كورەي ءجۇزىمى Shine Muscat تەك ازيادا عانا ەمەس، قازاقستاندا دا ۇلكەن سۇرانىسقا يە بولۋدا. ءوزىنىڭ ءتاتتى ءدامى مەن ۇلكەن جيدەكتەرىمەن جۇرتشىلىقتىڭ كوڭىلىن اۋدارا باستادى. ءبىراق بۇل ترەندتىڭ ارتىندا نە تۇر جانە بۇل ءجۇزىم قايدان شىقتى؟، - دەگەن ساۋالعا aqshamnews.kz جاۋاپ ىزدەپ كورگەن بولاتىن.
Shine Muscat نەمەسە «كورەي ءجۇزىمى» — ءۇش ءتۇرلى ءجۇزىم سورتىنان الىنعان گيبريد، ونى العاش رەت جاپونيادا وسىرگەن. دەگەنمەن، جاپونيانىڭ كليماتى بۇل ءجۇزىمدى وسىرۋگە ىڭعايسىز بولعاندىقتان، ول جۇڭگو مەن كورەياعا اۋىسىپ، سول جەرلەردە كەڭ تارالا باستادى. كورەيا بۇل ءجۇزىمدى ەكسپورتقا شىعارا باستادى، سوندىقتان «كورەي ءجۇزىمى» اتانىپ كەتتى. ايتا كەتۋ كەرەك، بۇل ءجۇزىمنىڭ تۇرلەرى ءارتۇرلى ەلدەردە ازداپ وزگەشە بولۋى مۇمكىن.
Shine Muscat ءجۇزىمىنىڭ ەڭ باستى ارتىقشىلىعى — ونىڭ ءدامى. ول وتە ءتاتتى ءارى شىرىندى، سونىمەن قاتار سۇيەكسىز. بۇل دامدە مۋسكات پەن بالدىڭ ۇيلەسىمى بار، سوندىقتان ونى دەسەرتتىك جۇزىمدەردى ۇناتاتىندار ءۇشىن تاپتىرماس تاڭداۋ.
Shine Muscat ءجۇزىمىنىڭ ءبىر ەرەكشەلىگى — ونىڭ ۇلكەن جيدەكتەرى. بۇل تەك ءجۇزىم ەمەس، ناعىز جەمىس دەليكاتەسى، ونىڭ كولەمى مەن سىرتقى ءتۇرى كوپشىلىكتىڭ نازارىن اۋدارادى.
قازاقستاندا Shine Muscat ءجۇزىمى ۇلكەن تانىمالدىلىققا يە بولدى. ونى Instagram، TikTok ارقىلى نەمەسە تىكەلەي جۇك كولىگىنەن ساتىپ الۋعا بولادى. باعاسى كيلوگرامىنا 6 000-9 000 تەڭگە ارالىعىندا. ءبىراق ءدال وسى ونىمگە تاپشىلىق تۋىنداپ تۇرعان جوق.
Shine Muscat ءجۇزىمىن ءىرى سۋپەرماركەتتەردەن، ونلاين دۇكەندەردەن نەمەسە الەۋمەتتىك جەلىلەر ارقىلى تابۋعا بولادى. بۇل ءجۇزىمنىڭ تانىمالدىعى كۇننەن كۇنگە ارتىپ كەلەدى، سوندىقتان ونى باعاسى الداعى ۋاقىتتا تومەندەيدى دەگەن بولجام بار.
كەيبىر تۇتىنۋشىلار Shine Muscat ءجۇزىمىنىڭ ۇلكەن كولەمىن حيميالىق زاتتارمەن وڭدەۋدىڭ ناتيجەسى دەپ الاڭدايدى. بۇل ماسەلەنى ەسكەرە وتىرىپ، ساتىپ الۋ كەزىندە تەك سەنىمدى جەتكىزۋشىلەردەن نەمەسە سەرتيفيكاتتالعان ونىمدەردەن الۋعا تىرىسىڭىز.