باس پروكۋراتۋر كوستەنكو اتىنداعى شاحتاداعى 46 كەنشىنىڭ ولىمىنە جانە 28 ادامنىڭ جاراقات الۋىنا سەبەپ بولعان اپاتقا بايلانىستى قىلمىستىق ءىستى تەرگەۋ اياقتالعانىن حابارلادى.
بۇل تۋرالى باس پروكۋرور بەرىك اسىلوۆ جازدى، دەپ حابارلايدى aqshamnews.kz.
- باس پروكۋراتۋرانىڭ ارنايى پروكۋرورلارىنىڭ باسشىلىعىمەن ۆجتت كوستەنكو شاحتاسىنداعى 46 كەنشىنىڭ قازاسىنا قاتىستى قىلمىستىق ءىستى تەرگەۋدى اياقتادى. 10 ايىپتالۋشىعا قاتىستى ءىس تاۋ-كەن جۇمىستارىنىڭ قاۋىپسىزدىك ەرەجەلەرىن بۇزۋ (قك 277-بابىنىڭ 3-بولىگى) بويىنشا سوتقا جولداندى، دەيدى باس پروكۋرور.
كۇدىكتىلەردىڭ ەسىمى
ەسكە سالايىق، بۇعان دەيىن باس پروكۋراتۋرا كۇدىكتىلەردىڭ ەسىمىن جاريالاعان بولاتىن.
اپات 2023 جىلدىڭ قازان ايىندا بولعان ەدى. العاشقى جارىلىس ك2 قاباتىنان بولىنگەن مەتاننىڭ جانۋى ناتيجەسىندە بولعان. گاز مەحانيكالىق ۇشقىننان تۇتانىپ، مەتان قوسپاسىنىڭ جۇمىس ىستەمەيتىن ايماقتا جارىلۋىنا جانە شاحتا تۋننەلدەرىندەگى كومىر شاڭىنىڭ بىرنەشە رەت جارىلۋىنا اكەلگەن.
"جارىلىس تارالۋ ۇزىندىعى شامامەن 6 كم قۇرادى"، – دەپ حابارلادى.
تەرگەۋ بارىسىندا جۇمىس ۇيىمداستىرۋدا تومەندەگىدەي كەمشىلىكتەر انىقتالعان:
- №6 ۋچاسكەنىڭ ينجەنەرلىك-تەحنيكالىق قىزمەتكەرلەرى مەن كوستەنكو اتىنداعى شاحتا باسشىلارى تاراپىنان ءقاۋىپتى وندىرىستىك فاكتورلاردى ءتيىستى دەڭگەيدە باقىلاماۋ؛
- 2023 جىلدىڭ قىركۇيەگىندە 48ك3-باتىس لاۆاسىندا بولعان وقيعالاردى ءتيىستى دارەجەدە تەكسەرمەۋ؛
- شاڭدى-جارىلىسقا قارسى ءىس-شارالاردى ءتيىستى دەڭگەيدە ورىنداماۋ، ناتيجەسىندە جەر استى جۇمىستارى كەزىندە شاڭ مەن گازدىڭ ارتۋى، اپات ءقاۋپىن جوعارىلاتتى.
تەرگەۋ ناتيجەسىندە 10 كۇدىكتى انىقتالىپ، ولاردىڭ توعىزى قاماۋعا الىندى. ولاردىڭ قاتارىندا:
- سەرگەي مۋستيۆكو – شاحتا ديرەكتورى، شاحتاداعى تاۋ-كەن جۇمىستارىن اپاتسىز جاعدايدا ۇستاۋعا، وندىرىستىك جانە ءورت قاۋىپسىزدىگى ەرەجەلەرىن ساقتاۋعا، جابدىقتاردى ۋاقتىلى جوندەۋگە جاۋاپتى؛
- نيكولاي گروزنوۆ – شاحتانىڭ باس ينجەنەرى، وندىرىستىك قاۋىپسىزدىك جاعدايىن باقىلاۋ، شاحتانىڭ گاز، شاڭ جارىلعىشتىق جانە كەن قاباتىنىڭ كەنەتتەن لاقتىرۋ ءقاۋپىن انىقتاۋ مىندەتتەرىنە جاۋاپتى؛
- ۆاديم ەرومين – ءوندىرىس بويىنشا ديرەكتوردىڭ ورىنباسارى، ءقاۋىپسىز جۇمىس جاعدايىن جانە شاحتا جابدىقتارىنىڭ سەنىمدىلىگىن قامتاماسىز ەتۋگە جاۋاپتى؛
- دميتريي فەدورەنكو – تەحنيكا قاۋىپسىزدىگى بويىنشا باس ينجەنەردىڭ ورىنباسارى، شاحتاداعى تەحنيكا قاۋىپسىزدىگىن قامتاماسىز ەتۋگە جاۋاپتى؛
- ۆلاديمير شيشكانوۆ – جەلدەتۋ جانە تەحنيكا قاۋىپسىزدىگى ۋچاسكەسىنىڭ باستىعى، شاحتاداعى جەلدەتۋ جانە گاز رەجيمىن قامتاماسىز ەتۋگە جاۋاپتى؛
- ۆيتاليي پەسترياك – جەلدەتۋ جانە تەحنيكا قاۋىپسىزدىگى ۋچاسكەسىنىڭ شاڭ-جارىلىسقا قارسى قورعاۋ جونىندەگى كومەكشىسى؛
- ۆيكتور كوپتەنكوۆ – №6 ۋچاسكەنىڭ باستىعى، جەلدەتۋ، شاڭ-گاز رەجيمى جانە ورتكە قارسى شارالاردى قامتاماسىز ەتۋگە جاۋاپتى؛
- ت. گابدۋشيەۆ – كونۆەيەرلىك كولىك ۋچاسكەسىنىڭ باستىعى، شاڭ-جارىلىسقا قارسى شارالاردى ورىنداۋعا مىندەتتى؛
- ۆلاديمير گوننوچەنكو – ءوندىرىس بويىنشا باس ينجەنەردىڭ ورىنباسارى، ءوندىرىستىڭ ينجەنەرلىك قامتاماسىز ەتىلۋىن باقىلاۋعا جاۋاپتى؛
- دميتريي كوسار – شاحتانىڭ باس مەحانيگى، شاحتا جابدىقتارىندا ءقاۋىپسىز جۇمىس جۇرگىزۋدى قامتاماسىز ەتپەگەنى ءۇشىن كۇدىكتى دەپ تانىلعان.
اپاتتان 74 ادام، سونىڭ ىشىندە قازا تاپقاندار مەن ءتىرى قالعان كەنشىلەردىڭ جاقىن تۋىستارى زارداپ شەگۋشى رەتىندە تانىلدى.