىڭ حابارلاۋىنشا، بەيجىڭدە وقۋ جىلى قىركۇيەكتىڭ بىرىندە باستالادى. ءبىراق بالالار مەن ۇستازدارعا توپقا جينالۋعا، بۇقارالىق شارالارعا قاتىسۋعا جانە COVID-19 دەرتى انىقتالعان اۋداندارعا بارۋعا تىيىم سالىندى. ءقازىر ەلدەگى 227 اۋداندا لوكداۋن ءتارتىبى ەنگىزىلگەن. قىتايدان تىس جۇرگەن مۇعالىمدەر، ستۋدەنتتەر جانە بالا باقشا قىزمەتكەرلەرى بەيجىڭگە ورالىپ، 14 كۇن باقىلاۋدا بولعاننان كەيىن مەكتەپكە بارا الادى. قولدارىندا مەرزىمى ەكى كۇننەن اسپايتىن پتر-تەست قورىتىندىسى بولۋى كەرەك.
«كاباردىڭ» مالىمەتىنشە، قىرعىزستاننىڭ ءبىلىم بەرۋ ۇيىمدارىندا جاڭا وقۋ جىلى 15 قىركۇيەكتەن باستالادى. قىرعىزستان مينيسترلەر كابينەتىنىڭ باسپا ءسوز قىزمەتى ءمالىم ەتكەندەي، وقۋ جىلىنىڭ باستالۋىن 15 كۇنگە اۋىستىرۋ تۋرالى شەشىم ەلدەگى ەپيدەميولوگيالىق جاعدايعا سايكەس، ءداستۇرلى وقىتۋ نىسانىنا كەزەڭ-كەزەڭىمەن كوشۋ ماقساتىندا قابىلداندى. ءوز كەزەگىندە، قىرعىزستان رەسپۋبليكاسى ءبىلىم جانە عىلىم مينيسترلىگى وقۋ پروسەسىن ءداستۇرلى فورماتتا قايتا باستاۋ كەزىندە قوعامدىق دەنساۋلىق ساقتاۋ ماسەلەلەرى، وسىنداي فورماتتىڭ ارتىقشىلىقتارى مەن قاۋىپ-قاتەرلەرى جانە باسقا دا فاكتورلار نازارعا الىنۋى ءتيىس ەكەنىن اتاپ ءوتتى.
COVID-19 تارالۋىنا جول بەرمەۋ جونىندەگى ۆاك-تىڭ اقپاراتىنا سايكەس، يزرايل ۇكىمەتى COVID-19 ەپيدەميولوگيالىق جاعدايىنا بايلانىستى جاڭا شەكتەۋلەرگە رۇقسات بەردى. 18 تامىزدان باستاپ ەكونوميكانىڭ بارلىق سەكتورلارىنا تارالاتىن «جاسىل ستاندارت» رەجيمى ەنگىزىلەدى. بۇل بۇقارالىق ءىس-شارالارعا كىرەر كەزدە ۆاكسيناسيا جاسالعانى نەمەسە COVID-19 ۆيرۋسىنان ايىققاندىعى تۋرالى سەرتيفيكات- «جاسىل ءتولقۇجاتتى» نە بولماسا ۆيرۋستىڭ جوق ەكەندىگىن دالەلدەيتىن تەست ناتيجەسىن كورسەتۋ قاجەتتىگىن قامتيدى.
ارگەنتينادا كوروناۆيرۋستىق ينفەكسيا بويىنشا اۋرۋشاڭدىق كورسەتكىشى ارتتى. ەلدە تاۋلىگىنە 11 397 ۆيرۋس جۇقتىرۋ جاعدايلارى تىركەلدى. ناتيجەسىندە كۆي فاكتىلەرىنىڭ جالپى سانى 5 052 884-كە جەتتى. كوز جۇمۋ دەرەكتەرى - 108 388. حالىقتى ۆاكسينالاۋ ءۇشىن رەسەيلىك ۆاكسينامەن قاتار ۆيرۋسقا قارسى ەكپەنىڭ تاعى بىرنەشە ءتۇرى قولدانىلادى. ارگەنتينادا ازاماتتار «سپۋتنيك V» جانە «AstraZeneca» نەمەسە «Moderna» ۆاكسينالارىن بىرىكتىرىپ، قولدانا الادى.
شۆەسيادا انىقتالعان كوروناۆيرۋستىق ينفەكسيالار سانى 1 108 057ء-نى قۇرادى. ءبىر تاۋلىك ىشىندە COVID-19 جۇقتىرۋدىڭ 1 236 جاعدايى انىقتالدى. ينفەكسيانىڭ اۋىر تۇرىمەن اۋىراتىن 29 پاسيەنت رەانيماسيا بولىمشەلەرىندە ەم قابىلداۋدا. جالپى العاندا، SARS-CoV-2-دەن 14 658 ادام قايتىس بولدى. بۇل رەتتە، ەلىمىزدە يممۋنداۋ قارقىندى ءجۇرىپ جاتىر، COVID-19 ۆاكسيناسىنىڭ ءبىرىنشى دوزاسىن 6 584 455 ادام، ەكىنشىسىن — 4 641 169 ادام الدى.
مەملەكەتتىك قىزمەتشىلەر حالىققا ۆاكسينا الۋدى ناسيحاتتاۋدىڭ ۇلگىسى رەتىندە. كەنيا ۆاكسينالاۋدان جالتارعان شەنەۋنىكتەردى جازالاۋعا نيەتتى. رەسمي نايروبي بارلىق مەملەكەتتىك قىزمەتشىلەرگە COVID-19 ۆاكسيناسياسىنان ءوتۋدى تاپسىردى. باس تارتقان ۇكىمەتتەگى انتيۆاكسەرلەر بۇل تالاپتى ورىنداماعانى ءۇشىن سوگىس الادى. «بارلىق مەملەكەتتىك قىزمەتشىلەرگە ۆاكسينالانۋعا باسىمدىق بەرىلەدى. ال 23 تامىزعا دەيىن ەكپە الۋعا ۇلگەرمەگەندەرگە تارتىپتىك شارالار قولدانىلاتىن بولادى»، — دەپ مالىمدەدى مەملەكەتتىك قىزمەت باسشىسى دجوزەف كينيۋا.