ددۇ جۇقپالى ەمەس اۋرۋلاردىڭ ءورشۋىن "بولاشاق ۇرپاقتىڭ دەنساۋلىعىنا كەلە جاتقان ءقاۋىپ" دەپ اتادى
شامادان تىس ءولىم – بۇل پوپۋلياسياداعى ءولىم-جىتىمنىڭ بولجانعانمەن سالىستىرعاندا ۋاقىتشا ارتۋى. دۇنيەجۇزى دەنساۋلىق ساقتاۋ ۇيىمىنىڭ جاڭا بايانداماسىندا كەلتىرىلگەن ساندار – پاندەميانىڭ دۇنيەجۇزىنە تيگىزگەن اسەرى، دەپ حابارلايدى Almaty-akshamy.kz Zakon.kz-كە سىلتەمە جاساپ.
دۇنيەجۇزى دەنساۋلىق ساقتاۋ ۇيىمى (ددۇ) جاريالاعان مالىمەتتەرگە ساي، الەمدە 2021 جىلدىڭ سوڭىنداعى 15 ميلليونعا جۋىق ادامنىڭ ءولىمى COVID-19 پاندەمياسىنان بولدى.
مامىر ايىنىڭ باسىندا دۇنيەجۇزى دەنساۋلىق ساقتاۋ ۇيىمى كوروناۆيرۋسقا قاتىستى ەسكەرتۋدىڭ ەڭ جوعارى دەڭگەيىن تومەندەتتى. وسىلايشا كوروناۆيرۋستى دەنساۋلىققا قاتىستى جاھاندىق توتەنشە جاعداي ەمەس دەپ مالىمدەدى. ءبىراق "بۇل COVID-19 بۇدان بىلاي جاھاندىق دەنساۋلىققا ءقاۋىپ توندىرمەيدى دەگەندى بىلدىرمەيدى" دەپ ەسكەرتتى.
دۇنيەجۇزى دەنساۋلىق ساقتاۋ ۇيىمىنىڭ باعالاۋى سونىمەن قاتار ددۇ ەسكەرتەتىن قاتەرلى ىسىك، جۇرەك-قان تامىرلارى اۋرۋلارى جانە قانت ديابەتى سياقتى جۇقپالى ەمەس اۋرۋلاردىڭ ءوسىپ كەلە جاتقان قاۋپىنە بۇكىل الەم بولىپ قارسى تۇرۋعا، شارا قابىلداۋعا شاقىرادى. ايتپەسە، اتالعان اۋرۋلار 2050 جىلعا قاراي بارلىق ءولىمنىڭ 86%-ىن قامتۋى مۇمكىن دەيدى ددۇ.
مەديسيناداعى جەتىستىكتەرگە قاراماستان، جۇقپالى ەمەس اۋرۋلار جىل سايىن ادام ءولىمىنىڭ تورتتەن ءۇش بولىگىنە سەبەپ بولادى. بۇل ءۇردىس جالعاسا بەرسە، عاسىردىڭ ورتاسىنا قاراي جىل سايىن 90 ميلليون ءولىم-جىتىمنىڭ شامامەن 86%-ى جۇقپالى ەمەس اۋرۋدان بولادى.
ددۇ جۇقپالى ەمەس اۋرۋلاردىڭ ءورشۋىن "بولاشاق ۇرپاقتىڭ دەنساۋلىعىنا كەلە جاتقان ءقاۋىپ" دەپ اتاپ، ونىمەن كۇرەسۋ ءۇشىن شەشىمدى "ۇجىمدىق" تۇردە قابىلداۋعا جانە بىرلەسىپ ارەكەت ەتۋگە شاقىردى.
"الەم كەيىنگى ەكى ونجىلدىقتىڭ ساباعىنا، سونىڭ ىشىندە وسى پاندەميا جىلدارىنداعى تراگەدياعا نازار اۋدارۋى كەرەك. سولاردىڭ ەڭ ماڭىزدىسىنىڭ ءبىرى - قاجەتسىز ءولىم مەن اۋرۋدى بولدىرتپاۋ. سونىمەن قاتار كۇشتى، ءادىل جانە توزىمدىرەك دەنساۋلىق ساقتاۋ جۇيەسى مەن قوعامدى قۇرۋ ءبىزدىڭ قولىمىزدا ەكەنىن ءبىلۋ"، - دەدى ددۇ باس ديرەكتورى تەدروس ادحانوم گەبرەيەسۋس.